Цæгат Кавкази федералон зилди Уæрæсей Президенти Æнхæстбаргин минæвар Юрий Чайки разамундæй ци урух æмбурд арæзт æрцудæй, уоми дзубанди цудæй берæсувæллонгин бийнонтæн уæлæнхасæн социалон агъазбæл, уæдта æндæр ахсгиаг фарстатæбæл. Видеобастдзийнади фæрци фембæлди архайдта нæ республики Сæргълæууæг Сергей Меняйло.

Æмбурди райдайæни Юрий Чайка куд фæббæрæг кодта, уотемæй нуриуæнгæ бæсти арæзт æрцудæй сувæллонгин бийнонтæн еугурвæрсуг паддзахадон агъази комплексон системæ. Еци бийнонтæн сæ царди уавæртæ фæррæуæгдæр кæнунæн агъаз æй «Берæсувæллонгин бийнонтæн уæлæнхасæн социалон агъази мадзæлтти туххæй» Уæрæсей Президенти Указ дæр.

– Махæн нæ еумæйаг ахсгиагдæр ихæс æй, цæмæй берæсувæллонгин бийнонтæ сæхебæл банкъаронцæ паддзахади еугурвæрсуг агъаз, цæмæй сæ царди фæрнугадæ гъомусгиндæр кæна. Æхцæуæнæй мæ фæббæрæг кæнун фæндуй, бæсти иннæ регионти хæццæ рабаргæй, фæстаг æнзти дæргъи еугуремæй фулдæр нæуæгигурдтæ фæууй нæ федералон зилди. Æма еци арфиаг фæззинд багъæуай кæнунæн аразун гъæуй бæстон ауодæн мадзæлттæ. Уомæн агъаз æнцæ, федералон хецаудзийнади æмвæзадæбæл ци ахедгæ унаффитæ хаст цæунцæ, етæ, – æ радзубандий фæббæрæг кодта Президенти минæвар.

Уæрæсей фæллойнæ æма социалон гъæуайкæнуйнади министри фиццаг хуæдæййевæг Ольгæ Баталина, æндæр федералон ведомствитæ æма Цæгат Кавкази регионти минæвæрттæ дзуаппон докладтæ искодтонцæ, берæсувæллонгин бийнонтæн агъази программитæ куд æнхæстгонд цæунцæ, уæдта регионалон хецаудзийнади æмвæзадæбæл аци къабази ци бунæттон проекттæбæл куст цæуй, уой туххæй.

Фарстай фæдбæл ци дзубанди рауадæй, уомæн хатдзæгтæ кæнгæй, Юрий Чайка куд бафеппайдта, уотемæй еугур федаргонд унаффитæ æма программитæ дæр гъæуама афойнадæбæл æма æнхæстæй цардмæ уагъд цæуонцæ.

Æмбурди архайгутæ сæрмагонд æргом раздахтонцæ æрдзон зингисервæзтитæ ма ’руадзуни мадзæлттæ иснисан кæнунмæ, донивулдтити рæстæгмæ цæттæдзийнади, уæдта æндæр вазуггин фарстатæмæ дæр. Аци гъуддæгутæмæ цæстдард фæллæмбунæгдæр кæнуни нисани хæццæ бæлвурд амунддзийнæдтæ лæвæрд æрцудæй «Ростехнадзор», æрдзæгъæуайгæнæн æма æндæр федералон, регионалон ведомствити разамонгутæн.

Сергей Меняйло æ радзубандий лæмбунæг æрлæудтæй, бони фæтки фарстати фæдбæл Цæгат Иристони ци архайд цæуй, уобæл.

 Цæгат Иристони Сæргълæууæги æма Хецауади пресс-службæ