25 июля 2024

ЦÆРÆ ÆМА ЗÆРДИРАЙ УО, НÆ КУРУХОН ÆНСУВÆР!..

18.03.2023 | 20:47

Сæдæ анзей размæ (1923 анзи 13 мартъий) дуйней рохс фæууидта газет «Рæстдзинад».

Фæндараст, «Рæстдзинад»! Фæцæуыс ныр махæй,
Фæхæссыс нæ хъæутæм нæ сагъæс, нæ мæт.
Нæ хæххон адæмæн, – фæллойы адæмæн, –
Кæронæй-кæронмæ нæ бæстыл фæхæт.

 Æркæс ын йæ цардмæ, æркæс ын йæ низтæм,
Æркæс ын йæ тыхстмæ хæрзарæхст лæгау.
Йæ царды фыдбонтæ, йæ низы рыстытæ
Нæ бæстæй дæ кастæй фæлидзæнт фынау.

Аци æмдзæвгæ мухургонд æрцудæй газети фиццаг номери. Æма си ци фæдзæхститæ ес, уони сæдæ анзей дæргъи æ редакций коллективи фæлтæртæ сæ исфæлдистадон хъазауатæй æнтæстгинæй æнхæст кодтонцæ æма нерæнгæ дæр æнхæст кæнунцæ. Уобæл дæргъвæтийнæй нæ дзордзинан, уомæн æма уотемæй дæр хабæрттæ хуарз зундгонд æнцæ, нæ дзиллæн.

Газет «Рæстдзинад»-и редакций коллектив сæ юбилейи фæдбæл райста берæ зæрдтагон арфитæ. Нифсдæттæг арфитæ син ракодтонцæ Цæгат Иристони Сæргълæууæг Сергей Меняйло, Парламенти Сæрдар Тускъати Таймораз, республики Сæргълæууæг æма Хецауади Администраций разамонæг Гобети Ибрагим, Уæрæсей Федералон Æмбурди Федераций Совети иуонг Мамсурати Таймораз, дзиллон хабархæссæг фæрæзнити æма мухури гъуддæгути фæдбæл Комитети сæрдар Фидарати Юри æма æндæр бæрнон косгутæ…

Уони арфити хæццæ æмзæрдæ уогæй, газет «Рæстдзинад»-и редакций нури коллективæн мах дæр, газет «Дигори» редакций косгутæ, уой ма зæгъуйнаг ан, цæмæй нифсхаст уонцæ, сæ газети кадæ æма намус агъазиудæр кæнун син куд æнтæса!..