Уӕхӕн хатдзӕгмӕ ӕрцудӕнцӕ, нӕ республики разамонӕг Сергей Меняйлойӕн федералон дзиллон хабархӕссӕг фӕрӕзнити минӕвӕртти хӕццӕ ци фембӕлд адтӕй, уой архайгутӕ.

Нӕ республики Сӕргълӕууӕг ӕма Хецауади пресс-службӕ куд игъосун кӕнуй, уотемӕй етӕ нӕмӕ иссудӕнцӕ Цӕгат-Кавказаг федералон зилди пресс-тури фӕлгӕти. Архайдтонцӕ си агентадӕ «ТАСС»-и, «Россия сегодня»-йи, «Интерфакс»-и, «Российская газета»-йи, «Лента»-йи, «Мир 24»-йи, «Вокруг света»-йи, «Вояж»-и, «Ок!»-йи, «Русский пионер» ӕма «Gis-Meteo»-й минӕвӕрттӕ.

Цӕгат Иристони хӕццӕ базонгӕ уни зӕрдтӕй иуазгутӕ бабӕрӕг кодтонцӕ Дзӕуӕгигъӕуи зундгонд туристон бунӕттӕ, равгӕ син фӕцӕй нӕ республики цӕрӕг адӕмихӕттити культурӕ ӕма традицити хӕццӕ бӕлвурддӕр базонгӕ унӕн.

Уони хӕццӕ фембӕлди рӕстӕг син Сергей Меняйло бӕлвурдӕй радзурдта республики социалон-экономикон райрӕзти хӕццӕ баст гъуддӕгути туххӕй. Уӕдта ма уой дӕр баханхӕ кодта, ӕма Цӕгат Кавкази цардарӕзт ӕма уавӕртӕ нӕ бӕсти ӕма фӕсарӕнти дзиллӕн раст ӕма ӕнхӕстӕй бавдесун хъӕбӕр ахсгиаг ке ‘й, уой. Уой фӕдбӕл уотӕ загъта:

– Цӕгат Кавкази республикитӕй алкедӕр ӕхердигонау рӕсугъд ӕй, алкӕми дӕр си цӕруй хуарз адӕм, дзӕбӕх ӕма цӕмӕдессаг ӕнцӕ сӕ фидтӕлтиккон ӕгъдӕуттӕ ӕма цардарӕзти фӕткитӕ. Ӕма сумах пресс-тури хузӕн мадзӕлттӕ ахсгиаг ӕнцӕ, цӕмӕй уе ‘рмӕгути цӕгат-кавказаг республикити хуарздзийнӕдти туххӕй зӕрдтагонӕй финсайтӕ. Уомӕй сӕмӕ иннӕ рауӕнти цӕрӕг адӕмти ӕргом ӕздахетӕ, зӕрдӕмӕдзӕугӕ син сӕ кӕнетӕ.  Фӕндуй  мӕ, цӕмӕй нӕ  республикӕмӕ айдагъ уацхӕсгути цӕстӕй ма ракӕсайтӕ, фал хумӕтӕг адӕми цӕстӕй. Уӕд фулдӕр хабӕрттӕ базондзинайтӕ. Абони нӕмӕ фулдӕр туристтӕ цӕун ке байдӕдта, е ба уобӕл  дзорӕг ӕй, ӕма бӕлццӕнттӕн Иристон раздӕр куд адтӕй, уотӕ бабӕй  цӕмӕдессаг иссӕй. Цӕмӕй еци гъӕугӕ гъуддаг изолдӕр ирӕза, уомӕн ба ма никки хуӕздӕр фадуӕттӕ ӕнӕмӕнгӕ искӕндзинан…

Дууӕ сахаттей бӕрцӕ дзубанди цудӕй туризми ирӕзтбӕл, инвестицион проекттӕ ӕнхӕст кӕнунбӕл. Республики Сӕргълӕууӕг дзуӕппитӕ равардта иуазгути фарстатӕн, ци арӕзт ӕрцудӕй, ци ма ес бакӕнуйнаг, уони туххӕй ӕрхаста бӕлвурд дӕнцитӕ. Сергей Меняйло куд радзурдта, уотемӕй 2024 анзи искосдзӕнӕй «Мамисон»-и туристон комплекс, фиццаг туристти си исиуазӕг кӕндзӕнӕнцӕ. Калаки гъӕуи кӕрони 2023 анзи фӕззиндзӕнӕй ауигъд дууӕ нади. Нерӕнгӕ бал рахецӕн ӕнцӕ конкурс исаразуни хӕццӕ баст гъуддӕгутӕ, иннӕ анз ба аразгутӕ бавналдзӕнӕнцӕ аразӕн куститӕмӕ. Исараздзӕнӕнцӕ 14,9 километрей дӕргъӕн хуӕнхон лыжитӕбӕл бурӕн над, алли категорий фусунуӕтти байгон кӕндзӕнӕнцӕ 700 бунати.

Цӕгат Кавкази федералон зилдбӕл цуппар бони  рахӕссӕг пресс-тур райдӕдта 10 ноябри. Фиццагидӕр бал ӕрцудӕнцӕ Цӕгат Иристонмӕ, идарддӕр рандӕ уодзӕнӕнцӕ Мӕхъӕлмӕ, Цӕцӕнмӕ, Дагестанмӕ. Аци балци исаразуни гъуддаги хъӕппӕрес равдиста Уӕрӕсей экономикон ирӕзти Министрадӕ ӕма агентадӕ «ТАСС». Ӕма аци мадзал гъӕуама фӕййагъаз уа Цӕгат-Кавказаг федералон зилди социалон-экономикон ирӕзт равдесунӕн, регионмӕ туристти ӕргом раздахунӕн.

Фембӕлди рӕстӕг ци фарстатӕбӕл цудӕй дзубанди, уони фӕдбӕл нӕ зӕрди ес хецӕн ӕрмӕгутӕ бацӕттӕ кӕнун  ӕма, куд нисан кӕнӕн, уотемӕй син бакӕсӕн уодзӕнӕй нӕ газети хӕстӕгдӕр номерти.