Рӕхги, 27 мартъий бӕрӕггонд цӕудзӕнӕй театри Ӕхсӕнадӕмон бон. Сӕ еци профессионалон бӕрӕгбонбӕл Ирон театри аййевадон коллектив ӕмбӕлуй нӕуӕг спектаклӕй «Нӕ фехъуыстон, ма зӕгъ». Ӕвӕргӕ ба ‘й никкодта театри аййевадон разамонӕг ӕма сӕйраг режиссер Цӕгат Иристони ӕма Кӕсӕг-Балхъари ӕскъуӕлхт артист Уалити Геуӕр. Уогӕ аци спектакль нӕуӕг исхонун ӕнгъезуй, аци театри сценӕбӕл нӕуӕгӕй ӕвӕрд ке ӕрцудӕй, айдагъдӕр уомӕ гӕсгӕ. Ӕндӕр ба…

– Зундгонд драматург Гаглойти Владимири финст пьесӕ «Нӕ фехъуыстон, ма зӕгъ»-мӕ гӕсгӕ спектакль Ирон театри сценӕбӕл фиццаг хатт ӕвӕрд ӕрцудӕй евгъуд ӕноси 80-аг ӕнзти, – зӕгъуй Уалити Геуӕр. – Ӕ сюжет ӕй хумӕтӕг. Фал ӕ бундори ӕвӕрд ес, лӕмбунӕгӕй расагъӕс кӕнун кӕбӕл гъӕуй, уӕхӕн гъуди. Кӕстӕрти рахастдзийнӕдтӕ сӕ хестӕрти хӕццӕ, сӕ уозӕлд ниййергутӕбӕл.

Аци спектакль айдагъ театрӕн ӕхе сценӕбӕл ӕвдист нӕ цӕудзӕнӕй, фал ма ‘й ласдзӕнӕнцӕ республики сахартӕ ӕма гъӕутӕмӕ дӕр. Хуарз ӕма уонӕми культури артдзӕстити спектакльтӕ ӕвдесунӕн ес аккаг фадуӕттӕ.

Спектакль «Нӕ фехъуыстон, ма зӕгъ»-и театри фиццаг хатт исӕвардта Уӕрӕсей Федераций аййевӕдти ӕскъуӕлхт архайӕг, искурдиадӕгин режиссер Цихити Мӕирбег. Ӕма си сӕйраг сорӕттӕй еу – Госӕхизи уӕд рагъазта Республикӕ Цӕгат Иристон-Аланий адӕмон артисткӕ Дзгойти Аллӕ.

– Нур дӕр мин аци спектакли сӕйраг архайгутӕй еу, Ладинкай фӕлгонц исаразуни барӕ ке равардтонцӕ, уой туххӕй хъӕбӕр арфӕ кӕнун ӕ режиссер Уалити Геуӕрӕн, – зӕгъуй Аллӕ. –  Мӕ размӕ ‘й рагъазта Уӕрӕсей Федераций ӕскъуӕлхт артисткӕ Уртати Верӕ. Дууинсӕй анзей размӕ ма аци спектакли гъазтонцӕ Советон Цӕдеси адӕмон артист Саламти Къола, Уӕрӕсей Федераций адӕмон ӕма ӕскъуӕлхт артисттӕ Годжицати Исахъ, Беккузарти Орзетӕ, Суанти Хъазбег, Медойти Светланӕ ӕма нӕ республики адӕмон артисткӕ Дзбойти Зоя. Спектакли архайд ӕма гъуди советон доги адтӕй акуталон. Нур ба ӕ гъуди никки вазуггиндӕр ӕй. Ӕма мӕ хъӕбӕр фӕндуй, цӕмӕй театрмӕ ӕрбацӕуайтӕ ӕма ‘й фӕууинайтӕ, фӕсмон нӕ фӕккӕндзинайтӕ.