Мæздæги райони 7-аг астæуккаг ахурадон скъолай æрæги кадгин уавæри байгон кодтонцæ Уæрæсей Бæгъатæр Карен ШИШКИНИ циртдзæвæн. Е фæммард æй хуæрзæригонæй, нæудæсанздзудæй.

Карен Владимири фурт Шишкин райгурдæй сахар Мæздæги 1975 анзи 14 июли. Ами каст фæцæй 7-аг астæуккаг еумæйагахурадон скъола, уæд имæ, 1993 анзи фæдздзурдтонцæ Уæрæсейаг æфсади рæнгъитæмæ. Е ’фсæддон ихæс æнхæст кодта Цæгат Кавкази æфсæддон зилди 693-аг гвардион мотоæхсæг полкки, кæци æрбунæттон æй Зæрæмæги. Аци полкки исконд 1994 анзи 1 феврали æндæр хузи райаразтонцæ æма иссæй Хонсар æфсæддон зилди 4-аг гвардион тугъдон базæ.

Не ’мзæнхон æфсæддон архайдта фиццаг цæцæйнаг тугъди 1994 анзи. Равдиста бæгъатæрдзийнадæ æма æхсарæ, Грозна байахæссунбæл сахари гъæунгти ци карз тугъдтитæ цудæй, уонæми. 1 январи тугъди рæстæг æ танк агъаз кодта мотоæхсæг хайæдтæн. Æзнæгтæ ин æ танк фехстонцæ, æма Карен уæззау цæф фæцæй. Фал уотемæй дæр æ нифс нæ расастæй, нæ ниууагъта æ тох бæгъатæр лæхъуæн. Æ сагъæстæ адтæнцæ æнæгъæнæй дæр е ’мбæлттæбæл, уонæбæл тухстæй. Бантæстæй ма ин æ саст хуæдтолгæ надæй еуварс ратæрун, цæмæй иннæ тугъдон хуæдтолгитæ ма хъор кодтайдæ, æма син размæ ’мпурсуни фадуат адтайдæ. Танк иссугъдæй. Карен уæззау цæфæй содзгæ танкæй куд рахизтæй, уотæ ибæл æзнаги снайпери нæмуг исæмбалдæй. Фескъудæй æ цард æригон тугъдонæн… Æфсæддон кадгин æгъдæуттæй ин фæстаг фæндараст зæгъгæй æй байвардтонцæ æ  райгурæн сахар Мæздæги.

Карен Шишкин сæрмагонд ихæс æнхæстгæнгæй алæмæти  бæгъатæрдзийнадæ ке равдиста, уой туххæй ин Уæрæсей Федераций Президенти Указæй 1995 анзи 15 майи аккаггонд  æрцудæй Уæрæсей Федераций Бæгъатæри ном (æ рамæлæти фæсте).

Æдзард æхсаргин тугъдонæн æ номерæн бюст байгон кæнуни фæдбæл кадгин æгъдаугонд бацæттæ кодтонцæ, Фидибæстæ гъæуайгæнгæй ка фæммард æй, уони бийнонти Еугуруæрæсеуон æхсæнадон организаций цæгатиристойнаг хайадæ æма Тугъдон æнсувæрадæ. Мадзали  архайдта Бæгъатæри  кæстæр æнсувæр Армен, тугъдон æзмæлдтити ветерантæ, дзилли æма сахари администраций минæвæрттæ,  4-аг æфсæддон бази æфсæддонтæ.

Карен ци скъолай ахур кодта, уой ахурдзаутæ сæхемæ  райстонцæ æ циртмæ ин зелуни ихæс æма ’й рæстзæрдæй æнхæст кæнунцæ – еудадзугдæр æй хуæрзæфснайд, алкæддæр ибæл æвæрд фæууй нæуæгтунд деденгути баст.

Нæ адæммæ хумæтæги нæййес уæхæн загъд: «Бæгъатæртæн мæлæт нæййес…» Æма æцæгæйдæр уотæ ке ’й, уомæн æвдесæн æй, нæ дзиллæ куд имисунцæ, нæ Фидибæсти сæрбæлтау æ цард ка иснивонд кодта, нæ еци æдзард бæгъатæрти, цитгинæй син куд æносон кæнунцæ сæ рохс нæмттæ. Æма Карен Шишкини рохс ном дæр æностæмæ цæрдзæнæй æ хеуæнтти, ка ’й зудта, уони æма æ тугъдон æмбæлтти зæрдити…

ХЪОЙБАЙТИ Галинæ