ДАУРАТИ Дамир, Цæгат Иристони адæмон финсæг

Малити Геуӕрги нин ӕностӕмӕ цитгийнаг ке ‘й ӕ исфӕлдистади уӕлтӕмӕнӕй, ӕ ӕгӕрон агъазиау хъиамӕттӕй нӕ национ аййевадон литератури райрӕзти сӕрбӕлтау, уобӕл дзубанди дӕр нӕййес, уӕдта уой туххӕй финст дӕр берӕ ӕрцудӕй. Фал уой хӕццӕ ба, ӕнӕмӕнгӕ, уой дӕр зӕгъун гъӕуй, ӕма дзиллӕн уӕлдай зӕрдтагон адтӕй ӕ хумӕтӕг адӕмондзийнадӕй, ӕ уодигъӕди лӕгдзийнӕдтӕй.

Ӕ еци лӕгдзийнӕдтӕн сӕ сӕйрагдӕр – адтӕй рӕстбӕлдзорӕг, ӕгириддӕр нӕ бухстӕй фӕливд адӕймӕгутӕн ӕма уони сайӕн миутӕн. Уомӕн бӕлвурд ӕвдесӕн ӕй, ӕхуӕдӕг уӕди революцион парти «Кермен»-и исаразгутӕй ӕма ӕ разамонгутӕй еу уогӕй, цӕйбӕрцӕдӕр рӕстӕги фӕсте ба си ӕнӕразвӕлгъауӕй рацудӕй. Ӕ рацуд ба уой фудӕй адтӕй, ӕма, еци парти ци зӕрдӕмӕдзӕугӕ нисанти фӕдбӕл арӕзт ӕрцудӕй, етӕ усхъуммитӕгонд цӕун байдӕдтонцӕ: кӕд ӕма еци партийӕн ӕ архайд фӕллойнӕгӕнӕг адӕми хиццагдӕр цардиуагӕ аразуни сӕрбӕлтау гъӕуама адтайдӕ, уӕд гъуддӕгутӕ уомӕ зелун байдӕдтонцӕ, берӕ цидӕртӕ сӕ фуддӕрӕн арӕзт цудӕнцӕ. Уой нихмӕ Малий-фурт гъӕддухӕй бӕргӕ дзурдта, фал имӕ игъосӕг нӕ фӕцӕй, ӕма уӕд ӕ кӕддӕри ӕмархайгути ‘хсӕнӕй рацудӕй, сумах хӕццӕ мин еумӕйагӕй нецибал ес, зӕгъгӕ.

Зӕгъайтӕ мин, нури доги хецаудзийнади бӕрзонд бунати бадгутӕй кӕмӕдӕрти разиндзӕнӕй Малий-фурти хузӕн уоди уӕхӕн хъаурӕ, ӕма ӕнӕраст миутӕ уингӕй, сӕ искунӕг кӕнунӕн неци мӕ бон ӕй, зӕгъгӕ, балӕдӕргӕй, хе фӕндонӕй рацӕудзӕнӕй ӕ еци «зӕрдтагон» бунатӕй…

Ӕхсӕнӕдон гъуддӕгутӕй ӕхе райеуварс кӕнгӕй, Малити Геуӕрги уоййадӕбӕл рандӕ ‘й Дигоргоммӕ ӕма уоми ӕнӕгъӕнӕй дӕр ӕхе иснивонд кодта е ‘мзӕнхонти ахуради гъуддагбӕл архайунӕн. Ӕма дин е ба ӕ иннӕ лӕгдзийнадӕ. Уомӕн ӕма, куд рохситауӕг, уотӕ ӕхемӕ ци ихӕс райста, уой исӕнхӕст кӕнун уӕди доги хъӕбӕр ахсгиаг адтӕй. Октябри революций размӕ (1909 анзи) ӕ уац «Финстӕг Иристонӕй», зӕгъгӕ, уоми уотӕ финста: «Нужны просвещенные общественные деятели, проникнутые святостью в призвание человека; нужны люди высокого закала, с пламенными духовными мечтами…»

Уӕхӕн адӕймӕгутӕ цӕмӕй фӕззиндтайдӕ, уобӕл ба архайун гъудӕй. Ӕма еци ихӕс ӕхемӕ райста Геуӕрги, фӕсевӕди разӕнгард кодта ахурмӕ. Ӕ номдзуд ӕмдзӕвгӕ «Федог»-и финста:

Рохсмӕ фӕсевӕд, тундзетӕ,
Рохсмӕ цӕуетӕ ӕнгом.
Нифс, лӕгдзийнадӕ уарзетӕ,
Скӕнтӕ муггагмӕ стур ном…

