Нæ республики физикон культурæ æма спорти министрадæ анзи дæргъи бацæттæ кодта æма бæрзонд æмвæза-дæбæл исаразта 200 аллихузон турнири æма æндæр ериси. Спортуарзгутæ хуарз аргъ искодтонцæ, фехтованийæй Уæрæсей чемпионат æвзонг спортсменти ‘хсæн, Цæгат Кавкази федералон зилди чемпионат грекъаг-ромаг гъæбе-сæйхуæстæй, хоккейæй, мотокроссæй, рæуæг атлетикæ æма спорти æндæр хузтæй еристæ куд рацудæнцæ, уомæн.
Аци æма мæ берæ æндæр фарстати фæдбæл цудæй, Цæгат Иристони Хеца-уади Сæрдар ТУСКЪАТИ Тайморазæн æрæги нæ республики физикон культу-рæ æма спорти министр ХУГАТИ Алани хæццæ ци косæг фембæлд адтæй, уоми.

Фембӕлди архайгутӕ се ’ргом раздахтонцӕ, физикон культурӕ ӕма спорти райарӕзтӕн агъаз ка ‘й, еци сӕрмагонд программитӕ ӕма проекттӕ  ӕнхӕст кӕнуни фарстатӕмӕ.

Евгъуд анзи архайди бӕрӕггӕнӕнтӕбӕл дзоргӕй, Хугати Алан куд фӕннисан кодта, уотемӕй, коронавируси пандемий тӕвагӕй кӕд еугур  дуйне дӕр фегъӕстӕ ‘й, уӕддӕр анзи нисантӕ ӕнхӕстгонд ӕрцудӕнцӕ. Уотӕ, ӕ дзубандимӕ гӕсгӕ, Цӕгат Иристони спортсментӕ 2020 анзи алли ӕмвӕзади еристи рамулдтонцӕ 300 майданемӕй фулдӕр, спорти мастертӕмӕ кандидаттӕ иссӕнцӕ  180 адӕймаги, спорти мастертӕ – 40, дуйнеуон къласи спорти мастери ном ба райстонцӕ 17 адӕймаги.

Хугай-фурт куд фӕннисан кодта, уотемӕй министрадӕ сӕрмагонд ӕргом ‘здахуй, цӕмӕй, се ’нӕнездзийнадӕ цауд кӕмӕн ӕй, еци адӕмӕн дӕр хуӕздӕр фадуӕттӕ уа спорти алли хузти архайунӕн. Ӕма аци фӕсевӕд дӕр спорти ӕнтӕстдзийнӕдтӕ ӕвдесунцӕ – уӕлдай ирддӕрӕй сӕ арӕхстдзийнадӕ зиннуй уӕгъдебарӕ гъӕбесӕйхуӕсти, футболи, рӕуӕг атлетики, дзюдой, тенниси, накӕ кӕнуни, коляскитӕбӕл фехтованийӕй, тхэквондо ӕма спорти иннӕ хузтӕй. Еци ӕууӕл Хецауади Сӕрдар уӕлдай ахсгиагбӕл банимадта ӕма куд фӕннисан кодта, уотемӕй, се ’нӕнездзийнадӕ цауд кӕмӕн ӕй, еци адӕм, спорти алли хузти ӕнтӕстгинӕй архайгӕй, ӕвдесунцӕ уодуӕлдайдзийнадӕ ӕма бӕгъатӕрдзийнадӕ. Тускъай-фурт министради разамундӕн бабарӕ кодта, цӕмӕй аци къуари спортсменти уавӕрмӕ идарддӕр дӕр уа еудадзугон цӕстдард.

