Цӕгат Иристони Сӕргълӕууӕги ихӕстӕ рӕстӕгмӕ ӕнхӕстгӕнӕг Сергей Меняйло архайдта, Уӕрӕсей Федераций Хецауади Сӕрдари хуӕдӕййевӕг Татьянӕ Голикова федералон ведомствитӕ ӕма регионти разамонгути хӕццӕ ци видеоконференци исаразта, уоми.

Ӕмбурди архайгутӕ ‘ркастӕнцӕ, коронавируси инфекци парахатдӕр кӕнунӕн регионти ӕмвӕзадӕбӕл ци санитарон гӕрӕнтӕ ӕвӕрд цӕуй, уӕдта, дзиллон вакцинаций мадзӕлттӕ куд ӕнхӕстгонд цӕунцӕ, уомӕ.

Цӕгат Иристони исӕвзургӕ эпидемиологон уавӕри туххӕй адтӕй ӕ радзубанди Сергей Меняйлойӕн. Республики разамонӕги дзубандимӕ гӕсгӕ, абони уӕнгӕ региони дзиллон вакцинаций мадзӕлтти архайдтонцӕ 113 мин адӕймагемӕй фулдӕр. Фиццаг къӕпхӕни республики байгон ӕнцӕ вакцинаций 12 стационарон пункти поликлиникитӕ ӕма ӕндӕр сӕрмагонд бунӕтти. Нуртӕккӕ ма уонӕмӕ никкидӕр бафтудӕй 47 уӕлӕнхасӕн бунати – фельдшерон-акушерон пункттӕ ӕма амбулаторитӕ. Уой хӕццӕ, федаргонд ӕрцудӕнцӕ вакцинацигӕнӕн 32 мобилон бригади.

Уомӕй уӕлдай, медицинон косгутӕ ӕма волонтертӕ рӕстӕгӕй-рӕстӕгмӕ рабалци кӕнунцӕ гъӕууон цӕрӕн бунӕттӕмӕ. Уоми, адӕми ӕнӕнездзийнади уавӕр исбӕрӕг кӕнунӕй уӕлдай, кӕнунцӕ лӕдӕрунгӕнӕн куст иммунизаций уагӕвӕрдти туххӕй дӕр. Сергей Меняйлойи дзубандимӕ гӕсгӕ, уӕлдай лӕмбунӕгдӕр цӕстдард ес рацӕргӕ адӕми уавӕрмӕ. Специалисттӕ хӕдзарӕй-хӕдзарӕмӕ ӕрзелунцӕ, 60 анземӕй фулдӕр кӕбӕл цӕуй, еци адӕмбӕл, ӕма син ӕрдзорунцӕ вакцинаций пайдай туххӕй.

Федералон агентадӕ «Роспотреб-надзор»-и разамонӕги хуӕдӕййевӕг Еленӕ Ежлова ӕ радзубандий сӕйраг ӕргом раздахта, федераций регионти цӕргутӕн коронавирус рабӕрӕг кӕнуни тесттӕ куд арӕзт цӕунцӕ, уомӕ. Агентади минӕвар куд фӕббӕрӕг кодта, уотемӕй Цӕгат Иристони фӕййахедгӕдӕр кӕнун гъӕуй тесттӕ ӕнхӕст кӕнуни фӕткӕ. Уӕхӕн мадзал фадуат ратдзӕнӕй, нези тӕвагӕ кӕмӕ бахъӕрдтӕй, фал ӕндаг бакастӕй базонӕн кӕмӕн нӕма ес, еци адӕймаги ӕнӕнездзийнади ӕцӕг уавӕр рагагъоммӕ рартасунӕн. Ӕма, адӕймагмӕ коронавирус райдайӕн къӕпхӕнбӕл ку исбӕрӕг уа, уӕд ӕй, ке зӕгъун ӕй гъӕуй, афойнадӕбӕл дзӕбӕх кӕнун дӕр райдайдзӕнӕнцӕ, уӕдта  незӕфтауӕгӕй ӕ бийнонтӕ ӕма зонгитӕ дӕр ӕдасдӕр уодзӕнӕнцӕ.

Еци ӕууӕлбӕл дзоргӕй, Сергей Меняйло куд фӕннисан кодта, уотемӕй адӕми хӕццӕ уӕхӕн куст цӕуй.

– Медицинон ӕма иннӕ профилон ведомствитӕ сӕ архайд уотӕ райаразтонцӕ, цӕмӕй адӕми рахаст вакцинаци ӕма хе гъӕуайкӕнуйнади иннӕ мадзӕлттӕмӕ фӕббӕрнондӕр уа. Зӕгъӕн, дохтирти мобилон къуӕрттӕ аци къуӕрей райдайӕнӕй фӕстӕмӕ еудадзугдӕр рабалци кӕнунцӕ гъӕууон районтӕмӕ. Уоми бунӕттон цӕргутӕн исаразунцӕ цӕстдарди мадзӕлттӕ. Адӕми ‘хсӕн кӕнунцӕ урух рохситауӕн-лӕдӕрунгӕнӕн куст дӕр, –бафеппайдта Цӕгат Иристони разамонӕг.

Видеоконференций архайгутӕ фӕббӕрӕг кодтонцӕ дзиллон вакцинаций мадзӕлттӕ фӕййахедгӕдӕр кӕнуни фӕдбӕл фӕндӕнттӕ.

Цӕгат Иристони Сӕргълӕууӕги ӕма Хецауади пресс-службӕ