Ӕма Геуӕргийӕн, куд ӕй имисунцӕ, уотемӕй хъӕбӕр ӕхцӕуӕн уидӕ, ӕ гъомбӕлгӕнуйнӕгтӕй беретӕ ахурмӕ тулаваст ке разинниуонцӕ, е. Уонӕй еуей, Малити Солтани имисуйнӕгтӕ бакӕсуни равгӕ мин фӕцӕй. Ӕма е уотӕ дзурдта: «Мӕ гӕгъӕдитӕ балӕвардтон еу уӕлдӕр ахурадон бунатмӕ. Фӕлварӕнтӕ хуарз равардтон, ахур кӕнуни барӕ мин лӕвӕрд ӕрцудӕй. Еци ахурадон бунатӕй зӕрдрохсӕй рацудтӕн. Дзӕуӕгигъӕуи гъӕунги мӕбӕл фембалдӕй Малити Геуӕрги, мӕ къох мин райста, уӕдта мӕ бафарста, кӕцӕй цӕун, уобӕл. Мӕ хабӕрттӕ ин ракодтон, фӕлварӕнтӕ ке равардтон ӕма мӕ ахурмӕ ке райстонцӕ, уой туххӕй. Уӕлдӕр ахурмӕ бацӕун мин ке бантӕстӕй, е Геуӕргийӕн ӕхцӕуӕн адтӕй, райарфӕ мин кодта, уӕдта уотӕ дзоруй: «Ӕз ӕй зудтон, ахур кӕнунмӕ ке бацӕудзӕнӕ, уой…»

Зӕгъун гъӕуй уой дӕр, ӕма Геуӕргий уӕдиккон ахурдзаутӕй беретӕ, ӕцӕгӕйдӕр, устур ном искодтонцӕ сӕхецӕн дӕр ӕма нӕ Иристонӕн дӕр: иссӕнцӕ зундгонд партион-хӕдзарадон разамонгутӕ, ӕскъуӕлхт ӕфсӕддон архайгутӕ, искурдиадӕгин ахургӕндтӕ…

Геуӕрги ахургӕнӕгӕй куста Дзинагъай скъолай ӕма, сӕхемӕ син ахур кӕнуни равгитӕ ке нӕ адтӕй, уомӕ гӕсгӕ имӕ цудӕнцӕ иннӕ гъӕути сабийтӕ дӕр. Ка имӕ ахур кодта, етӕ куд имистонцӕ, уотемӕй ӕ ахурдзаути зӕрдӕмӕ хъӕбӕр цудӕй куд ахургӕнӕг: алли урок дӕр хъӕбӕр арӕхстӕй лӕвардта, ӕ амундтитӕ уоййасӕбӕл ӕнцон лӕдӕрӕн адтӕнцӕ, ӕма алли сабийи сӕрмӕ дӕр хизтӕнцӕ…

Малити Геуӕрги зӕрдтагон айдагъ ӕригӕнттӕн нӕ адтӕй, фал сӕ кари адӕмӕн дӕр – уомӕн ӕма, ку зӕгъун, дессаги адӕмуарзон адтӕй. Ӕхуӕдӕг тухст уавӕри уогӕй дӕр, ескӕмӕн фӕййагъаз кӕнун ӕ ихӕсбӕл нимадта. Сауӕнгӕ Сибири лагерти ку адтӕй ахӕсти, уӕддӕр ӕ уодиконди еци менеуӕг рабӕрӕг уидӕ. Уой фӕдбӕл дессаги хабар бакастӕн газет «Дигори». Цӕветтонгӕ, уоми ӕ хӕццӕ ахӕсти адтӕй се ‘рвадтӕлти лӕг Малити Тула, ӕма е ӕ имисуйнӕгти куд радзурдта, уотемӕй лагерти бадгути ‘хсӕн уӕхӕнттӕ дӕр адтӕй, кӕцитӕ ракъуар уиуонцӕ ӕма иннети ӕфхуӕрдтонцӕ, сӕ дзаумӕуттӕ ӕма син сӕ хуӕрдӕ байсиуонцӕ. Еухатт уонӕй кадӕр байста Геуӕргийӕн дӕр ӕ хуӕруйнаги хай. Уой базонгӕй, Тула ӕма е ‘мбӕлттӕ еци цъамари дзӕбӕх фӕннадтонцӕ, уӕдта сӕмӕ бавзистонцӕ, цӕмӕй еуцалдӕр бони ин ӕхе паекки ӕмбес куд дӕтта. Фал Геуӕрги уӕхӕн «тӕрхонбӕл» не ‘сарази ӕй, е ‘фхуӕрӕгӕн фӕттӕрегъӕд кодта ӕма загъта: «Ниххатир ин кӕнӕн, е уобӕл сагъӕс кӕнуй, кӕд фӕййервӕзидӕ, ӕ бийнонтӕмӕ раздӕхидӕ…»

