Политикон парти «Еугонд Уæрæсе»-й хъæппæресæй æнхæстгонд æрцæу-дзæнæй проект «Историон номерæн». Æ сæйраг нисантæ ’нцæ: нæ Цитгин Уæлахези 80 анзи кадæн дзиллон мадзæлттæ исаразун, ветеранти аллихузон хуæрзауодæн гъуддæгутæй исбоц кæнун, нæ адæми намуси æма æндæр культурон-уодварнон табуйаг объекттæ гъæугæ хузи барæвдзитæ кæнун, кенæ нæуæгæй райаразун, нæ ирæзгæ фæлтæрти патриотон-гъомбæладон архайд фæййахедгæдæр кæнун.

Аци проекти нисангонд мадзæлтти æма сæ исæнхæст кæнуни туххæй фарстатæмæ æрæги æркастæнцæ сæрмагонд æмбурди, кæци арæзт æрцудæй Мæскуй Уæлахези Музейи. Уоми радзубанди кодта Уæрæсей историон æхсæнади сæрдар. Æма куд фегъосун кодта, уотемæй аци нин анз уæлдай табуйаг æй – бæрæггонд цæудзæнæй нæ Цитгин Уæлахези цуппаринсæй анзей бæрæгбон, уæдта анз æхуæдæг ба нимад цæуй Фидибæстæ гъæуайгæнæги Анзбæл. Аци дууæ ахсгиаг цауей нимайгæй, нæ бæсти гъæуама æнхæстгонд æрцæуа æртинсæй дзиллон мадзали (уонæмæ хаунцæ культурон объектти райарæзти инсæй агъазиау проектемæй фулдæр). Уой фæдбæл æ радзубандий уотæ баханхæ кодта:

– Украини неонацистон хецауади фудæй хъоргонд ка баййафта, еци Курски æма Белгороди облæстти, уæдта Уæрæсемæ нæуæгæй æрбацæуæг регионтæ Донецк æма Лугански Адæмон республикити, Запорожье æма Херсони облæстти культурон объекттæ ’нцæ  нæуæгæй исаразуйнаг, æма еци гъуддаг гъæуама цубур рæстæгмæ æнхæстгонд æрцæуа. Фарста нур уæлдай æнæмæнгæдæр  æвæруйнаг æй, уой дæр, музейтæ æма ковæндæнттæ райаразуйнаг ке ’нцæ, айдагъ уомæ гæсгæ нæ, фал ма дуйней дзиллæн нури киеваг хецауади фудракæндитæ дæр бавдесуйнаг ке ’нцæ, уомæ гæсгæ дæр. Курски облæсти сахар Суджий фæстæмæ цæугæй хуæрзæрæги украинаг æфсæддонтæ бунæттон бæстæзонæн музей ниддæрæн кодтонцæ. Уæхæн фудракæндтитæн иронхгæнæн нæййес.

Устур Фидибæстон тугъди ветерантæбæл зæрдиагæй ауодун æма нæ ирæзгæ фæлтæрти патриотон гъомбæладæ нимад æнцæ фиццагкезуй гъуддæгутæбæл. Аци анз партион проектмæ гæсгæ нæуæгæй арæзт æрцæудзæнæнцæ акцитæ «Ветеранмæ дзæнгæрæг», «Ветеранæн лæвар», «Ветерани хæдзари рази парад», «Георгий лентъæ», «Номерæн мудадзин цирагъ», æфсæддонти уæлмæрдтæ бафснайуни фæдбæл еугуруæрæсеуон зеу, лекцион проект «Уæд фæууæлахез ан, нур дæр фæууæлахез уодзинан!..», ахургæнæндæнтти музейти конкурс «Цæмæй ма феронх кæнай, уой туххæй зонун» æмæ æндæртæ.

Нисангонд мадзæлтти туххæй дзоргæй, парти «Еугонд Уæрæсе»-й генералон совети нимæрдар Владимир Якушев уотæ баханхæ кодта:

– Еугур Уæрæсей дæр æма къуар фæсæрайнаг бæстеми дæр 25 апърели ка рацæудзæнæй, еци дуйнеуон акци «Уæлахези диктант» æнæмæнгæ, нимад уодзæнæй Уæлахези Бони кадæн банхæсткæнуйнаг сæйраг цаутæй еуебæл. Проект «Историон номерæн»-и стратегион сессий дзамани ке бавдесонцæ, еци хуæздæр регионалон проекттæ рапарахатгæнæн ес нæ бæсти еугур рауæнти дæр.

Проекти фæдбæл ци стратегион сесси арæзт æрцудæй, уоми фондз секцийей кусти архайдтонцæ фондз æма цуппаринсæй регионемæй дæс æма æхсæзинсæй координатори æма æхсæнадон советти сæрдартæ. Лæмбунæг дзубанди си цудæй проекти сæйраг нисантæбæл – нæ бæгъатæрти нæмттæ исæносон кæнун, культурон бунти объекттæ багъæуай кæнун æма музейти ахедундзийнадæ фæууæлдæр кæнун æма æндæр ахсгиаг гъуддæгутæбæл.

Партион проектмæ федералон цæстæдарæг, партий центрон æнхæстгæнæг комитети разамонæг Александр Сидякини дзубандимæ гæсгæ, цуппаринсæй паддзахади ке рахай кæндзæнæнцæ, «Еугонд Уæрæсе», «Россотрудничество» æма фæсарæйнаг гъуддæгути министрадæ еумæйагæй ке архайунцæ еци фæсарæйнаг фæзти нимæдзæ фæффулдæр кæнунбæл. Фæзтæ регистрацигонд æрцудæнцæ тухи ведомствити, æнæнгъæлæги уавæрти министрадæ æма уæлдæр ахургæнæндæнтти. Диктант нæуæг регионти нæма финстонцæ, æма еци рауæнти æ ниффинсунæн фадуат исараздзæнæнцæ.

Стратегион сессий архайдта нæ республики минæвар, партион проект «Историон номерæн»-мæ регионалон цæстдарæг Фуад Кязымов. Æма е æ радзубандий уотæ фегъосун кодта:

– Æндæр регионтæй цæстдаргути хæццæ нæмæ пайдайаг дзубанди рауадæй. Партион проект нæ республики æнтæстгинæй æнхæстгонд цæмæй æрцæуа, уомæн зингæ агъаз фæууодзæнæй иннети фæлтæрддзийнадæ. Кузбасси, Ярославль æма Запорожьей облæстти минæвæрттæй ке базудтан, еци медесгун гъудитæй нæ кусти испайда кæндзинан. Цæгат Иристон парахаттæй æнхæстгонд цæуй проект «Историон номерæн». Ирæзгæ фæлтæри патриотон гъомбæладæ фæййахедгæдæр кæнуни нисанеуæгæй берæ акцитæ аразæн. Нуртæккæ нæ сæйрагдæр ихæс æй «Уæлахези диктант» ниффинсуни гъуддаг исаразун  æма Уæлахези Бон аккагæй исбæрæг кæнунмæ бацæттæ кæнун, архайæн, цæмæй фæсевæд æма сæрмагонд æфсæддон операций архайгутæй фулдæретæ се ’ргом раздахонцæ партион акцити разæнгардæй архайунмæ.

ХЕКЪИЛАТИ Маринæ