24 майя 2022

АРХАЙУНГЪОНДЗИЙНАДӔ – ӔНТӔСТГИН КУСТИ БУНДОР…

22.10.2021 | 17:21

Цӕгат Иристони Сӕргълӕууӕг Сергей МЕНЯЙЛОЙӔН  премьер-министр ДЗАНАЙТИ Бариси хӕццӕ ци косӕг фембӕлд адтӕй, уоми лӕмбунӕг дзубанди рауадӕй республики Хецауади нӕуӕг структури фӕдбӕл.

Куд зонӕн, уотемӕй Дзанайти Барис, республики Парламенти иуонгтӕй аразий дзуапп райсуни фӕсте, сӕрмагонд Указӕй Хецауади Сӕрдарӕй нисангонд ку ‘рцудӕй, уӕд ин Сергей Меняйло байхӕс кодта, цӕмӕй бацӕттӕ кӕна министрти кабинети нӕуӕг структури уагӕвӕрд. Ӕма нур еци фарстабӕл бӕлвурд дзубанди рауадӕй.

– Еу хатт ма ‘й зӕгъун: ду, куд Хецауади Сӕрдар, уотӕ дӕ республики хецаудзийнадӕ ӕнхӕстгӕнӕг оргӕни разамонӕг, – загъта Сергей Меняйло. – Хецауади структурӕ цӕйбӕрцӕ нивӕбӕл ӕма лӕмбунӕгдӕр арӕзт ӕрцӕуа, е ахсгиаг ӕй. Ка си косуй, уонӕй берӕ аразгӕ уодзӕнӕй аци структури гъомусгин ӕма ахедгӕ архайд. Ӕма еци гъуддагбӕл ду уодзӕнӕ комкоммӕ бӕрнон.

Республики разамонӕг куд фӕббӕрӕг кодта, уотемӕй республики Хецауади структурӕмӕ рӕстӕги аккаг ӕййивддзийнӕдтӕ бахӕссун гъӕуй. Уой хӕццӕ, рагагъоммӕ лӕмбунӕг бӕлвурдгонд гъӕуама ӕрцӕуонцӕ еугур ведомствити бартӕ ӕма ихӕстӕ дӕр. Ӕ радзубандий загъта:

– Рагацау куд бадзубанди кодтан, уотемӕй еуӕй-еу цӕстдарӕн оргӕнтӕ гъӕуама рахецӕн кӕнӕн министрадти искондӕй, уомӕн ӕма етӕ, сӕ бартӕ ӕнхӕст кӕнгӕй, гъӕуама уонцӕ хуӕдбарӕ, гъома, профилон ведомстви дӕлбарӕ ма уонцӕ. Уотӕ, къӕпхӕнгай бакосун гъӕуй еугур фарстатӕбӕл дӕр.

Фембӕлди рӕстӕг Дзанайти Барис ӕ радзубандий фӕббӕрӕг кодта Хецауади структурӕмӕ бахӕссуйнаг ӕййивддзийнӕдти проекти уагӕвӕрдтӕ. Хаст цӕуй фӕндон Хецауади Сӕрдар хуӕдӕййевгути нимӕдзӕ астей бӕсти уонцӕ  ӕхсӕз.

Уомӕй уӕлдай ма хаст ӕрцудӕй фӕндон, цӕмӕй нурӕй фӕстӕмӕ Хецауади исконди уа 14 министради, 7 комитети, 3 служби ӕма 4 управлений.

Уой фӕдбӕл Дзанайти Барис ӕ радзубандий уотӕ загъта:

– Куд зонӕн, уотемӕй раздӕр унаффӕ хаст ӕрцудӕй арӕзтадӕ ӕма архитектури ӕма цӕрӕнуатон-коммуналон хӕдзаради, артаг ӕма энергетики Министрадтӕ байеу кӕнуни туххӕй. Фал фӕстаг рӕстӕг еуӕй-еу къулумпидзийнӕдтӕ фӕззиндтӕй, фиццаградон национ проекттӕ ӕма сӕрмагонд федералон фӕлгӕти республики ци ахсгиаг социалон объекттӕ арӕзт цӕуй, уони цӕттӕдзийнади гъуддаги. Еци ӕууӕл лӕдӕргӕй, уавӕр фӕххуӕздӕр кӕнуни рӕстӕгмӕ дууӕ Министради еугонд нӕма ӕрцудӕнцӕ. Иннемӕй, архитектурӕ ӕма сахараразӕг Комитет нурӕй фӕстӕмӕ исуодзӕнӕй арӕзтадӕ ӕма архитектури Министради дӕлхайадӕ. Еци унаффи фӕрци арӕзтадӕ ӕма архитектурӕмӕ барӕдарӕг фарстатӕ нур уодзӕнӕнцӕ еу ведомстви бӕрни. Уомӕй уӕлдай, национ рахастдзийнӕдти фарстати фӕдбӕл Министради бундорбӕл арӕзт ӕрцӕудзӕнӕй национ политикӕ ӕма ӕндаггон бастдзийнӕдти фарстати фӕдбӕл Министрадӕ.

Уотӕ, къӕпхӕнгай, премьер-министр ӕрлӕудтӕй Хецауади структурӕмӕ ӕййивддзийнӕдтӕ бахӕссуни фӕдбӕл еугур фӕндӕнттӕбӕл дӕр. Еци хъӕппӕрестӕ хуарзбӕл банимайгӕй ӕма структурон ӕййивддзийнӕдти фӕдбӕл аразий дзуапп ратгӕй, Сергей Меняйло никкидӕр ма уӕлӕнхасӕн амунддзийнӕдтӕ равардта Хецауади Сӕрдарӕн.

Республики Хецауади структурӕмӕ ӕййивддзийнӕдтӕ бахӕссуни фӕдбӕл унаффӕ хӕстӕгдӕр рӕстӕг федаргонд ӕрцӕудзӕнӕй.