Дзубандий архайгутӕ хецӕнӕй ӕрдзурдтонцӕ республики физикон культурӕ ӕма спорти инфраструктури объектти идарддӕри райрӕзтбӕл. Сӕрмагонд программитӕ ӕма проектти фӕлгӕти нури уӕнгӕ берӕ куститӕ ӕрцудӕй конд. Зӕгъӕн, ахедгӕ мадзӕлттӕ арӕзт цӕуй федералон проект «Спорт – цардиуагӕ»-йи фӕлгӕти. Уотӕ, проекти уагӕвӕрдмӕ гӕсгӕ, балхӕдтонцӕ ӕма нури уӕнгӕ исӕвардтонцӕ «Фӕллойнӕ  ӕма гъӕуайкӕнуйнадӕмӕ  цӕттӕдзийнади» муниципалон центрти спортивон-технологон ефтонггӕрзтӕ (Кирови ӕма Дигори районти). Нури уӕнгӕ рахецӕн ӕй 11 берӕкъабазгин гъазӕн фӕзти арӕзтадӕ Алагири, Ӕрӕдони, Хумӕллӕги, Черноярски, Змейки, Мичурини, Камбилеевки, Даргъ-Къох ӕма иннӕ цӕрӕнбунӕтти». Уӕхӕн спортивон фӕзтӕ нуртӕккӕ арӕзт цӕунцӕ Црауи, Предгорныйи ӕма ӕндӕр бунӕтти. Дзӕуӕгигъӕуи кӕронмӕ фӕхъхъӕртуй кенӕ спортивон гъӕбесӕйхуӕсти центри арӕзтадӕ дӕр…

Хецауади Сӕрдар ӕма профилон министр се ’ргом раздахтонцӕ иристойнаг спортсментӕ сӕхе Олимпаг гъӕзтитӕмӕ куд цӕттӕ кӕнунцӕ, уомӕ дӕр. Хугай-фурт куд фӕннисан кодта, уотемӕй Токиой Олимпаг ӕма Паралимпаг гъӕзтитӕмӕ гъӕугӕ хузи бацӕттӕ кӕнунӕн спортсментӕн республики еугур гъӕугӕ фадуӕттӕ дӕр ес. Уой туххӕй министр республики разамундӕн райарфӕ кӕнгӕй, загъта: «Цӕгат Иристони спортивон организацитӕ сӕхебӕл еудадзугдӕр ӕнкъарунцӕ паддзахади ауодундзийнадӕ».

Тускъати Таймораз профилон министри бафарста, футболи академи «Алани» ӕ куст куд аразуй, уой туххӕй дӕр. Куд зонӕн, уотемӕй нуртӕккӕ еци академий ахур кӕнунцӕ футболмӕ ӕмхиц ка ‘й, еци 120 ӕригон биццеуи республики районтӕ ӕма Хонсар Иристонӕй. Санатори «Иристон»-мӕ хӕстӕг ка ӕрбунӕттон ӕй, еци академий бӕстихӕйтти гъомбӕладӕ ӕма спортивон ахурадӕн ес еугур фадуӕттӕ дӕр. Академий комплекс арӕзт ӕй дууӕ футболон фӕземӕй, гимнастикӕ, аэробикӕ ӕма тенниси залтӕй, фондзуӕладзугон бӕстихайӕй ӕма ӕндӕр гъӕугӕ дӕлхайӕдтӕй. Куд нисангонд цӕуй, уотемӕй аци анз академий исараздзӕнӕнцӕ бассейн ӕма тренажерти зал дӕр.

Фембӕлди архайгутӕ куд фӕббӕрӕг кодтонцӕ, уотемӕй байгон кӕнун гъӕуй, Иристони физикон культурӕ ӕма спорти еугур хабӕртти туххӕй дӕр лӕмбунӕг иформаци райсӕн кӕми уодзӕнӕй, уӕхӕн сӕрмагонд интернет-портал. Еци техникон фӕрӕзни иссерӕн уодзӕнӕй Цӕгат Иристони еугур спортивон объектти номхигъд, республикон ӕма муниципалон кусти фӕткӕ ӕма си циуавӕр секцитӕ ес, спортивон галауанти циуавӕр еристӕ цӕудзӕнӕй, еугур еци хабӕрттӕ.

Аци ӕма иннӕ хъӕппӕрестӕ ӕма проекттӕбӕл нур идарддӕр косдзӕнӕнцӕ министради минӕвӕрттӕ.

