06 июля 2022

БÆРÆГБОНÆН – БÆРЗОНД ÆМВÆЗАДÆБÆЛ МАДЗÆЛТТÆ!..

10.06.2022 | 16:16

Зундгонд куд æй, уотемæй 2024 анзи Цæгат Иристони автономибæл æнхæст кæнуй сæдæ анзи. Уæрæсей разамунди фæндонæй еци агъазиау бæрæгбон гъæуама бæрæггонд æрцæуа бæрзонд паддзахадон æмвæзадæбæл. Уой фæдбæл арæзт æрцудæй сæрмагонд организацион комитет, кæций æрдигæй еудадзугон цæстдард цæуй бæрæгбонмæ цæттæ кæнуни фарстатæмæ.

Комитетæн æрæги ци æмбурд адтæй, уоми сæрдареуæг кодта нæ республики Сæргълæууæг Сергей Меняйло. Æма æ радзубандий уотæ баханхæ кодта:

– Юбилейæн ес устур ахедундзийнадæ, федералон æмвæзади дæр æй бæрæг кæндзæнæнцæ. Организацион комитет бацæттæ кодта сæйраг мадзæлтти пълантæ, æнхæст кæнун сæ райдайдзæнæнцæ 2024 анзи. Мах гъæуама алцидæр исаразæн, цæмæй гъуддæгутæ, афойнадæбæл æма тæккæ хуæздæр хузи æнхæстгонд æрцæуонцæ.

Бæрæгбони кадæн ци мадзæлттæ гъæуама арæзт æрцæуонцæ, уонæй уæлдай зингæдæр исуодзæнæнцæ Мæскуй нæ республики культури Бонтæ, зæрдæбæлдарæн продукций, национ æма юбилейон нисанти хæццæ нæ кустуæтти уагъд дзаумæутти равдист, «Фæстæмæ – 100 къахдзæфи», зæгъгæ, конкурс, фæсевæдон культурон-историон форум. Æдеугурæй финддæс искæнуйнаг гъуддаги.

Нæ республики культури министр Галазти Эдуард куд радзурдта, уотемæй бавналдтонцæ еу анзæй иннемæ рахезæг авд мадзали æнхæст кæнунмæ. Сæ еуетæ æнцæ информацион хабæрттæ игъосун кæнуни хæццæ, рохситауæн æма рауагъдади архайди хæццæ, сувæллæнтти исфæлдистади Галауани культурон бунтæ реставраци искæнуни хæццæ æма Алагири музей-парки комплексмæ базелуни хæццæ баст. Æмбурди ма дзурдтонцæ юбилейи кадæн зæрдæбæлдарæн æхца рауадзуни фарстабæл дæр. Республики Сæргълæууæг бафæдзахста оргкомитетæн, цæмæй хъæппæрестæ æрветонцæ мадзæлтти пъланмæ:

– Аци бæрæгбон нæ еугуремæн дæр ахсгиаг æй, ами ка нæ цæруй, етæ дæр ин гъæуама æ ахедундзийнадæ банкъаронцæ. Кадгин мадзæлттæ искæнун гъæуй бæрзонд æмвæзадæбæл.

ГАЗЕТ «ДИГОРÆ» – АЛЛИ БИЙНОНТÆН!

2022 АНЗИ ÆМБЕСÆН.
Æ РАФИНСУНИ АРГЪ АНЗИ ÆРДÆГÆН ÆЙ 323 СОМИ ÆМА 64 КЪАПЕККИ;

УÆЛБАРТÆМÆ ГÆСГÆ БА – 288 СОМИ ÆМА 96 КЪАПЕККИ.

ГАЗЕТ «ДИГОРÆ» РАФИНСУН ÆНГЪЕЗУЙ «УÆРÆСЕЙ ПОЧТИ» ЕУГУР ХАЙÆДТИ ДÆР, УÆДТА МУХУР УÆЙÆГÆНÆН КИОСКТИ ДÆР.