22 майя 2024

… ÆМА ЗÆРДÆХЦÆУÆНДÆР КÆНДЗÆНÆЙ ГЪÆУУОН ЦАРД

16.09.2023 | 14:58

Цæгат Иристони фараст гъæууонхæдзарадон кустуати ци гранттæ рамулдтонцæ, уони бæрцæ еумæйагæй æй 88, 2 миллион соми. Еци фæрæзнитæ гъæуама харзгонд æрцæуонцæ агротуризми къабази райрæзтæн.

Уой туххæй фегъосун кодта республики гъæууон хæдзаради министр Къусрати Алан. Грантти фæрæзнитæй фермертæ – гъæууонхæдзарадон продукци уадзгутæ  исараздзæнæнцæ, туристти кæми исиуазæг кæндзæнæнцæ, уæхæн бунæттæ.

«Нæ республики экономики райрæзтæн туризм хъæбæр агъаз æй, – загъта министр. – Æхцæуæн мин æй нæ республики цæргутæн фегъосун кæнун, Уæрæсей Федераций гъæууон хæдзаради министрадæмæ конкурси архайунмæ ци 21 проекти барвистан, уонæй фараст ке ’рцудæй федаргонд. Е еугуремæй устурдæр бæрæггæнæн æй нæ бæсти – регионтæй махæй фулдæр уæлахездзаутæ некæмæ ес. Еумæ райсгæй, агротуризми райрæзтæн грантти хузи дехгонд æрцудæй 88,2 миллион соми, уæлахездзаутæн ратдзæнæнцæ фæйнæ 10 миллион соми».

Грант «Агротуризм»-и фæрци 2024 анзи республики фæззиндзæнæй, туристтæ кæми æрбунат кæндзæнæнцæ, уæхæн нæуæг объекттæ.

Къусрай-фурт ма куд загъта, уотемæй еци гранттæ гъæууон хæдзарадæн фæййагъаз уодзæнæнцæ сæ равналæнтæ фæуурухдæр кæнунæн æма уæлæнхасæн æфтуйæгтæ есунæн сæ продукци уæйæ кæнунæй, уæдта гъæууон фæзуæттæмæ адæми раздахунмæ.

Республики 2024 анзи грантти хузи агъаз райсдзæнæнцæ кæсалгæ дарæн, сæгътæ дарæн æма муддартæн, гагарæзи хæдзарæдтæ, уæдта сæнæгæнгутæ.

Гранттæй агъаз гъæууонхæдзарадон кустуæттæн гъæууон туризми райрæзтæн дæттунцæ 2022 анзæй нурмæ. Фарæ республикæ ке балæвардта конкурсмæ, уонæй айдагъдæр дууæ проекти æрцудæй федаргонд.