Республикæ Цæгат Иристон-Аланий Сæргълæууæги ихæстæ рæстæгмæ æнхæстгæнæг Сергей Меняйло архайдта Цæгат Кавкази федералон зилди идарддæри социалон-экономикон райрæзти фарстати фæдбæл федералон хецауадон къамиси радон æмбурди.

Æмбурд Уæрæсей Федераций Хецауади Сæрдар Михаил Мишустини разамундæй арæзт æрцудæй сахар Пятигорски.

Бони фæтки фарстати фæдбæл æмбурди дзубандий архайдтонцæ Уæрæсей Президенти Æнхæстбаргин минæвар Цæгат Кавкази федералон зилди Юрий Чайка, федералон зилди регионти сæргълæугутæ, федералон министрадтæ æма ведомствити бæрнон косгутæ.

Æмбурди райдайæни къамиси иуонгтæ фæннисан кодтонцæ, фиццаградон æргом ци лухкæнуйнаг фарстатæмæ раздахун гъæуй, уони. Радзубандигæнгутæ куд фæббæрæг кодтонцæ, уотемæй федералон зилди еугур регионти дæр тухстаг æнцæ æгустдзийнади бæрзонд къæпхæн, донæфсесадæ æма æндæр коммуналон лæггæдти цауд уавæр, уæдта æндæр уæхæн фарстатæ. Регионти минæвæртти игъосункæнуйнæгтæмæ гæсгæ, уæхæн уавæрти æригон фæлтæри зингæ хай хуæздæр цардагор цæуй æндæр бунæттæмæ…

Еци фарстатæ ралух кæнуни нисани хæццæ фембæлди архайгутæ бахастонцæ бæлвурд фæндæнттæ, сæ гъудитæ загътонцæ федаргонд программитæ æма хецæн инвестицион проектти туххæй. Специалисттæ куд фæббæрæг кодтонцæ, уотемæй, Цæгат Кавкази æрдзон æма æндæр уæхæн менеугутæ хинцгæй, райрæзти программитæ æма инвестицион проекттæ уæлдай пайдайагдæр исуодзæнæнцæ агропромышленнон комплекси, туризм æма иннæ къабæзти. Нæуæг цæмæдессаг проекттæ царди куд уагъд цæуонцæ, уотæ фулдæр кæндзæнæй хъалонфедæг кустуæтти нимæдзæ, бюджети гъомус уодзæнæй ахедгæдæр… Еци æууæлтæ ба, ке зæгъун æй гъæуй, агъаз уодзæнæнцæ, цæмæй инвестортæ фулдæр æргом æздахонцæ регионмæ.

– Нуртæккæ уæлдай вазуггиндæр æй, цæмæй Цæгат Кавкази федералон зилди регонти идарддæри социалон-экономикон райрæзтæн арæзт æрцæуа ахедгæ мадзæлттæ, экономикæ федардæр уа, цæмæй адæми царди æмвæзадæ хуæздæр кæна. Федералон зилди ци дæс миллион адæймаги цæруй, етæ гъæуама сæхебæл æнкъаронцæ паддзахади ауодундзийнадæ, гъæуама сæхе цæстæй уинонцæ, Кавкази уавæр хуæздæрæрдæмæ ке æййевуй, уой, – бафеппайдта Михаил Мишустин.

Цæгат Кавкази федералон зилди регионтæн хæстæгдæр рæстæг циуавæр агъаз лæвæрд цæудзæнæй, уой туххæй адтæнцæ сæ радзубандитæ федералон ведомствити минæвæрттæн.

Уотæ, Уæрæсей экономикон ирæзти министр Михаил Решетников куд фæннисан кодта, уотемæй регионти æмвæзадæбæл тагъд рæстæги арæзт æрцæудзæнæнцæ сæрмагонд промышленнон фæзитæ. Уони бундорбæл косдзæнæнцæ минкъий æма рæстæмбес амалгъонади райрæзтæн агъазгæнæг еугур структуритæ дæр. Ведомстви разамонæги загъдмæ гæсгæ, министрадæ Цæгат Кавкази федералон зилди æнхæстгæнæг хецауади оргæнти хæццæ бакосдзæнæй райрæзти æндæр программитæбæл дæр.

Федералон ведомствитæ æма зилди регионти разамонгути докладтæн хатдзæгтæ искодта Михаил Мишустин. Хецауади Сæрдар бæлвурд амунддзийнæдтæ равардта министрадтæ æма ведомствити бæрнон косгутæн, æмбурди дзубанди ци фарстатæбæл цудæй, уонæбæл идарддæр бакосуни нисани хæццæ.

Фæстæдæр Михаил Мишустинæн сæрмагонд фембæлд адтæй Сергей Меняйлой хæццæ. Региони разамонæг Хецауади Сæрдари æргом раздахта цалдæр цæмæдессаг инвестицион проекттемæ. Сергей Меняйлой загъдмæ гæсгæ, проекттæ царди рауадзунæн гъæуй федералон Хецауади агъаз.

Михаил Мишустин зæрдæ байвардта, æмбурди бони фæткæмæ хаст фарстатæмæ сæрмагонд цæстдард уодзæнæй федералон Хецауади ’рдигæй. Уæрæсей Федераций премьер-министр бахаста бæлвурд фæндитæ регионти экономикон архайд фæййахедгæдæр кæнуни нисани хæццæ.

Цæгат Иристони разамонæг сæрмагондæй фæббæрæг кодта, республики социалон-экономикон ирæзти фарстатæмæ федералон Хецауади ’рдигæй лæмбунæг каст ке цæуй, уой.

– Нæ республики ахсгиагдæр проекттæ æма иннæ экономикон хъæппæрестæ æнхæст кæнуни гъуддаги, махæн алкæддæр ахсгиаг æй Уæрæсей Федераций Экономикон ирæзти министрадæ æма иннæ ведомствити еугурвæрсуг агъаз, – бафеппайдта Сергей Меняйло.

Уой туххæй фегъосун кодта Республикæ Цæгат Иристон-Аланий Сæргълæууæги æма Хецауади пресс-службæ.