КРЕМЛИ СЦЕНÆБÆЛ – ЦÆГАТ ИРИСТОНИ ОРКЕСТР

Кремли паддзахадон галауани æрæги арæзт æрцудæй агъазиау мадзал – Уæрæсей национ оркестрти концерт. Уордæмæ хунд адтæй Цæгат Иристони Гæздæнти Булати номбæл адæмон инструментти паддзахадон оркестр, æ разамонæг – Къумæриттати Тенгиз.

Национ оркестрти фестиваль арæзт æрцудæй фиццаг хатт, æма иссæй Уæрæсей адæмти национ культурон хæзнатæ еумæйагæй бавдесунæн алæмæти мадзал.  Аци аййевадон бæрæгбони архайдтонцæ нæ бæсти финддæс регионемæй æрбацæуæг исфæлдистадон коллективтæ: Белгородæй, Дзæуæгигъæуæй, Волгоградæй, Грознайæй, Калининградæй, Санкт-Петербургæй, Симферополæй, Уфайæй, Челябинскæй, Элистайæй, Якутскæй æма иннæ рауæнтæй. Бæсти сæйраг сценæбæл сæ дæсниадæ æвдистонцæ Уæрæсей зундгонддæр оркестртæ, райгъустæнцæ си уруссаг балалайки æма башкираг курайи, тæтæйраг думбра æма цæцæйнаг  пондари, хъалмухъаг домбра æма ирон далафæндури зæлтæ.

Кæронбæттæни ма уой зæгъун гъæуй, æма ауæхæн æнæмæнгæ гъæугæ исфæлдистадон мадзал нæ бæсти культури Министради агъазæй исаразта игъустгонд баянист, Уæрæсей адæмон артист Фридрих Липси номбæл хуæрзауодæн Фонд.

НÆ ИУАЗÆГ – НОМДЗУД «ГЖЕЛЬ»

Цæгат Иристони дзилли æ исфæлдистади хæццæ æрæги базонгæ кодта Уæрæсей кафти Паддзахадон академион театр «Гжель».

Хореограф Владимир Захаров 1988 анзи бундор кæмæн исæвардта, еци кафти ансамбль æ хуæздæр композицитæ равдиста, Дзæуæгигъæуи ин ци концерт адтæй, уой рæстæг.

Нæ иуазгутæн сæ бон бацæй кафти фæрци бавдесун хохлома, вологодаг нивæфтудтитæ, костромайаг æма иннæ уæрæсейаг рауæнти игъустгонд дессæгтæ. Номдзуд коллективæй Дзæуæгигъæумæ ци фараст æма дууинсæй артисти иссудæй, етæ адæмон армдзæфæй уæлдай равдистонцæ классикон уадзимистæ дæр.

Уæрæсей æскъуæлхт артист Дмитрий Толмасов куд радзурдта, уотемæй Цæгат Иристони фиццаг хатт нæ ‘нцæ. Æма хъæбæр бозæй загъта:

– Иуазæгуарзагæ адæм уæмæ цæруй. Махæн нæ ихæс æй фæсевæди Фидибæстæ уарзун æма ибæл æновуд унбæл æууæлти  гъомбæл кæнун. Кафт дæр æй, еци ахсгиаг гъуддагмæ агъазиау хай бахæссуни фæрæзнæ. Æма нин хъæбæр æхцæуæн æй, концерти рæстæг зали ирæзгæ фæлтæрти минæвæрттæй берæ ке адтæй, е.