Советон доги хуарздзийнæдтæй еу е адтæй, æма идæрддзæф гъæутæй культури артдзæститæ исаразуни равгитæ алкæми кæд нæ адтæй, уæддæр уонæми цæрæг адæм культурон лæггæдтæй æнæхай нæ уиуонцæ. Еугур районти дæр уидæ сæрмагонд хуæдтолгитæ, кæцити худтонцæ автоклубтæ. Æма етæ бæлвурд æмгъудтæмæ гæсгæ еци гъæутæмæ цудæнцæ кинонивтæ æвдесунмæ, ахид сæ бабæрæг кæниуонцæ хуæдахур æма профессионалон артисттæ дæр. Еци арфиаг гъуддаг, гъулæггагæн, фехалдæй советон цардиуаги фехæлди хæццæ. Фал гъæугæ хъæбæр ке кæнуй нур дæр, е бæрæг æй. Æма æ иснæуæг кæнунбæл архайд хумæтæги нæ цæуй нуртæккæ дæр.

Цæгат Иристони Культури министради пресс-слубжæ куд фегъосун кодта, уотемæй Мæздæги æма Алагири районти рæхги фæззиндзæнæнцæ цæлхитæбæл культури искондтæ. Хуæдтолгитæ уодзæнæнцæ фургони хузæн, косæг уавæри ба гуфæй рауайдзæнæй дæлбазури хæццæ сценæ.

Хуæдтолгитæ ефтонггонд уодзæнæнцæ аудио- æма видеоаппаратурæй, уæдта сутки талингæ афони сцени хуæдбарæ рохскæнунадæй. Цæугæ автоклубтæн сæ бон уодзæнæй минкъий зинвадуат гъæутæмæ бацæун. Дууæ культурон трансформери балхæнунæн радех кодтонцæ 14 миллион соми.

Нæуæгдзийнади фæдбæл нæ республики культури министр Галазти Эдуард уотæ загъта:

– Мæйи æмгъудмæ мобилон автоклубтæ Мæздæги æма Алагири районти фæззиндзæнæнцæ. Нæ республики зинвадуат гъæутæй кæцидæрти культури стационарон косæндæнттæ исаразуни равгитæ нерæнгæ ке нæма ес, уомæ гæсгæ ба автоклубти фæрци си уавæр хуæрзæрдæмæ раййевдзæнæй, адæм ба дзиллон-культурон мадзæлттæмæ æхсицгонæй цæудзæнæнцæ.