Уæрæсей Федераций арæзтадæ æма цæрæнуатон-коммуналон хæдзаради министри хуæдæййевæг Юрий Гордеев куд фæббæрæг кодта, уотемæй федералон программæ «Уæрæсей Федераций зæнхизмæлдтитæй тæссаг районти цæрæнуæтти, сæйраг объекттæ æма цардæн æнæмæнгæ гъæугæ системити федардзийнадæ фæббæрзонддæр кæнун»-и фæлгæти 2023 анзи Цæгат Кавкази федералон зилди æртæ регионеми исаразтонцæ æма бундоронæй райаразтонцæ цуппæрдæс объекти:

– Арæзт æрцудæнцæ, 960 бунати кæми ес, уæхæн аст рæвдауæндони, 320 бунатон скъола, дууæ спортивон объекти, фельдшерон-акушерон пункт, хъæрæу æма лæмæгъ ка уинуй, еци сабийти скъола-интернатæн уæлæнхасæн азгъунст. Еци гъуддæгутæ арæзт æрцудæнцæ Мæхъæли, Цæгат Иристони æма Цæцæни республикити.

Зæгъæн, Дзæуæгигъæуи Чкалови гъæунги еуæндæсæймаг скъолай æртæ азгъунсти иснæуæг кодтонцæ, райдайæн кълæстæн си исаразтонцæ нæуæг æртæуæладзугон азгъунст, еу азгъунст ба бундоронæй райаразтонцæ. Скъола байгон æй фарæ апърели мæйи.

Заводи поселокки арæзт æрцудæй 280 гъомбæлкæнуйнагей фагæ ка ’й, сувæллæнтти уæхæн рæвдауæндонæ – нуриккон дууæуæладзугон азгъунсти ес спортивон зал, бассейн, музыкалон ахуртæн сæрмагонд хатæн, тургъи ба ес сабийтæн гъазунæн æма тезгъо кæнунæн фæзуат.

Дууинсæй объекти арæзт æрцудæй Уæрæсей аст регионеми: Дагестани, Мæхъæли, Кæсæг-Балхъари, Хъæрæсе-Черкесий, Цæцæни республики, Камчатки крайи, Кемерови облæсти – Кузбасси. Уонæй æвддæс æма инсæй æнцæ кæрæй-кæронмæ нæуæг арæзт, æртæ ба – бундорон райарæзт.

Зæнхизмæлдтитæй тæссаг районти цæрæнуæтти федералон программи фæлгæти («Сейсмика») Уæрæсей Федераций арæзтадæ æма цæрæнуатон-коммуналон хæдзаради министрадæ мадзæлттæ аразуй 2018 анзæй фæстæмæ. Фондз анзей дæргъи си Уæрæсей регионтæй архайдта дууадæс. Еци рæстæгмæ регионти зæнхизмæлдтити нихмæ арæзтæдтæн æхцай фæрæзнитæ уагъд æрцудæй 118 объектемæн, уони нимæдзи – 52 скъолай, 35 рæвдауæндони, 16 цæрæн хæдзари, æнæнездзийнадæ гъæуайкæнуйнади 7 уагæдони, 4 культурон артдзæсти, 3 спортивон объекти æма 1 уагæдонæ. Эксплуатацимæ ист æрцудæй 88 объекти.

Аци хабæрттæ фегъосун кодта Цæгат Иристони Сæргълæууæги æма Хецауади пресс-службæ.