04 октября 2022

ÆНТÆСТГИН УО, БАТРАЗ!..

09.12.2020 | 13:31

Цæгат Иристони æрдзон фæрæзнитæ æма экологий министри ихæстæ рæстæгмæ æнхæстгæнæгæй нисангонд æрцудæй ХИДИРТИ Батраз. Уой фæдбæл сæрмагонд Указ бафинста Республикæ Цæгат Иристон-Аланий Сæргълæууæг БИТАРТИ Вячеслав 2020 анзи 7 декабри.

Еци бон министради ци æмбурд адтæй, уоми нæ республики Хецауади Сæрдар Тускъати Таймораз коллективи иуонгти базонгæ кодта ведомстви нæуæг разамонæги хæццæ.

Хидирти Алихани фурт Батраз райгурдæй Ирæфи райони Лескени гъæуи. Каст фæцæй Краснодари политехникон институт æма си райста инженер-технологи дæсниадæ. Куста берæ бæрнон бунæтти, уой хæццæ – аллихузон кустадон æма акционерон æхсæнæдти разамонæгæй. 2018-2020 æнзти адтæй Ирæфи райони муниципалон исконди сæргълæууæг.

Зæрдиагæй дин, Батраз, арфæ кæнæн дæ нæуæг бæрнон кусти фæдбæл. Агъазиау æнтæстдзийнæдтæй си баскъуæлхæ!.. Æнæмæнгæ уотæ ке уодзæнæй, е ба ни федарæй æруагæс кæнуй – нури уæнгæ кæмидæриддæр кустай, уоми дæ фæллойнæ фарнæхæссæг адтæй æма идарддæр дæр уотæ уæд!

 

Газет «Дигори» редакций коллектив