Ахури нæуæг анзи райдайæн æрбахæстæг æй, æма ниййергутæн хъæбæр сагъæссаг иссæй сæ ахурдзау  кæстæрти гъæугæ дзаумæуттæй исефтонг кæнуни гъуддаг. Куд бæрæггонд æрцудæй, уотемæй аци анз Цæгат Иристони еу скъоладзауи ахури анзи райдайæнмæ бацæттæ кæнуни туххæй ниййергути рæстæмбес нимадæй багъæудзæнæй исхарз кæнун 30 мин соми. Фари хæццæ рабаргæй, е æй фондз мин соми фулдæр.

Зæгъæн, кизгæн уæледарæс (пъолци кенæ сарафан/дæллаггурæ, блузкæ, пиджак/кардиган, туфлитæ) балхæнуни аргъ æй 13 мин соми. Биццеутæн уæхæн комплект (хæлаф, хæдонæ, пиджак, туфлитæ) балхæнун æнгъездзæнæй 13,5 мин сомемæй.

Физкультури уроктæн спортивон дарæси комплекти рæстæмбес аргъ æй 4,7 мин соми. Фал ма сæмæ кроссовкитæ ку бафтауæн, уæд еци нимæдзæ исирæздзæнæй 7,5 мин сомей уæнгæ.

Рюкзак кенæ ранеци рæстæмбес аргъ æй 3,9 мин соми. Уæдта зæрдæбæл дарун гъæуй, райдайæн кълæсти ахурдзаутæн сæ ранецти аргъ алкæддæр бæрзонддæр ке фæууй – 4,2 мин соми. 43 предмети кæми ес, уæхæн къæнцилари æмбурдгонд (набор) балхæнæн уодзæнæй 2,1 мин сомемæй уæлæмæ. Аци нимæдзтæ нимад æнцæ тæккæ ниллæгдæртæбæл. Æййевæн уæледарæс æма æндæр гъæугæ дзаумæуттæ нимайгæй, æцæг хæрзтæ 30 мин сомемæй дзæвгарæ бæрзонддæр уодзæнæнцæ.

Еугур еци æргъти хъазардзийнадæ ниййергутæн кæд хъæбæр тухстаг æй, уæддæр ибæл барæ-æнæбари арази кæнунцæ, уомæн æма син алцæмæй дæр хъазардæр æй сæ кæстæрти цийнæ æма зæрдрохсдзийнадæ.

Мах ба уой зæгъуйнаг ан, æма еугур ниййергутæ дæр сæ кæстæртæй зæрдрохс куд уонцæ, рæствæндаг син куд уонцæ!..