19 майя 2024

ЦÆУНЦÆ НÆ ТУГЪДОНТÆ ХЪАЗАУАТОН ГЪУДДАГИ…

08.10.2022 | 14:57

Нæ бæсти Президент хайон мобилизаций фæдбæл унаффæ ку рахаста, уæд Уæрæсей алли регионтæй дæр тугъдгъон фæсевæди къуæрттæ цæун райдæдтонцæ, Украини нур ци сæрмагонд тугъдон операци цæуй, уордæмæ. Се ‘фсæддон ихæс æнхæст кæнунмæ.

Уотæ Цæгат Иристонæй дæр æрæги бабæй ранæхстæр æй еума къуар – æртæсæдæ адæймаги. Уонæй 160 иристойнаг  лæхъуæнтæ, иннетæ ба Дагестан æма Мæхъæлæй. Æфсæддон хай поселок Спутникæй сæ рафæндараст кодтонцæ сæ ниййергутæ, хеуæнттæ æма зонгитæ. Бæгъатæр фæсевæди рафæндараст кæнунмæ æрбацудæй нæ республики Сæргълæууæг Сергей Меняйло. Æригон тугъдонти, æфсæддон æгъдаумæ гæсгæ, рæнгъæй æрлæуун кодтонцæ 19-аг мотоæхсæг дивизий фæзи. Тугъд тугъд æй. Цийни гъуддаг нæй, фал æфсæддон рæнгъи сæхе игъæлдзæгхуз дардтонцæ – уомæй, æвæдзи, зæрдитæ æвардтонцæ, ка сæ фæндараст кодта, уонæн, гъома, мацæбæл тухсетæ, тагъд уæмæ сæрæгасæй æма уæлахезонæй зиндзинан, зæгъгæ.

Хуæрзконд æма гурведауцæ тугъдонтæн нæ республики Сæргълæууæг сæрустурæй загъта:

– Сумах айтæ, бæгъатæрдзийнадæ ке дадзинтти æхседуй, уæхæн фæсевæд. Нæлгоймаги ихæс айдагъ хæдзарæ исаразун æма бийнонтæ дарун нæй, фал ма Фидибæстæ гъæуай кæнун дæр. Кæддæр уæ хестæртæ æнгомæй кæрæдзей фарсмæ æрбалæугæй, рæстуодæй æма нифсгунæй цудæнцæ нæ Райгурæн бæстæ цифуддæр знагæй багъæуай кæнунмæ. Етæ сæхе нæ бафæсвæд кодтонцæ, нæ баримахстонцæ, Фидибæстæ сæ фæдеси ку байагурдта, уæд. Мах си абони дæр сæрустур ан. Сæрустурæй сæ имисæн, кадæ син кæнæн сæ рохс нæмттæн. Сумах уони фæдонтæ айтæ, æма уæ нæ агъаз кæми гъæуа, уоми уин нифсæнцойнæ уодзинан. Кадæбæл хуæст адтæнцæ уæ хестæртæ фидæй-фуртмæ, æма ни федарæй æруагæс кæнуй, еци кадæ æма намуси аккаг сумах дæр уодзинайтæ, е. Уасгерги æма уин нæ Иристони изæдтæ агъазгæнæг уæнтæ.

Кæд цийни бони мадзал нæ адтæй, уæддæр æфсæддон хаййи фæзæбæл фæндури зæлтæ дæр райгъустæнцæ. Ниййерæг мадтæлтæй кадæртæ сæ хъæболти хæццæ тумбул кафти æрзилдæнцæ. Уой фæсте тугъдонтæ хуæдтæхæги исбадтæнцæ. Фиццагидæр бал сæ фæлластонцæ Хъирими полигонмæ, цалдæр боней дæргъи син уоми арæзт цæудзæнæй цæттæгæнæн ахуртæ, уой фæсте æрвист æрцæудзæнæнцæ сæрмагонд æфсæддон операци кæми цæуй, уордæмæ.