24 апреля 2024

ÆНТÆСТГИН УО ДÆ НÆУÆГ КУСТИ ДÆР!..

20.02.2024 | 12:34

ФИДАРАТИ Юрий нисангонд æрцудæй газет «Рæстдзинад»-и сæйраг редакторæй

Фидарати Астемури фурт Юрий райгурдæй 1961 анзи 23 августи Рахесфарси райони Зæронд Бæтæхъойгъæуи. 1983 анзи каст фæцæй Цæгат Иристони Хетæгкати Къостай номбæл паддзахадон университети филологон факультет. Берæ æнзти дæргъи фæккуста Цæгат Иристони республикон радиой. Цалдæр анзей дæргъи ба куста газет «Пульс Осетии» сæйраг редакторæй.

Фидарати Юрий æй республикæ Беларусь æма Цæгат Иристон-Аланий æскъуæлхт журналист.

Фидарати Юрий адтæй Цæгат Иристони Парламенти фæндзæймаг фæдздзурди депутат, æвзурст ба æрцудæй парти «Уæрæсей патриоттæ»-й. 2017 анзи ба нисангонд æрцудæй нæ республики мухури фæрæзнити æма дзиллон коммуникацити Комитети сæрдарæй, æма аци бæрнон бунати бакуста æрæги уæнгæ.

Фидарати Юрий газет «Рæстдзинад»-и  сæйраг редакторæй нисангонд ке ’рцудæй,  е æхцæуæн хабар æй, уомæн æма ни æруагæс кæнуй, æ нæуæг бæрнон кусти дæр æ размæ ивæрд æнтæстгинæй ке æнхæст кæндзæнæй, æ архайд хуæрзæрдæмæ ке фæббæрæг уодзæнæй куд газетæн æхебæл дæр, уотæ нæ национ журналистики райрæзтбæл дæр.

Мах дæр, республикон газет «Дигори» редакций коллектив, зæрдиагæй арфæ кæнун Фидарати Юрийæн. Нæ зæрдæ ин зæгъуй устур æнтæстдзийнæдтæ  æ нæуæг кусти дæр.