Тула ма ӕримиста уӕхӕн цау дӕр. Кустӕй ӕрбацӕугӕй, дан, берӕ хӕттити Геуӕргий ӕрбаййафинӕ мӕтъӕлӕй ӕма ‘й ку бафӕрсинӕ, ци кӕнис, зӕгъгӕ, уӕд бахъонц кӕнидӕ: «Мӕнӕ бабӕй еу мӕгур лӕгӕн мӕ паекки ӕмбес равардтон, мӕлгӕ кодта ӕстонгӕй…» Тула ин бауайдзӕф кӕнидӕ, цӕмӕн уотӕ кӕнис, дӕхуӕдӕг исӕвди къахбӕл ку лӕууис, алке ӕхе фӕййервӕзунбӕл ку архайуй, уӕд ин Геуӕрги ба еци сабурӕй зӕгъидӕ: «Ӕ амонд кӕмӕн куд ӕй, уотӕ рауайдзӕнӕй. Ӕз мӕгур лӕги тухстӕй ку фӕууинон, уӕд ин нӕ фӕййагъаз кӕнун мӕ бон нӕй…»[1]

Гъе уӕхӕн зӕрдхӕлар адӕймаг адтӕй Малити Геуӕрги. Фал уоййасӕбӕл зӕрдтагон ци дзиллӕн адтӕй, уони ‘хсӕн разиндтӕй уӕхӕн саузӕрдитӕ, кӕцити илгъаг цъухдавӕнти фудӕй фесавдӕй… Ӕ уод раст уогӕй…

Малити Геуӕргий уодиконди туххӕй дзоргӕй ӕнӕ зӕгъӕн нӕййес, цӕйбӕрцӕбӕл цардуарзон адтӕй, уой дӕр. Кӕд цийфӕнди уӕлтӕмӕн гъуддӕгути фӕдбӕл архайдта, уӕддӕр ин ахсгиаг адтӕнцӕ хумӕтӕг зӕнхон хабӕрттӕ дӕр. Уомӕ гӕсгӕ афойнадӕбӕл бакодта бийнонти гъуддаг, исӕнтӕстӕй ин дессаги зӕнӕг. Цуппар кизги ӕма дууӕ биццеуи. Бӕргӕ цӕрунгъон бийнонтӕ иссӕнцӕ, фал син адзал ӕ сау пӕлӕз сӕ сӕрмӕ ӕритудта, сӕ амонди райдзастдзийнади рохсӕй сӕ фенӕхай кодта. Уӕддӕр Геуӕргий цардӕмбал Зӕрӕда уоййасӕбӕл хъаурӕгин разиндтӕй ӕма, ӕ сувӕллӕнтти фидӕ ӕвудӕй ахӕст ку ‘рцудӕй, уӕд дессаги хъаурӕ ӕма фӕразондзийнадӕ бавдиста, цийфӕнди гъезӕмӕрттӕ син ӕвзаргӕ кӕд рауадӕй, уӕддӕр ӕ цӕуӕти федауцӕй гъомбӕл кодта. Мади рӕвдудӕй гъӕуагӕ нӕ адтӕнцӕ, фал фидӕ фидӕ ‘й – хъӕбӕр ибӕл ӕрхун кодтонцӕ. Уой туххӕй ӕ фурт Васо – е дӕр иссӕй искурдиадӕгин поэт, гъулӕггагӕн, абони не ‘хсӕн нӕбал ӕй, рохсаг уӕд – е ‘мдзӕвгитӕй еуеми зӕрдхъурмӕй финста:

Ныххатыр мын кӕнут.
Зӕгъгӕ,
Бӕргӕ лӕгъстӕ кодтон, –
Никӕмӕ бахъардта
Мӕ тӕригъӕд.
Мӕ хъӕрмӕ
Мӕ фыд иунӕгӕй,
Мӕ фыд иунӕгӕй
Ратахт фӕдисы
Мӕрдты бӕстӕй.

