01 декабря 2022

2022 АНЗ – АДӔМОН ИСФӔЛДИСТАДИ ӔМА ӔНӔМАТЕРИАЛОН КУЛЬТУРИ БУНДАЙРАДИ АНЗ

17.02.2022 | 17:09

НӔ УОДВАРНИ ХӔЗНАДОНӔ НИККИ ГЪӔЗДУГДӔР ЦӔМӔЙ УА!..

Зӕгъун гъӕуй уой, ӕма адӕмон исфӕлдистади райрӕзтӕн агъазгӕнӕг мадзӕлттӕ нури уӕнгӕ дӕр Цӕгат Иристони арӕзт цудӕй, нурӕй фӕстӕмӕ ба еци ахсгиаг гъуддагмӕ никки фулдӕр ӕргом ӕздӕхт цӕудзӕнӕй. Уомӕй зӕрдӕ байвардта нӕ республики Хецауади Сӕрдар Дзанайти Барис, ӕрӕги Дзӕуӕгигъӕуи «Адӕмон исфӕлдистади ӕрмдӕснити райрӕзти центр» ку бабӕрӕг кодта, уӕд.

Аци центр арӕзт ӕрцудӕй 2019 анзи, адӕмон исфӕлдистади ӕхе ка фӕлваруй, ӕрмдӕсниадӕмӕ искурдиадӕ кӕмӕ ес, декоративон аййевади ӕнтӕстдзийнӕдтӕ ка ‘вдесуй, уонӕн паддзахадон агъаз кӕнунӕн.

 

Дзанайти Барис базонгӕ ‘й ӕрмдӕснити хеконд дзаумӕутти хӕццӕ. Центри косӕг Каринӕ Шаддад  куд радзурдта, уотемӕй тӕрхӕгутӕбӕл ӕвдист цӕунцӕ 100 кустуатемӕй фулдӕри конд дзаумӕуттӕ, уонӕй 40 ӕнцӕ адӕмон исфӕлдистади хӕццӕ баст. Центри исаразунцӕ ахурадон мастер-класстӕ, семинартӕ, уотемӕй никки парахатдӕр кӕнунцӕ сӕ аййевадӕ. Алли анз  дӕр  фӕййархайунцӕ Уӕрӕсей равдист – армукъа «Бӕлӕгъ»-и дӕр.

Нур берӕ рӕстӕг центр ӕхемӕ ӕлвасуй, нӕ республикӕмӕ иуазӕгуати ка иссӕуй, еци туристти. Косгутӕ  син исаразунцӕ цӕмӕдессаг экскурситӕ, базонгӕ сӕ кӕнунцӕ нӕ истори, нӕ рагфидтӕлти традицитӕ ӕма ӕгъдӕутти хӕццӕ. Иристони хӕларӕй ци берӕ адӕмихӕттитӕ цӕрунцӕ, уони цардиуаги хӕццӕ.

Хецауади Сӕрдарӕн куд фегъосун кодтонцӕ,  уотемӕй Центри куст  зингӕ ӕнтӕстгиндӕр уидӕ, фал хъоргонд  цӕуй   еуцӕйбӕрцӕдӕр нӕхъӕртондзийнӕдти фудӕй. Фиццагидӕр, ӕрмдӕснитӕн ке нӕййес еумӕйаг арӕзтадон фӕзӕ. Сӕ ӕрмадзитӕ ниххӕлеу ӕнцӕ Дзӕуӕгигъӕу ӕма республики алли къумти, сӕ еуетӕн ба ӕгириддӕр нӕййес кусти бунӕттӕ.

Уой фӕдбӕл дзоргӕй, Дзанайти Барис, республики промышленность ӕма инвестицити министр Мӕрзойти Владимирӕн (кӕци ӕ хӕццӕ адтӕй еци балций) бафӕдзахста, цӕмӕй ӕвӕстеуатӕй бакосонцӕ ӕма мӕйи кӕронмӕ иссеронцӕ уӕхӕн рауӕн, еугур ӕрмадзитӕ дӕр еу фӕзӕбӕл кӕми уонцӕ.