АРФИТӔ – ДЕЛЬФИЙАГ ГЪӔЗТИТИ ЛАУРЕАТТӔН

Нӕ республики Хецауади Сӕрдар Тускъати Таймораз ӕрӕги фембалдӕй ӕма зӕрдиагӕй райарфӕ кодта, Уӕрӕсей нӕудӕсӕймаг Дельфийаг гъӕзтити цӕгатиристойнаг фӕсевӕдӕй ка архайдта ӕма си зингӕ ӕнтӕстдзийнӕдтӕй ка фескъуӕлхтӕй, уони хӕццӕ.

Ке зӕгъун ӕй гъӕуй, коронавируси пандемий фудӕй исӕвзургӕ эпидемиологон уавӕртӕмӕ гӕсгӕ, аци анз еци гъӕзтити фулдӕр хай арӕзт ӕрцудӕнцӕ дистанцион фӕткӕмӕ гӕсгӕ. Цӕгат Иристони минӕвӕрттӕ си архайдтонцӕ фондз номинациеми ӕма си байахӕстонцӕ ӕхсӕз призон бунати (еу фиццаг бунат, ӕртӕ дуккаг бунати ӕма еу ӕртиккаг бунат, уомӕй уӕлдай, фестивали жюри Цӕгат Иристони минӕвӕрттӕн исаккаг кодта сӕрмагонд приз, патриотон гъомбӕладӕмӕ устур ӕргом ке раздахтонцӕ, уой туххӕй). Нӕкӕси, Дельфийаг гъӕзтити 1999 анзӕй фӕстӕмӕ архайгӕй нӕ республикӕ сугъзӕрийнӕ майдан нур фиццаг хатт райста.

Фестивали лауреатти хӕццӕ фембӕлди рӕстӕг Тускъай-фурт ӕ радзубандий сӕрмагондӕй баханхӕ кодта:

– Нуриккон Дельфийаг гъӕзтитӕ ирд ӕвдесӕн ӕнцӕ, дуйней адӕмти историон, гуманитарон ӕма культурон хӕзнатӕ ирӕзгӕ фӕлтӕрти ӕнгомдӕр ӕма гъомусгиндӕр ке кӕнунцӕ, уомӕн.

Уӕлдай ахсгиаг ӕй, аци гъӕзтитӕ ӕма иннӕ уӕхӕн фестивалти традицитӕ гъӕздугӕй-гъӕздугдӕр ке кӕнунцӕ, е. Куд уинӕн, уотемӕй рӕстӕги размӕцуди хӕццӕ фӕззиннуй аййевади нӕуӕг цӕмӕдессаг хузтӕ. Ӕма уонӕн дӕр урух над ес фестивалон программитӕмӕ. Цӕгат Иристони минӕвӕрттӕ рагӕй архайунцӕ Дельфийаг гъӕзтити. Фал нӕмӕ 1999 анзӕй фӕстӕмӕ «сугъзӕрийнӕ» призертӕ нӕбал адтӕй. Ӕма нури гъӕзтити Цӕгат Иристони минӕвӕртти къохи уӕхӕн ӕнтӕстдзийнадӕ ке бафтудӕй, уоми ирдӕй зиннуй фӕсевӕди гъуддӕгути фӕдбӕл Комитет ӕма хецауади иннӕ къабӕзти ӕнгом ӕма лӕмбунӕг ӕмархайд. Нӕ республики хӕццӕ комкоммӕ баст ӕнцӕ Дударати Вероники, Павел Лисициани, Гергити Валерийи ӕма культури иннӕ зундгонд архайгути нӕмттӕ, сӕ исфӕлдистадон ӕскъуӕлхтдзийнӕдтӕ. Ӕруагӕс ми кӕнуй, нӕ абони лауреаттӕн дӕр сӕ профессионалон архайди исонибон уӕхӕн ӕнтӕстгин ке уодзӕнӕй, е.

