02 декабря 2022

АЦИ АНЗИ ÆНТÆСТДЗИЙНÆДТÆ НИН ÆНЦÆ НИФСДÆТТÆГ ÆМА РАЗÆНГАРДГÆНÆГ

30.12.2020 | 16:20

Раздæр æнзти куд адтæй, уотæ бабæй нур дæр Цæгат Иристони Сæргълæууæг БИТАРТИ Вячеслав Нæуæг анзи хуæдразмæ исаразта фембæлдтитæ республики хецаудзийнади æма дзилли  минæвæртти хæццæ. Æрæги уæхæн фембæлдтитæ Битари-фуртæн адтæй Горæтгæрони, Мæздæги, Кирови, Æрæдони, Алагири, Дигори æма Ирæфи районти минæвæртти хæццæ (раст зæгъгæй, нури санитарон-эпидемиологон тæссаг уавæрмæ гæсгæ, еци фембæлдтитæ арæзт цудæнцæ видеоконференций бастдзийнади фæрци).

Районти минæвæрттæн Нæуæг анзи агъоммæ арфитæ кæнгæй, республики Сæргълæууæг радзурдта, 2020 анзи дæргъи республики ци ахсгиаг проекттæ æма программитæбæл куст цудæй, ци вазуггин социалон объекттæ бантæстæй исаразун, уæдта хæстæгдæр рæстæги республики Хецауадæ æма районти разамундти размæ ци бæрнон нисантæ ес, уони туххæй.

Битарти Вячеслави дзубандимæ гæсгæ, кæд коронавируси пандемий æма æндæр  хъоргæнæг уавæрти архайун багъудæй, уæддæр Цæгат Иристон разæнгардæй куста фиццаградон национ проекттæ æма сæрмагонд паддзахадон программитæ гъæугæ хузи æнхæст кæнунбæл, республики идарддæри социалон-экономикон æма культурон райрæзти мадзæлттæ царди рауадзунбæл.

Районти арæзт æрцудæнцæ нæуæг скъолатæ æма рæвдауæндæнттæ, фельдшерон-акушерон пункттæ æма æндæр медицинон косæндæнттæ, бундоронæй цалцæггонд цудæнцæ культури хæдзæрттæ, парктæ æма æндæр фæлладуадзæн бунæттæ, донуадзæн хæтæлти системитæ æма автомобилон нæдтæ…

– Социалон-экономикон райрæзти фарстатæбæл косгæй, ахсгиаг æй, цæмæй не ’мзæнхонти цард хуæздæр æма фæрнгундæр кæна, цæмæй алли адæймагæн дæр уа æ гъомус ирддæрæй раргом кæнунæн æмбæлгæ фадуæттæ. Æма еци нисантæбæл дæр ахедгæ куст цæуй, – загъта республики Сæргълæууæг.

Мæздæги æма Дзæуæгигъæуи нæуæг скъолатæ, Ногир æма Гизæли донуадзæн хæтæлти райарæзт, Черменигъæуи культури Хæдзарæ æма муниципалитетти нæдтæ цалцæггæнæн куститæ, Елхотти æма Комсомольски «Ирæзти тæлмити» фæззинд… Уогæ, фæстаг рæстæги нæмæ ци берæ аллихузон социалон æма культурон объекттæ фæззиндтæй, уони еугурæй нимад ка фæууодзæнæй!..

– Никки устурдæр куст ба нæ еугуремæ дæр æнгъæлмæ кæсуй исонибони. Æма еци нисантæ нæ къохи бафтуйдзæнæнцæ, еумæйаг хъауритæй æма æмвæндæй ку архайæн, айдагъдæр уæд. Уадзæ æма зæронд анз еугур фидбилизтæ дæр æ хæццæ фæххæссæд, цæмæй Нæуæг, 2021 анзи нæ еугуремæн дæр æнтæстгиндæр æма фæрнæйдзагдæр уа, цæмæй нин исуа райдзастдæр, нæ царди фулдæр уонцæ зæрдæхцæуæн цаутæ æма хабæрттæ, цæмæй нин нæ бæрæгбæнттæ исуонцæ æцæгæй цийнаг æма нифсдæттæг, – уæхæн арфитæ нæ республики Сæргълæууæг ракодта районти минæвæрттæн.

Алли фембæлди кæронбæттæн дæр исфедауидæ æхцæуæн фæткæй – районти фæллойнæгæнгути хуæздæртæн лæвæрд æрцудæнцæ Цæгат Иристон-Аланий Сæргълæууæги Арфи финстæгутæ æма æндæр хуæрзеугутæ.

 

Нæ республики Сæргълæууæги æма Хецауади пресс-службæ