Цӕгат Иристони Сӕргълӕууӕг Сергей Меняйлойӕн фембӕлд адтӕй, Украини, Донецки ӕма Лугански адӕмон республикити зӕнхӕбӕл сӕрмагонд ӕфсӕддон операций архайгӕй, ка фӕммард ӕй, еци фондз ӕфсӕддон службӕгӕнӕгей бийнонти хӕццӕ.

Республики Сӕргълӕууӕг бӕгъатӕрти хеуӕнттӕн тӕфирфӕс ракодта, федарӕй загъта уой дӕр, ӕма еци ӕхсаргин ӕфсӕддонтӕ, сӕрмагонд ӕфсӕддон мадзали нисанеуӕги ихӕстӕ бӕрнонӕй ӕнхӕст кӕнгӕй, ке равдистонцӕ ӕгӕрон агъазиау лӕгдзийнадӕ ӕма уодуӕлдайдзийнадӕ.

– Лӕдӕрун ӕй, уӕхӕн зианӕн бабухсунӕн уӕлдай федар уодигъӕдӕ ке гъӕуй, уой. Фал мах алкӕддӕр нӕ зӕрдӕбӕл дардзинан, сабурдзийнадӕ ӕма адӕми фӕрнугади сӕрбӕлтау ӕ цард ка иснивонд кодта, еци бӕгъатӕрти, – загъта Сергей Меняйло. – Уони цард ӕма тугъдон ӕскъуӕлхтдзийнӕдтӕ ӕностӕмӕ байзайдзӕнӕнцӕ нӕ адӕми зӕрдити, куд бӕгъатӕрдзийнади, Фидибӕстӕбӕл ӕновуддзийнади ӕма ӕфсӕддон ихӕсбӕл еузӕрдиуондзийнади ирд дӕнцӕ. Ӕма еци ӕдзард тугъдонтӕй ӕностӕмӕ ихӕсгин уогӕй, мах еудадзугдӕр уодзинан сӕ бийнонти фарсмӕ, сӕ царди фарстатӕй фӕккӕсуйнаг ци уа, уоми син, ци гӕнӕн ӕма амал уа, уомӕй берӕвӕрсуг агъаз кӕндзинан.

Сергей Меняйло республики фӕллойнӕ ӕма социалон ирӕзти министради разамундӕн байхӕс кодта, цӕмӕй аци бийнонтӕй алкӕбӕл дӕр исфедар кӕна сӕрмагонд социалон косӕги. Уой хӕццӕ ба ма бафӕдзахста, цӕмӕй бийнонти размӕ исӕвзургӕ ӕма ӕнӕмӕнгӕ лухкӕнуйнаг фарстатӕмӕ гъӕуама уа фиццаградон цӕстдард. Уомӕй уӕлдай, Цӕгат Иристони разамонӕги амунддзийнӕдтӕмӕ гӕсгӕ, ӕдзард тугъдонтӕ кӕми ахур кодтонцӕ, еци скъолати исараздзӕнӕнцӕ сӕ номерӕн рауӕнтӕ.

Ӕдзард бӕгъатӕр тугъдонти бийнонтӕн тӕфирфӕс ракодта Уӕрӕсей Национ ӕфсӕдти федералон служби Цӕгаткавказаг зилди командӕгӕнӕг, инӕлар-лейтенант Сергей Захаров дӕр. Ӕ радзубандий куд баханхӕ кодта, уотемӕй Цӕгат Иристони минӕвӕрттӕ сӕрмагонд операци раседунӕй фӕстӕмӕ алкӕддӕр адтӕнцӕ ӕфсӕдти фиццаг рӕнгъити.

Куд зонӕн, уотемӕй ӕфсӕддон операций архайгутӕ Уӕрӕсей Федераций Президенти Указӕй хуарзӕнхӕгонд ӕрцудӕнцӕ Бӕгъатӕрдзийнади ордентӕй (сӕ фӕсмӕрдӕ). Еци хуӕрзеуӕг Сергей Меняйло равардта сержанттӕ Мухтарти Аслӕнбеги, Сӕбанти Ӕхсӕртӕги, Дмитрий Феденкойи, Элшад Шахвердиев ӕма ефрейтор Дзукъати Хъазбеги бийнонтӕн.

Куд нисангонд цӕуй, уотемӕй Сергей Меняйлойӕн хӕстӕгдӕр рӕстӕг уӕхӕн фембӕлдтитӕ уодзӕнӕй иннӕ тугъдонти бийнонти хӕццӕ дӕр.

Республикӕ Цӕгат Иристон-Аланий Сӕргълӕууӕги ӕма Хецауади пресс-службӕ