Сахар-бæгъатæр Севастополи бæрæгастæу ци музей «Уæрæсей бæгъатæртæ: тухæ – еудзийнади» ес уоми æрæги æвæрд æрцудæй не ‘мзæнхон æдзард тугъдон Хугати Радислави къарæ дæр.

Экспозици арæзт æрцудæй, Уæрæсей Бæгъатæри майдан «Сугъзæрийнæ Стъалу» ка райста, уони кадæн.

Хонсариристойнаг тугъдон, 33-анздзуд Хугати Радислав фæммард æй 2022 анзи 27 мартъий Украини сæрмагонд æфсæддон операций архайгæй. Е службæ кодта мотоæхсæг полкки.

Еци бон Мариуполбæл тугъдтити рæстæг  Хугай-фурти къуар бахаудтæй зин уавæри. Дууæ тугъдони фæццæфтæ ‘нцæ, æма син Радислав фиццаг агъаз бакодта. Бардзурд равардта, кæми адтæнцæ, уордигæй фæстæмæ рацæуни туххæй. Фал лæдæрдтæй, разæй цæугутæ æдас ке нæ уодзæнæнцæ, уой.  Æма уæд исфæндæ кодта знагбæл сайдæй рацæун: Иристони турусай хæццæ размæ рахезгæй, æхсун райдæдта знæгти, цæмæй етæ уомæ се ‘ргом раздахонцæ. Уомæй фæййервæзун кодта е ‘мбæлтти. Æ къуари тугъдонтæ еци уавæри исарæхстæнцæ æма знаги ниддæрæн кодтонцæ.

Мариуполбæл тугъдтити Хугати Радислав алæмæти  лæгдзийнадæ  ке равдиста, уой туххæй ин Уæрæсей Президент Владимир Путин исаккаг кодта Уæрæсей Бæгъатæри ном  (æ фæсмæрдæ).

2024 анзи  æ райгурæн  Къуасайи ба ин æвæрд æрцудæй мемориалон  циртдзæвæн.

Хугати Радислави рохс ном цитгийнагæй байзайдзæнæй историй. Нæ бæгъатæртæ  нæ дзиллити зæрдити фæлтæрæй-фæлтæрмæ цæрдзæнæнцæ, се ‘скъуæлхтдзийнæдтæ син сæрустурæй имисдзæнæнцæ.