Уӕгъдебарӕ гъӕбесӕйхуӕстӕй Европи чемпионат аци анз 27-30 мартъий цӕудзӕнӕй Венгрий сӕйраг сахар Будапешти.

Гъулӕггагӕн, Украини цаути фудӕй Уӕрӕсей богӕлттӕ Будапешти еристи нӕ архайдзӕнӕнцӕ. Уомӕ гӕсгӕ, Иристони богӕлттӕ нӕ бӕсти еугонд команди ка ‘й, уонӕн дӕр сӕ Будапештмӕ балци ӕййивд ӕрцудӕй.

Ке зӕгъун ӕй гъӕуй, е гъулӕг кӕсуй спортсментӕ ӕма сӕ еузӕрдиуон фарсхуӕцгутӕмӕ, фал уӕддӕр, Иристони спортуарзгутӕн кӕбӕл бацийнӕ кӕнонцӕ, е уодзӕнӕй. Гъуддаг ба уой медӕги ‘й, ӕма, Венгрий Европи чемпиони ном рамолунбӕл ка тох кӕндзӕнӕй, уони ‘хсӕн уодзӕнӕнцӕ авд ирон богали. Етӕ ерис кӕндзӕнӕнцӕ европаг ӕртӕ бӕстей номӕй.

Словакий спортивон кадӕ гъӕуай кӕндзӕнӕнцӕ: Салхъазанти Таймураз, Гулати Ӕхсарбег, Махъоти Барис ӕма Цӕкулати Батӕрбег. Сербий номӕй хуӕцдзӕнӕнцӕ Цӕболти Хетӕг ӕма Фриати Таймураз, Байцати Владислав ба горцъемӕ рацӕудзӕнӕй Венгрий номӕй.

Нӕ биццеутӕн нӕ зӕрдӕ зӕгъуй хуарз ӕнтӕстдзийнӕдтӕ. Сӕ идард балцийӕй нӕмӕ уӕлахездзаутӕй куд исӕздӕхонцӕ, е Хуцауи бафӕндӕ уӕд!