Цæгат Иристони Сæргълæууæг Сергей Меняйлой разамундæй ци алликъуæреуон аппаратон æмбурдтæ арæзт æрцæуй, уонæми аллихатт дæр каст æрцæуй рæстæги уавæртæмæ гæсгæ æнæмæнгæ райаразуйнаг фарстатæмæ. Мæнæ айразмæ ци кезуй æмбурд адтæй, уоми бабæй, куд иннæ хæттити дæр, уотæ æрдзубанди кодтонцæ нæ республики санитарон уавæрбæл. Цæрæнуатон-коммуналон хæдзаради, артаг æма энергетики министр Тамати Майрæни радзубанди адтæй, цæрæн æма æндæр рауæнтæй бугътæ раласуни ихæс æнхæст кæнун æхемæ ка райста, еци  регоператорти архайди фæдбæл. Уомæй уæлдай ма куд загъта, уотемæй коммуналон хæдзаради службитæ зуймон бæнтти косунмæ цæттæ ’нцæ.

Аци фарстатæ уæлдай ахсгиаг ке ’нцæ нæ цардиуаги, е бæлвурд æй нæ еугуремæн дæр. Уæлдай сагъæссаг ба исунцæ фæлладуадзæн бæнтти, хъæбæрдæр ба бæрæгбæнтти рæстæг. Æма Сергей Меняйло хумæтæги нæ бафæдзахста министрæн, цæмæй 25 декабрæй сауæнгæ Нæуæг анзи фæлладуадзæн бæнтти уæнгæ уæлдай лæмбунæгдæр нæ республики санитарон уавæрмæ цæстдаруни мадзæлттæ никки ахедгæдæр хузи арæзт цæуонцæ.

– Бугъи буни цæмæй ма фæууæн, уой туххæй рагацау регоператорти хæццæ уæ кусти фæткæ исаразетæ. Бауолæфун алкедæр фæндуй, фал уæ зæрдæбæл даретæ санитарон фарстатæ æнæмæнгæ æнхæст кæнуйнаг ке ’нцæ, уой. Уомæй уæлдай, нæуæг анзи национ проекттæ æма паддзахадон программити бундорбæл ци куститæ æнхæст кæндзинайтæ, е дæр нерæнгæ бæлвурд æма федаргонд ке нæма ’рцудæй, е дæр уи иронх ма уæд.

Æмбурди ма радзубанди кодта «Роспотребнадзор»-и цæгатиристойнаг управлений разамонæг Тибилти Александр, æма е куд фегъосун кодта, уотемæй хуæцгæ незтæ, грипп æма коронавируси фæззинд Цæгат Иристони, цæйбæрцæ ун æнгъезуй, тæссаг цæйбæрцæй нæй, уомæй уæлдæр не ’схизтæй. Абони уæнгæ гриппæй сæйæг адæми еунæг цау дæр бæрæггонд не ’рцудæй, фал коронавирусæй ка фæссæйгæ ’й, уæхæн адæймæгути нимæдзæ ба æй фараст æма дууинсæй.

Нæ республики æнæнездзийнадæ гъæуайкæнуйнади министр Тебиати Сосланæн ба æ радзубанди адтæй Тагъд агъази станций куст фæййахедгæдæр кæнуни фæдбæл анзи дæргъи министрадæн ци бантæстæй, уой туххæй. Тебий-фурт куд загъта, уотемæй абони аци медицинон къабази косуй тагъд агъази æхсæз æма æртинсæй бригади. Министрадæ ма исамал кодта тауæггури дæс æма æртинсæй редуктори, балхæдтонцæ гъæугæ ефтонггæрзтæ дæр.

– Национ проекти бундорбæл нæ республики алли районти байгон кодтан афтекти 82 пункти, анзи кæронмæ ма никкидæр дууæ искосдзæнæй, аци къуæре исараздзинан æмбурд æма исбæлвурд кæндзинан нæуæг анзи кусти пълан дæр, – загъта министр.

Нæ республики бюджети фæрæзнитæ национ проекттæ æма паддзахадон программитæбæл харзгонд куд цудæнцæ, уæдта адæмæн декабри мизд бафедуни туххæй адтæй æ радзубанди  финансти министри хуæдæййевæг Оксанæ Каровайæн. Сергей Меняйло ин бафæдзахста, цæмæй байархайуонцæ æма адæмæн æнæкъулумпитæй фист æрцæуа сæ декабри мизд.

Æмбурди ма дзубанди цудæй арæзтадон объекттæ æма культурон уодварнон рауæнти уавæрбæл дæр. Объекти арæзтадæ æма цалцæги æмгъудтæ бæрæг æнцæ. Уой туххæй Сергей Меняйло бафæдзахста, анзи кæронмæ æмгъуд кæмæн адтæй, уони æвæстеуатæй фæуун, иннети ба нæуæг анзи пъланмæ бахæссун.

Нузали аргъауæн нæ историй XII æноси культурон-историон хæзнати зингæдæр æма гъæуайкæнуйнагдæр объект æй. Æма си кæд цалдæр анзи размæ цалцæггæнæн куститæ цудæнцæ, уæддæр абони æ уавæр нивæбæл нæй. Цæгат Иристони культурон объекттæ æма историон циртдзæвæнтæ гъæуай кæнуни Комитетæн Сергей Меняйло бафæдзахста аци фарстамæ лæмбунæг æркæсун, архиепископи хæццæ бадзурд бафинсун æма цалцæггæнæн кустити туххæй хæрзтæн гъæугæ гæгъæдитæ бацæттæ кæнун.

Аппаратон æмбурди сæрмагондæй дзубанди цудæй, сабийтæн Нæуæг анзи бæрæгбон зæрдæмæдзæугæй исаразуни фæдбæл. Уой туххæй Сергей Меняйло загъта:

– Нæ республики еугур сувæллæнттæн дæр Метин Дада æма Метин Кизги нæуæганзон лæвæрттæ ракæнунбæл байархайун гъæуй. Фиццагидæр, сæрмагонд æфсæддон операций ка фæммард æй æма иннæ архайгути, æвæрæз бийнонтæ æма седзæр хæдзæртти сувæллæнттæй еунæг дæр иронхуати куд нæ байзайа, уотæ. Уомæй уæлдай син гъæуй бацæттæ кæнун аллихузон цæмæдесаг мадзæлттæ заз бæласи рази. Гъæууонхæдзарадон армукъатæн ба бунæттæ исбæлвурд кæнун.