Сергей МЕНЯЙЛО æма Михаил МУРАШКОЙ разамундæй арæзт æмбурди.

Зундгонд куд æй, уотемæй Уæрæсей Федераций æнæнездзийнадæ гъæуайкæнуйнади министр Михаил Мурашко æрæги косæг балций хузи бабæрæг кодта Цæгат Иристон. Æма бæлвурдæй базонгæ ‘й, нæ республики цæргутæн медицинон агъаз гъомусгиндæрæй дæттуни фарстатæ куд æнхæстгонд цæунцæ, нерæнгæ си ци ес зæрдæмæдзæугæдзийнадæй æма ма си ци ес æнæмæнгæ райаразуйнаг. Еци фарстати фæдбæл цудæй дзубанди Михаил Мурашкойæн нæ республики Сæргълæууæг Сергей Меняйлой хæццæ ци фембæлд адтæй, уоми дæр.

Региони разамонæги хæццæ фембæлуни разæй федералон министр бабæрæг кодта къуар медицинон косæндони, се ‘хсæн – Цæгат Кавкази берæкъабазгин федералон центр Беслæни, уæдта бундорон цалцæггонди фæсте феврали ка байгон æй, Дзæуæгигъæуи еци цуппæрæймаг поликлиники фиццаг дæлхайадæ. Республикон клиникон сæйгæдонæ бабæрæг кæнгæй, комкоммæ базонгæ ‘й дадзинтти центр æма æртиккаг æмвæзади арæндони кусти хæццæ.

Бæлвурддæрæй дзубанди ба рауадæй, Хецауади хæдзари æнæнездзийнадæ гъæуайкæнуйнади актуалон фарстати фæдбæл арæзт сæрмагонд æмбурди. Разамунд ин лæвардтонцæ Сергей Меняйло æма Михаил Мурашко. Архайгæ ба си кодтонцæ æнæнездзийнадæ гъæуайкæнуйнади къабазæмæ цæстдарæг Федералон служби разамонæг Аллæ Самойлова, æнæмæнгæ медицинон фæдзæхстади Федералон фонди сæрдар Илья Баланин, Уæрæсей æнæнездзийнадæ гъæуайкæнуйнади Министради федералон уагæдæнтти дæлхайæдти минæвæрттæ Цæгат Иристони.

Михаил МУРАШКОЙ фембæлд нæ республики медицинон косæндæнтти косгути хæццæ.

Æмбурд байгон кæнгæй, Сергей Меняйло зæрдиагæй райарфæ кодта Михаил Мурашкойæн, æ разамундæй федералон ведомство нæ регионæн еудадзуг ке агъаз кæнуй уой туххæй, æма федарæй зæрдæ байвардта, еумæйаг хъауритæй республикон æнæнездзийнадæ гъæуайкæнуйнади системи архайд никки ке фæххуæздæр уодзæнæй æма республики алли цæрæгмæ дæр ке хъæртдзæнæй.

– Фæстаг æнзти нæ къохи бафтудæй медицинон косæндæнтти материалон-техникон  базæ фæффедардæр кæнун национ проекттæ æма федералон программитæ æнхæст кæнуни фæрци, – загъта Сергей Меняйло. – Мах нуриккон косæнгæрзтæй рауон-циуонæй ефтонг кæнæн поликлиникитæ, амбулаторитæ æма фельдшерон-акушерон пункттæ, устур æргом æздахæн медицинон къабази райдайæн цæги райрæзтмæ, уомæн æма республики алли цæрæги æнæнездзийнадæбæл дæр фиццаг кезуй етæ дæттунцæ дзуапп. Уæрæсей Федераций Президент æма дæу агъазæй мах абони райдæдтан аразун Республикон пульмонологон центр. Гъавæн нæуæгæй бундоронæй райаразун æма исаразун онкологон диспансер æма Мæздæги арæндонæ.

