28 майя 2022

ЦӔУГӔ МЕДИЦИНОН КОМПЛЕКСТӔ – ЦӔГАТ ИРИСТОНИ

21.08.2021 | 17:31

Хӕстӕгдӕр рӕстӕг Цӕгат Иристони косун райдайдзӕнӕнцӕ цӕугӕ медицинон комплекстӕ. Республики ӕдеугур уодзӕнӕй цӕлхитӕбӕл цуппар уӕхӕн поликлиники. Проект ӕнхӕстгонд цӕуй Сергей Меняйлой хъӕппӕресӕй.

Нури уӕнгӕ бал республикӕмӕ Устур Новгородӕй исхъӕрдтӕй фиццаг уӕхӕн поликлиникӕ. Дзӕуӕгигъӕуи Сӕребари фӕзи компани «ПМК-МЕДЭК»-и специалисттӕ фусунтӕн исаразтонцӕ медицинон комплекси презентаци, радзурдтонцӕ цӕугӕ поликлиники урух фадуӕтти туххӕй. Уотӕ, алли комплекси дӕр ес ӕртӕ сӕрмагонд хуӕдтолги. Уонӕй алкӕций дӕр ес гъӕугӕ техникӕй ефтонггонд медицинон къӕбинеттӕ.

Компаний минӕвӕрттӕ куд радзурдтонцӕ, уотемӕй уӕхӕн комплексти косдзӕнӕнцӕ терапевт, невролог, офтальмолог, гинеколог, уролог ӕма УЗИ-й специалист. Комплекси техникон фӕрӕзнити фӕрци аллихузон незтӕ рабӕрӕг кӕнӕн уодзӕнӕй сӕ райдайӕн къӕпхӕнбӕл. Еу бонмӕ уӕхӕн комплекси лӕггӕдтӕй испайда кӕнуни фадуат уодзӕнӕй 40 адӕймагемӕн.

Ӕнӕнездзийнадӕ гъӕуайкӕнуйнади министради куд фегъосун кодтонцӕ, уотемӕй хӕстӕгдӕр рӕстӕг республикӕмӕ иссӕудзӕнӕнцӕ никкидӕр ма ӕртӕ уӕхӕн медицинон комплекси. Уонӕн профилон ведомствӕ рагацау иснисан кӕндзӕнӕй рӕстӕгмӕ бунӕттӕ.

– Республики цӕргутӕн комплексти лӕггӕдтӕ уодзӕнӕнцӕ лӕвар. Куд нисангонд цӕуй, уотемӕй цӕугӕ поликлиникитӕ рӕстӕгӕй-рӕстӕгмӕ ӕрветдзинан идӕрддзӕф гъӕутӕмӕ дӕр, – фӕббӕрӕг кодта ӕнӕнездзийнадӕ гъӕуайкӕнуйнади министри ихӕстӕ рӕстӕгмӕ ӕнхӕстгӕнӕг Тебиати Сослан (къари – галеуӕрдигӕй).

Компани «ПМК-МЕДЭК»-и хецау Юрий Протасов (къари – рахесӕрдигӕй) сӕрмагондӕй байамудта, медицинон комплекстӕй еу сувӕллӕнттӕн нисангонд ке уодзӕнӕй, уой:

– Еци комплекстӕй ба еу ӕрбунӕттон уодзӕнӕй ахурадон косӕндӕнтти рази. Уордӕмӕ сувӕллӕнттӕн уодзӕнӕй сӕ ниййергути хӕццӕ ‘рбацӕуни фадуат. Ирӕзгӕ фӕлтӕрӕн си кӕндзӕнӕнцӕ диспансеризаций мадзӕлттӕ.

Зӕгъун гъӕуй, компани «ПМК-МЕДЭК» медицинон лӕггӕдти къабази 30 анземӕй фулдӕр ке косуй, уой дӕр. Абони уӕнгӕ компани уӕхӕн проекттӕ ӕнхӕст кӕнуй цалдӕр уӕрӕсейаг региони.