Цæгат Иристон æма Ленингради облæст æмгустадæ кæндзæнæнцæ гуманитарон, промышленнон, гъæууонхæдзарадон æма æндæр къабæзти. Еци бадзурд исфедар  кæндзæнæнцæ аци анз бабæй Санкт-Петербурги арæзт ка ’рцæудзæнæй, еци дуйнеуон-экономикон форуми.

Нæ республики делегаци косæг балций адтæй æрæги Ленингради облæсти æ разамонæг Александр Дрозденкой хундæй. Фембæлди рæстæг Цæгат Иристони Сæргълæууæг Сергей Меняйло æ радзубандий куд фегъосун кодта, уотемæй нæ республикæ цæттæ ’й Ленингради облæсти хæццæ дувæрсуг бастдзийнæдтæ искæнунмæ. Еци гъуддаги ахсгиагдзийнади туххæй уотæ загъта:

– Уони фæрци нæ къохи бафтуйдзæнæй фулдæр нисантæ царди рауадзун. Советон доги рæстæг Цæгат Иристони зæрдæмæдзæугæ уавæри адтæй промышленность, бæлвурдæй – гъæуайкæнуйнадон кустадæ. Нуртæккæ еци кустуæтти фæзуæттæ ревæд æнцæ, Ленингради облæст æнхæст æй инвестицион фæрæзнитæй, е махæн ахсгиаг æй. Æма си гъæуама испайда кæнæн.

Александр Дрозденко дæр æ радзубандий баханхæ кодта:

– Гъæууон хæдзаради культуритæ, æхсири продукци уадзуни, халсарти кустади, æндæр къабæзти дæр æмгустади æнтæстгин райрæзтæн равгитæ уодзæнæй. Махмæ косуй Мультицентр, уой фæрци æнæнездзийнади цубургонд равналæнти хæццæ адæмæн ес равгитæ сæ царди хабæрттæ зæрдæмæдзæугæ хузи аразунæн.

Губернатор ма куд загъта, уотемæй хуарз уидæ, Цæгат Иристони исфæлдистадон коллективтæ сæмæ сæ бæрæгбони рæстæг ку  æрцæуиуонцæ, сæ арæхстдзийнадæ ку равдесиуонцæ, уæд.

Аци фембæлди фæдбæл фусунти æма иуазгути гъуди æмхузон адтæй: «Æмгустадæ нин пайдахæссæг исуодзæнæй!..» Цæгат Иристони Сæргълæууæг, делегаций иуонгтæ базонгæ ’нцæ Ленингради облæсти зундгонддæр кустуæтти хæццæ. Деденгутæ исæвардтонцæ Устур Фидибæстон  тугъди рæстæг геноцид баййафæг сабур цæрæг адæми Мемориали.

Цæгат Иристон-Аланий Сæргълæууæги æма Хецауади пресс-службæ