Æ радзубандий ма куд фегъосун кодта, уотемæй идарддæр дæр куст ке цæуй республики дзæбæхгæнæн уагæдæнттæ нуриккон медицинон техникæй исефтонг кæнунбæл, медикти фæлтæрддзийнадæ фæббæрзонддæр кæнунбæл, адæмæн нæуæг гъæугæ объекттæ аразунбæл.

Михаил Мурашко ба æ радзубандий куд баханхæ кодта, уотемæй абони æнæнездзийнадæ гъæуайкæнуйнади системи æййивддзийнæдтæ баст ке ‘нцæ, куд гъæугæ финансон фæрæзнити хæццæ, уотæ æндæр гъуддæгути хæццæ дæр, райдайæ раст диагностикæй, сæйгæмæ лæмбунæг цæстдард æма ин бæрзонд технологион агъаз раттунæй фæууо:

– Медицини райдайæн цæги модернизаций проект æнхæстгонд цæуй Уæрæсей Федераций Президент Владимир Путини фæдзæхстмæ гæсгæ, æма евгъуд æнзти региони æ еугур къæпхæнтæ дæр се ‘мгъудтæмæ конд æрцудæнцæ. Аци анз регион онкологон центрæн райсдзæнæй ефтонггæрзтæ радиофармацевтикон препарати агъазæй æртасæнтæ аразунæн. Нæ абони косæг балций рæстæг мах фæууидтан тагъд агъаз есæн модулон хайади арæзтадæн дехгонд ка ‘рцудæй, еци фæзуат. Е æй уæлрадон (экстренный) пациентти нуриккон хайадæ. Национ проект «Бийнонтæ»-йи фæлгæти нуртæккæ регионмæ æрбацудæй 180 миллион сомемæй фулдæрей аргъ ефтонггæрзтæ. Еци ефтонггæрзти фæрци дзæвгарæ фæббæрзонддæр æй нæуæгигурдтæн реанимацион агъаз раттуни æмвæзадæ. Фиццагидæр, ами фæззиндтæй сæ уолæфт син фæххуæздæр кæнуни мадзæлттæ. Сæйрагдæр ба – фæгъгъомусгиндæр æй акушерон агъаз, мадæ æма сувæллонмæ цæстдарæг нæуæг технологити фæрци. Куд фæууидтон, уотемæй персонал еци æгъдауæй æнтæстгинæй архайуй.

Фембæлди архайгутæ ма æрдзубанди кодтонцæ, Цæгат Иристони æнæнездзийнадæ гъæуайкæнуйнади къабази идарддæри ирæзти национ нисантæ, æнæмæнгæ медицинон фæдзæхстади территориалон программæ куд æнхæстгонд цæунцæ æма æндæр ахсгиаг фарстатæбæл.

Нæ республики æнæнездзийнадæ гъæуайкæнуйнади министр Митцити Астан радзурдта республики мæлуйнадæ фæмминкъийдæр кæнуни фæдбæл ци мадзæлттæ арæзт цæуй æма ма никкидæр арæзт цæудзæнæй, уобæл. Куд загъта, уотемæй абони регионалон Хецауади æмвæзадæбæл куст цæуй, цæмæй бунæттон хеунаффæйади администрацитæ адæми разæнгард кæнонцæ профилактикон мадзæлтти разæнгарддæрæй архайунмæ.

Куд нисангонд цæуй, уотемæй 2027 анзи федералон проект «Уæлрадон медицинон агъаз фæххуæздæр кæнун»-и фæлгæти Республикон клиникон сæйгæдони бундорбæл арæзт æрцæудзæнæй къуар мадзали: сæйгитæ есæн уати инфраструктурæ æнæгъæнæйдæр æййивд æрцæудзæнæй, уодзæнæй си нуриккон диагностикæгæнæн ефтонггæрзтæ, æма уой фæрци сæйгæн тагъд медицинон агъаз раттуни маршрут дзæвгарæ фæццубурдæр уодзæнæй, æ хуæрзгъæдæдзийнадæ ба – бæрзонддæр.