Цидӕр адтӕй, уӕддӕр еци зин уавӕрти дӕр Зӕрӕда ӕма ӕ кӕстӕртӕ сӕ царди хабӕрттӕ кодтонцӕ. Сӕ фидӕ ба, кӕд сӕ фарсмӕ нӕ адтӕй, уӕддӕр син устур нифс адтӕй. Уомӕ гӕсгӕ уин ракӕнуйнаг дӕн еу рагон таурӕхъ – ӕвӕдзи ӕй фегъустайайтӕ…

Цӕветтонгӕ, еу лӕхъуӕн исфӕндӕ кодта балций фӕццӕун ӕма ӕ мади фӕрсуй:

– Фӕндаггагӕн мӕ хӕццӕ ци хӕссон?

– Дӕ фиди ном, дӕ фиди фарнӕ, – адтӕй мади дзуапп.

Ӕма лӕхъуӕн ӕ фиди ном, ӕ фиди фарни хӕццӕ ранӕхстӕр ӕй… Алли рауӕн дӕр ибӕл уомӕ гӕсгӕ ӕмбалдӕнцӕ ӕхцӕуӕнӕй.

Гъе уотӕ Малити Геуӕргий цӕуӕт дӕр сӕ мадӕ Зӕрӕдай рӕвдудӕй боз уогӕй сӕ карни нӕдтӕбӕл ранӕхстӕр ӕнцӕ сӕ фиди ном ӕма фарнӕй хайгин уогӕй. Ӕма кӕд берӕ рӕстӕгути кедӕрти хевасти фудӕй сӕ номдзуд фиди ном ӕма фарнӕ нидӕнгонд цудӕнцӕ, уӕддӕр сӕ фудмиутӕй неци рауадӕй – хумӕтӕг адӕмӕн Малити Геуӕрги алкӕддӕр цитгийнаг адтӕй. Ӕма уомӕн ӕ цӕуӕт дӕр исфедудтонцӕ адӕми ӕхсӕн сӕ цардиуаги арфиаг гъуддӕгутӕй.

Мӕ радзубандий кӕронбӕттӕни ба ма уой зӕгъуйнаг дӕн, ӕма абони кӕд нӕхецӕн ихӕсбӕл нимайӕн Милити Геуӕргий цитгин кӕнун, уӕд ӕй гъӕуама ӕнхӕст кӕнӕн уотид рӕсугъд дзубандитӕй нӕ, фал бӕлвурд гъӕугӕ гъуддӕгутӕй. Е кӕддӕр ӕ уацтӕй еуеми уотӕ финста: «Ӕ маддӕлон ӕвзаг зонгӕй ӕй дӕлдӕр ка фӕккӕнуй, уӕхӕнттӕн мӕ ӕрфӕндуй зӕгъун: «Ци бегарӕ дӕбӕл ес, дӕумӕ ка игъосуй, еци адӕмӕн ӕцӕгӕлон ӕвзагбӕл дзорун?..»

Ӕ еци загъд махӕн, нӕ маддӕлон ӕвзаг нин кӕд ӕцӕгӕйдӕр зӕрдтагон ӕй, уӕд гъӕуама исуа фӕдзӕхст, кӕций гъӕуама ӕнхӕст кӕнӕн. Нӕ бон куд ӕй ӕма нӕ равгитӕ куд амонунцӕ, уотӕ гъӕуама ӕновудӕй архайӕн, цӕмӕй нӕ маддӕлон ӕвзаг цӕра ӕма ирӕза, цӕмӕй, нӕ фӕсте ци фӕлтӕртӕ фӕззиндзӕнӕй, уонӕмӕ дӕр бахъӕрта ӕ уӕлтӕмон хузи ӕма уонӕн дӕр уа зӕрдтагон. Уотӕ ку нӕ кӕнӕн, уӕд нӕ исонибони кӕстӕртӕн нӕ фиддӕлтиккон нӕртон ӕвзаг ӕцӕгӕлон исуодзӕнӕй.

Гъе уомӕ гӕсгӕ ба гъӕуама нӕ уодӕй-уод кӕнӕн, цӕмӕй нӕ маддӕлон ӕвзаг цӕра ӕма ирӕза, дессагӕй дессагдӕр уадзимистӕй гъӕздугӕй-гъӕздугдӕр кӕна нӕ национ аййевадон литературӕ.

Нӕ еугурей уӕхӕн еузӕрдиуон архайд уодзӕнӕй тӕккӕ агъазиаудӕр зӕрдӕбӕлдарӕн Хетӕгкати Къостайӕн, Малити Геуӕргийӕн, нӕ культури иннӕ разагъди архайгутӕн.

         (Малити Тулай имисуйнæгтæ æнæгъæнæй кæсетæ 26-27-аг фæрстæбæл – Ред.).