Лауреатти кой искӕнун дӕр ӕнгъезуй. Дельфийаг фӕсевӕдон гъӕзтити, «Адӕмон инструменттӕ», зӕгъгӕ, номинаций бронзӕ майдан райста Гуриати Руслан.

Гъӕзтити ӕвзестӕ майдантӕ ба исаккаг кодтонцӕ Дзӕуӕгигъӕуи Гергити Валерийи номбӕл аййевӕдти колледжи фӕндурдзӕгъдгути къуари иуонгтӕ Плити Ацӕмӕз, Тауитти Виталий ӕма Икъати Давидӕн, уӕдта Тедети Азӕмӕтӕн (сӕ еугур дӕр – номинаци «Адӕмон инструменттӕ»: фиццаг ӕртӕ биццеуи – къуарӕй цӕгъдгӕй, цуппӕрӕймаг ба – еунӕгӕй цӕгъдгӕй). Уонӕй уӕлдай ма ӕвзестӕ майдан райста Элинӕ Быкова дӕр («Аййев кӕсун»-и номинаций).

Дельфийаг гъӕзтити сугъзӕрийнӕ майдан ба рамулдта Сӕлбити Лианӕ (е дӕр – «Адӕмон инструменттӕ»-йи номинаций).

Аци фембӕлдтити кой уомӕ гӕсгӕ ракодтан, ӕма фӕстаг рӕстӕгути нӕ республики уӕлдай устур ӕргом ӕздӕхт цӕуй, цӕмӕй фӕсевӕдӕн равгитӕ уа аййевади ӕма спорти, уӕдта ӕндӕр исфӕлдистадон къабӕзти дӕр сӕ искурдиадӕ афойнадӕбӕл ӕма ӕнхӕстӕй раргом кӕнунӕн. Уой фӕдбӕл нӕ газети фӕстӕдӕр ма сӕрмагондӕй мухур кӕндзинан хецӕн ӕрмӕгутӕ.

ЦАЛЦӔГ КӔНУНЦӔ СПОРТИВОН ЗАЛТӔ

2021 анзи Цӕгат Иристони гъӕууон скъолати цалцӕггонд ӕрцӕудзӕнӕнцӕ 7 спортивон зали. Еци нисанӕн федералон ӕма республикон бюджеттӕй дехгонд ӕрцӕудзӕнӕй 31 миллион сомей бӕрцӕ. Еци куститӕ исӕнхӕст кӕндзӕнӕнцӕ фиццаградон национ проект «Ахурадӕ»-йи фӕлгӕти, сӕ нисан ӕй гъӕууон фӕсевӕдӕн физикон культурӕ ӕма спорти архайунӕн уӕлӕнхасӕн фадуӕттӕ исаразун.

Республики Ахурадӕ ӕма науки министради пресс-служби минӕвар куд фегъосун кодта, уотемӕй нури уӕнгӕ бӕлвурд ӕй, спортивон залтӕ кӕми цалцӕг кӕндзӕнӕнцӕ, еци ахурадон косӕндӕнтти номхигъд – Раздзоги, Павлодольски, Нӕуӕг Бӕтӕхъой гъӕуи, Црауи, Курттати, Берӕгъзӕнги ӕма Чиколай 3-аг скъола.

«Национ проектти уагӕвӕрди фӕрци идарддӕр дӕр косдзинан гъӕууон скъолати спортивон залтӕ фӕххуӕздӕр кӕнунбӕл, цӕмӕй физикон культурӕ ӕма спорти архайунӕн уа урухдӕр гӕнӕнтӕ. 2021 анзи цалцӕги пъланмӕ ци спортивон залтӕ бахастан, етӕ рагӕй базелуйнаг адтӕнцӕ. Ке зӕгъун ӕй гъӕуй, цалцӕги фӕсте залтӕ ефтонггонд ӕрцӕудзӕнӕнцӕ гъӕугӕ спортивон косӕнгӕрзтӕй», – радзурдта ахурадӕ ӕма науки министр Людмилӕ Башарина.