Зундгонд куд æй, уотемæй 2024 анзи цитгинæй бæрæггонд цæудзæнæй Цæгат Иристони сæдæ анзей бæрæгбон. Уой фæдбæл мах дæр нæ газети мухур кæнæн аллихузон æрмæгутæ – нæ республики автономий райрæзти цаути фæдбæл, уонæми хъазауатонæй архайæг адæймæгути туххæй. Æма абони æримисдзинан Цæрикъати Дæхцихъой фурт Осмæни (адæм æй уарзонæй Дзаге хониуонцæ) рохс ном. Е советон доги нæ адæмон хæдзаради искурдиадæгин разамонгутæй еу-инсæй анземæй фулдæр æнтæстгинæй бакуста республики сæйраг банки разамонæгæй. Куд разамонæг, уæдта куд адæймаг, уотæ хъæбæр цитгин адтæй адæми ‘хсæн, цийни фæдбæл уа æви зиани фæдбæл, уæддæр алли гъуддаги дæр архайдта æновудæй, кæми багъæуидæ, уоми, æ бон ци адтæй, уомæй фæййагъаз кæнидæ. Уæлдай зæрдиагæй ба архайдта кæстæртæн сæ царди хабæрттæ аразуни гъуддæгути. Кæд  рагæй нæбал æй адæми ‘хсæн, уæддæр, ка ‘й зудта, етæ ин абони дæр ма  зæрдиагæй æ кой ракæнунцæ. Уонæй ба ‘й базонунцæ нури æригон фæлтæртæ дæр.

Имисгæ ба ‘й уомæ гæсгæ дæр кæнæн, æма аци анз æ райгурдбæл æнхæст кæнуй æхсæзинсæй анзи (1903-1976). Цæрикъати Осмæни æма æ бийнонти туххæй æ рæстæги зæрдæмæдзæугæ æрмæг ниффинста зундгонд публицист Æгъузарти Саукуй.