Уотæ дзориуонцæ нæ рагфидтæлтæ, æма син сæ загъд лæдæрун æнгъезуй фæдзæхсти хузæн: адæймаг уой ку лæдæра æма цидæр фидбилиз, ка ’й зонуй, æрцæудзæнæй, уæд рæуæнттæ гъæуама ма агора, фал си фæййервæзунæн мадзæлттæ араза. Ауæхæн гъуди, зæгъун æнгъезуй, иссæй æ сæйрагдæр медес, Цæгат-Кавказаг федералон зилди Уæрæсей Федераций Президенти Æнхæстбаргин минæвар Юрий Чайка Цæгат-Кавказаг федералон округи æдасдзийнади, коррупций нихмæ архайди, барадон хуæрзæгъдау ефтонгкæнуйнади координацион советæн ке исаразта, еци æмбурди ци дзубанди рауадæй, уомæн. Дзубанди ба си цудæй æхсæнадон бунæтти, ахурадон уагдæнтти терроризми нихмæ мадзæлтти æмвæзадæ фæббæрзонддæр кæнун æма Цæгат Кавкази федералон зилди, раздæр ка ’рцудæй, уæхæн фудбæлæхтæ нæуæгæй не ’руадзуни æма рецидивон фудракæндтитæй хе гъæуай кæнуни фарстати фæдбæл.

Мадзали архайдтонцæ зилди субъектти разамонгутæ, Уæрæсей Федераций Генералон прокурори хуæдæййевæг Андрей Кикоть, Цæгат Кавкази федералон зилди Уæрæсей Федераций Медгъуддæгути министради Сæйраг управлений хецау Сергей Бачурин, Цæгат Кавкази федералон зилди Уæрæсей Федераций Национ гвардий æфсæдти командæгæнæг Сергей Захаров.

Æмбурди райдайæни Юрий Чайка æ радзубандий куд баханхæ кодта, уотемæй, дзубанди ци фарстатæбæл цæуй, уони ахсгиагдзийнадæ уæлдай фæббæрæгдæр æй сæрмагонд æфсæддон операций уавæрти æма сæмæ уæлдай бæрнондæр цæстингасæй кæсун æма сæ тæккæ гъæугæдæр хузи æнхæст кæнун гъæуй. Æ загъд адтæй уотæ:

– Зилди субъектти хецауади æма барадæгъæуайгæнæг оргæнтæ устур куст бакодтонцæ ахурадон уагдæнттæ техникон æгъдауæй исефтонг кæнунбæл, байамудтонцæ ’й ахургæнгутæ æма скъоладзаутæн, террористон тасдзийнади рæстæг хе куд дарун гъæуй, уой. Фал, еуæй-еу разамонгутæ хатгай тасдзийнади æцæгдзийнадæ кенæ æнхæст нæ лæдæрунцæ, кенæ ба имæ уæлæнгай цæстингасæй кæсунцæ, æма уомæ гæсгæ профилактикон кустмæ се ’ргом фагæ не ’здахунцæ.

Аци фарстатæ æнхæст кæнунæй комкоммæ ихæсгин ка ’й, еци оргæнти размæ лæууй вазуггин ихæс: ахурадон уагдæнтти алкæддæр ахуртæ аразун, Уæрæсей Федераций ахурадæ æма науки министрадæ ци фæдзæхститæ бацæттæ кодта, уони бундорбæл.

Æмбурди æргом ма Юрий Чайка раздахта зилди фæзуати дуккаг хатт æрцæуйнаг æма рецидивон фудракæндти нихмæ мадзæлттæ гъæугæ æмвæзадæбæл ке ’нцæ. Уотæ, кæд 2022 анзи дуккаг хатт æрцæуæг фудракæндти нимæдзæ 1,2 проценти фæббæрзонддæр æй, уæд аци анз еци нимæдзæ фæмминкъийдæр æй 4,4 проценти. Профилактикон кусти устур æргом æздахун гъæуй, ахæстдонæй ка рацудæй, уонæн куст раттуни гъуддагмæ.

Æмбурди архайдта нæ республики Хецауади Сæрдар Дзанайти Барис дæр æма уоми радзубанди кæнгæй, фæббæрæг кодта, ци фарстатæмæ цудæй каст, уони фæдбæл Цæгат Иристони циуавæр куст æма мадзæлттæ æнхæстгонд цæуй, уой.