Цæгат Иристони дæр, куд æнæгъæнæ Уæрæсей, уотæ æмгъудæй раздæр райдæдта Еумæйаг паддзахадон фæлварæнтæ дæттуни гъуддаг. Архайунцæ си 49 рауагъдони, сæ фулдæр æнцæ, фарæ фæлварæнтæ ка нæ равардта, етæ.

Уруссаг æвзагæй фæлварæнтæ дæттуйнаг æнцæ 25 рауагъдони, 17 – профилон математикæ æма æхсæнадæзонунадæй, 14 – историйæй, 11 – биологийæй, 9 – химийæй, 8 – англисаг æвзагæй, 6 – информатикæ æма ИКТ-æй, фæйнæ 4 – литературæ æма физикæй. Æмгъудæй раздæр фæлварæнтæ дæтдзæнæнцæ 20 мартъийæй 19 апърели уæнгæ сæрмагонд нисангонд пункти Дзæуæгигъæуи 47-аг скъолай.

Ахурадæ æма науки министрадæ еугур фадуæттæ дæр исаразта, цæмæй Еумæйаг паддзахадон фæлварæнтæ æнæкъулумпийæй рацæуонцæ.

Министради ахуради хуæрзгъæдæдзийнади хайади разамонæг Дзлиати Альбинæ куд радзурдта, уотемæй фæлварæнти архайæг специалисттæ цæттæдзийнадæ райстонцæ сæрмагондæй арæзт еугуруæрæсеуон мадзали рæстæг.

Æмгъудæй раздæр фæлварæнтæ райдæдтонцæ географи æма литературæй, гъуддæгутæ куд конд цæунцæ, уомæ еудадзугон цæстдард ес ахурадæ æма науки министради ’рдигæй, ес си æхсæнадон цæстдаргутæ студенттæй. Фæлварæнти бæрæггæнæнтæ исбæрæг уодзæнæнцæ 3 апърели. Иннæ фæлварæн, уруссаг æвзагæй, уодзæнæй 23 мартъий. Ахурадæ æма науки министради Еумæйаг паддзахадон фæлварæнти фарстати фæдбæл косуй комкоммæ бастдзийнади телефон: 59-49-40.