Æрхæстæг кæнуй нæ кæстæртæн сæ тæккæ зæрдæхцæуæндæр афонæ – ахури нæуæг анзи райдайæн. Æма куд скъоладзаутæн сæхецæн, уотæ сæ ниййергутæн дæр цæмæдесаг æнцæ уой хæццæ баст еугур хабæрттæ дæр, уæлдайдæр ба – ци нæуæгдзийнæдтæ син фæззиндзæнæй, етæ.

Еци нæуæгдзийнæдтæй ба еу æй – Уæрæсей Федераций рохсади Министради унаффæмæ гæсгæ, фиццаг кълæсти ахурдзаутæн сæ ахурадон фæткæ фæууодæнстдæр кæндзæнæнцæ. Уроктæн сæ рæстæг уодзæнæй æдеугур 35 минути, еу бони дæргъи ба сæмæ цуппар урокемæй фулдæр  гъæуама ма уа.

Уæхæн фæткæ федаргонд æрцудæй, цæмæй сувæллæнттæ æгæр ма фæллайуонцæ æма ма æгудзæг кæнонцæ. Ахури дуккаг æрдæг урокти рæстæг фондз минути фæффулдæр уодзæнæй.

Æма ма ниййергутæ æма сувæллæнттæн еума æхцæуæндзийнадæ – анзи медæгæ фиццагкъласонтæн сæ фæлладуадзæн рæстæг уæлæнхасæн æнæгъæнæ къуæре фæддаргъдæр уодзæнæй! Уой хæццæ син аци ахури анзæй фæстæмæ хæдзарæмæ куст дæр нæбал дæтдзæнæнцæ.

*  *  *

Сæ ахурдзау кæстæрти скъоламæ цæунмæ алцæмæй дæр æнхæстæй бацæттæ кæнунæн сæ равгитæ кадавар кæмæн æнцæ, уæхæн берæсувæллонгин (цуппар æма уомæй фулдæр сувæллæнттæ кæми гъомбæл кæнунцæ) бийнонтæн фæййагъаз кæнуни нисанеуæгæй нæ республики фæллойни æма социалон райрæзти министради хъæппæресæй арæзт цæуй акци «Еумæ скъоламæ». Финддæс æма инсæйемæй фулдæр берæсувæллонгин бийнонтæн лæвæрд цæунцæ сертификаттæ сæ ахурдзау кæстæртæн ахури нæуæг анзи размæ уæледарæс канцелярон фæрæзнитæ балхæнунæн.

Нæ уацхæссæг