Нӕ республики Сӕргълӕууӕг Сергей Меняйлойӕн ӕрӕги къабазадон хуӕлцади Институти президент Владимир Чернигов ӕма вице-президент Сергей Маслови хӕццӕ ци фембӕлд адтӕй, уоми сӕ сӕйрагдӕр дзубанди адтӕй скъоладзаути хуӕлцади фӕдбӕл. Е хъӕбӕр ахсгиаг фарста  ке ӕй ӕма ‘й тӕккӕ хуӕздӕр хузи райаразун ке гъӕуй, уомӕ гӕсгӕ ба баунаффӕ кодтонцӕ уобӕл бӕстондӕр ӕрдзубанди кӕнун. Ӕма рӕхги, 21 феврали Дзӕуӕгигъӕуи гъӕуама арӕзт ӕрцӕуа Уӕрӕсей Федераций Паддзахадон совети Къамиси скъоладзаути хуӕлцади райарӕзти косӕг къуари сӕрмагонд ӕмбурд. Ӕ исаразгутӕ куд нисан кӕнунцӕ, уотемӕй си гъӕуама архайуонцӕ Цӕгаткавказаг федералон округи еугур субъектти разамонгутӕ дӕр.

Аци ахсгиаг мадзал махмӕ арзӕт ке цӕуй, уой фӕдбӕл Владимир Чернигов уотӕ загъта:

– Мӕнмӕ гӕсгӕ, Цӕгат Иристони бон ӕй ӕ фӕлтӕрддзийнади туххӕй радзорун. Зӕгъӕн, фӕстаг рӕстӕг ниййергути хӕццӕ раййивтайтӕ скъолати меню, райдайӕн кълӕсти ахурдзаутӕн исфедар кодтайтӕ хуайраги еухузон аргъ.

Владимир Чернигов куд баханхӕ кодта, уотемӕй еци бон ма арӕзт ӕрцӕудзӕнӕй ӕхсӕнадӕмон социалон акци «Скъоладзаути ӕнӕнез хуайраг»-и регионалон хаййи мадзал дӕр. Сувӕллӕнттӕ гъӕуама байархайуонцӕ акций, бацӕттӕ кӕнонцӕ ӕнӕнез хуайраги уроктӕ, уони исесдзӕнӕнцӕ видеомӕ. Тӕккӕ хуӕздӕр видеоролик исаразӕгӕн фӕззиндзӕнӕй сувӕллӕнтти лагерь «Артек»-мӕ рандӕ уни барӕ. Гъӕуама Цӕгат Иристони сувӕллӕнттӕ дӕр ӕхцӕуӕнӕй еци гъуддаги байархайуонцӕ.

Владимир Чернигов ма бахаста фӕндӕ, цӕмӕй «Скъолай хуӕруйнаггӕнӕг», зӕгъгӕ, уӕлӕнхасӕн дӕсниадӕ чемпионат «WorldSkillsRussia»-мӕ хаст ӕрцӕуа. Ӕ гъудимӕ гӕсгӕ, сувӕллӕнттӕн хуӕруйнаг цӕттӕгӕнӕгмӕ гъӕуама уа бӕрзонд квалификаци:

– Уомӕн ӕ бӕрнондзийнадӕ ӕндӕр ӕй, гъӕуама сӕхе бафӕлваронцӕ, уӕлдӕр къӕпхӕнмӕ исхезонцӕ. Фарстабӕл косӕн Дзӕуӕгигъӕуи базарадон-экономикон техникуми хӕццӕ. Фӕсевӕди бон ба уодзӕнӕй регионалон чемпионати архайун, уӕлахездзау ба  рандӕ уодзӕнӕй федералон конкурсмӕ.

Республики Сӕргълӕууӕг исарази ‘й аци фӕндӕнтти хӕццӕ, еугур гъуддӕгути дӕр фӕййагъаз кӕнунӕй зӕрдӕ байвардта:

– Мах цӕттӕ ан институти экспертти хӕццӕ ахедгӕ кустмӕ. Аци анз нӕмӕ ӕнгъӕлмӕ кӕсуй вазуггин куст, ӕхцай фӕрӕзнитӕ нин Уӕрӕсей фондз регионей хӕццӕ радех кӕндзӕнӕнцӕ. Ахуради косӕндӕнттӕ бундоронӕй гъӕуама 2022-2023 ӕнзти исцалцӕг кӕнӕн. Нӕ проектти хӕццӕ федералон Хецауадӕ исарази ӕй. Гъӕуама 63 скъолайемӕ базелӕн, сувӕллӕнттӕн хуӕрзадӕ хуӕруйнаг кӕнунӕн си гъӕугӕ уавӕртӕ исаразӕн.