Уӕрӕсей Хецауади сӕрдари хуӕдӕййевӕг Александр НОВАК Цӕгат Иристонмӕ иссӕугӕй, фиццагидӕр бабӕрӕг кодта Мӕздӕги район. Республики Сӕргълӕууӕг Сергей МЕНЯЙЛО ӕма «Россети»-й генералон директор Андрей РЮМИНИ хӕццӕ архайдтонцӕ дӕлстанцӕ «Алани» байгон кӕнуни гъуддаги. Кадгин иуазгути хӕццӕ адтӕй Уӕрӕсей Федераций экономикон ирӕзти министри хуӕдӕййевӕг Сергей Назаров дӕр.

Александр Новак куд загъта, уотемӕй нуртӕккӕ Уӕрӕсей Хецауадӕ аразуй Цӕгат Кавкази ирӕзти экономикон хузӕ. «Нӕуӕг объекти арӕзтадӕ, фӕххуӕздӕр  кӕндзӕнӕнцӕ адӕми цард, регионти гъомус раргом  уодзӕнӕй. Нисангонд гъуддӕгутӕ цӕмӕй царди рацӕуонцӕ, уой туххӕй гъӕуама электрон инфраструктури ирӕзтбӕл байархайӕн. Абони ци объекттӕ игон кӕнӕн, етӕ, ӕнӕмӕнгӕ, исуодзӕнӕнцӕ сӕйраг, уони фӕрци Цӕгат Кавкази фагӕ фӕрӕзнитӕ фӕззиндзӕнӕй. Промышленность ӕма амалгъонади ирӕзтбӕл фӕббӕрӕг уодзӕнӕнцӕ», – бафеппайдта Александр Новак.

Региони ирӕзтӕн ахсгиаг объекти арӕзтади архайгутӕн Сергей Меняйло устур арфӕ ракодта. Ӕ дзубандимӕ гӕсгӕ, е айдагъ Цӕгат Иристони энергетикон хизӕг нӕ фӕгъгъомусгиндӕр кодта, фал еугур Цӕгат Кавкази дӕр. «Электрон фӕрӕзнитӕй ӕнхӕст ун махӕн ахсгиаг ӕй, нӕ хӕдзарадӕ модернизаци гъӕуагӕ ӕййафуй. Уони афойнадӕбӕл ӕнхӕст кӕнгӕй, нӕ инвестицион бакаст фӕббӕллеццагдӕр уодзӕнӕй. «Алани»-йи дӕлстанцӕ ке байгон ӕй, е дзорӕг ӕй нӕ идарддӕри ирӕзтбӕл», – фӕббӕрӕг кодта республики разамонӕг.

Андрей Рюмини дзубандимӕ гӕсгӕ, дӕлстанцӕ «Аланистон» ӕй бӕрзонд технологон объект,  ефтонггӕрзтӕ ‘нцӕ уӕрӕсейаг кустуӕтти уагъд. Дӕлстанций арӕзтадӕн багъудӕй 15,8 миллиард соми. «Еци фӕрӕзнитӕ си ке байвардтан, е раст ӕй, дзубанди цӕуй цуппар регионей социалон-экономикон ирӕзтбӕл. Цӕруй си 6 миллион адӕймагемӕй фулдӕр. Электрон тухӕ сӕмӕ дӕтдзинан раззагдӕр технологитӕмӕ гӕсгӕ», – бафеппайдта Андрей Рюмин.

Дӕлстанцӕ фӕууингӕй, специалисттӕ бафеппайдтонцӕ, гъуддӕгутӕ нимӕцон хузи ке цӕунцӕ, уой. Ӕдеугур си косуй 10 адӕймаги. Стъараполи крайи «Невинномысск»-и дӕлстанций гъомуси фӕрци электрон тухӕй бафсаддзӕнӕнцӕ Цӕгат Иристон, Дагестан, Мӕхъӕл ӕма Цӕцӕни республикитӕ. Сӕ фарсмӕ ци паддзахӕдтӕ ес, уордӕмӕ дӕр ӕй бадӕтдзӕнӕнцӕ.

Республикӕ Цӕгат Иристон-Аланий

Сӕргълӕууӕги ӕма хецауади пресс-службӕ.