Еу лæг, дан, иуазæгуати адтæй. Куд фæууй, уотæ зæрдæхцæуæнæй мийнасæ кодтонцæ, берæ цæйдæрти фæдбæл хабæрттæй сæ рæстæг евгъудæй. Уæд дин иуазæг æ фусуни ку бафæрсидæ:

– Сабийтæй ба дин ци ес?..

Е дæр ин, сабийтæ ба мин нæййес, зæгъгæ, дзуапп ку раттидæ. Раст еци рæстæг сæ размæ æрбауадæнцæ цалдæр сувæллони æма цæйдæр фæдбæл фусунмæ дзорунцæ: «Баба!.. Баба!..» Иуазæг ниддеси æй:

– Мадта атæ ба ка ’нцæ?

Фусун ин зæгъуй:

– Æма атæ сабийтæ ’нцæ?.. Атæ сайтæнттæ ’нцæ, сайтæнттæ!..

Еци лæг æ сувæллæнтти кæд сайтæнттæ исхудта, уæддæр уотæ ци гъæлæсиуагæй  загъта, уомæй ба бæрæг адтæй, етæ ин цæйбæрцæбæл æгæрон зардирай æнцæ, цæйбæрцæбæл боз æй, æгайтима ин ке ’нцæ, уомæй.

Сувæллон цæйбæрцæбæл адгин æма цийнæхæссæг æй, уой фæдбæл нин нæ рагфидтæлтæй берæ зундгин фæдзæхститæ байзадæй. Зæгъæн: «Сувæллонæй хуæздæр Хуцау неци ма исфæлдиста…», «Сувæллон цæстирохс æй…»

Бийнонтæ цæмæй, гæнæн æма амал ци ес, уомæй берæсувæллонгиндæр уонцæ, еци гъуддагмæ нæ нури ранимайæ-банимайæдзийнади рæстæгути бустæги æндæр хузи, гъулæггагæн, æнæнвæрсонæй каст цæуй.

Дзиллон цæстингас бæлвурдгæнæг Еугуруæрæсеуон центри æртасгутæ æрæги уой фæдбæл исаразтонцæ сæрмагонд æрфарст: алли кари уæрæсейæгти фарстонцæ, сæ гъудимæ гæсгæ нуриккон бийнонти гъæуама цал сувæллони уа. Æма сæ дзуæппити еумæйаг хатдзæгтæ рауадæнцæ мæнæ ауæхæн: бийнонти гъæуама уа æхсæз æма фулдæр сувæллони (уотæ гъуди кæнунцæ æрфарсти архайгути 2%), цуппар-фондз (8%), æртæ – (45%), дууæ (38%) еу – (2%). Бустæги деси ба е æфтауй, æма æрфарст адæмæй кадæртæ (5%) куд нимайунцæ, уотемæй син сувæллон гъæуама æгириддæр ма уа.

Кæронбæттæни ба уин уæ зæрдæбæл æрлæуун кæндзинан нæ рагфидтæлти еума зундгин загъд: «Сувæллони цъухæй фарнæ дзоруй!..» Æма мæнæ ке кой ракодтан, уæхæн æрфарст, зæгъæн, арæзт ку ’рцæуидæ сувæллæнттæн сæхе ’хсæн дæр, уæд уони гъуди ба, цума, циуавæр уидæ?..