Æ цалх историйæн тундзуй
Размæ æности æвæллад.
Дзиллæн е ’хсарæй лæгæрдуй
Тарæй и рохсмæ урух над.

Уобæл дуйнейæн æ къумтæй
Адæм цæунцæ цардагор.
Уоми уæларвæй æ тунтæй
Тавуй æхседгæ зæрин хор.

Уотæ финста е ’мдзæвгæ «Цалх»-и искурдиадæгин поэт Бузойти Кермен. Гъулæггагæн, еци цалх Кермени ирисхъæбæл æверхъауæй базилдæй – цардбæллон лæхъуæн Устур Фидибæстон тугъди будурæй нæбал исæмбалдæй æ фидиуæзæгбæл, бастъалдæй тугъди содзгæ-цæфсгæ гарнай.
Фал нин æ фæсте уæддæр байзадæнцæ æ финст уадзимистæ. Æмдзæвгитæ финсун байдæдта, скъолай ма ку ахур кодта, уæд. Æригон поэти æмдзæвгитæ мухургонд цудæнцæ уæди мухури фæрæзнити. Уогæ айдагъ æмдзæвгитæ нæ финста, фал ма хузæ кæнунмæ дæр хуарз арæхстæй.
Æ уадзимистæй гъæуайгонд ка ’рцудæй, уонæй кæцидæртæ мухургонд цудæнцæ газетти, журналти еумæйаг киунугути. Æрæги ба ин уагъд æрцудæнцæ хецæн киунугæй – уобæл хъæбæр æновудæй байархайдта æ кæстæр æнсувæр Артем.
Бузойти Кермени уадзимисти æмбурдгонд «Мæ зæрди катай»-и рацуди фæдбæл сæрмагонд мадзал 7 майи арæзт æрцæудзæнæй Дзæуæгигъæуи Наукон киунугæдони. Хъæбæр хуарз уодзæнæй дзиллонæй си ку бамбурд уæн. Киунугæ «Мæ зæрди катай», зæгъгæ, ке хуннуй, уомæ гæсгæ ма уой зæгъуйнаг дæр ан, æма ни еци цардбæллон лæхъуæни зæрди катай иронх ма кæнæд, æ рохс ном ин имисунæй ихæсгин ан.
Мадзал райдайдзæнæй фæсарæфтæ дууæ сахаттебæл.

ХÆМИЦАТИ Маринæ