Зундгонд куд æй, уотемæй 15-17 мартъий рацæудзæнæнцæ Уæрæсей Федераций Президенти æвзурститæ. Æма нæ бæсти Центрон æвзарæн къамис куд игъосун кæнуй, уотемæй Президенти бунатмæ кандидаттæй федаргонд æрцудæнцæ цуппар адæймаги: нæ бæсти нури разамонæг Владимир Путин (æвзурстити архайдзæнæй куд хе бавдесæг кандидат, уотæ), Уæрæсей либералон-демократон партий раздзæуæг Леонид Слуцкий, Паддзахадон Думи вице-спикер Владислав Даванков (парти «Нæуæг адæймæгутæ»-йи) æма Уæрæсей Федераций Компартий иуонг, Падзахадон Думи Идард Искæсæни æма Арктики райрæзти фæдбæл Комитети сæрдар Николай Харитонов.

Центрон æвзарæн къамис ма куд игъосун кæнуй, уотемæй берæ фæсарæйнаг паддзахæдтæмæ æрвист æрцудæй хунди гæгъæдитæ, цæмæй сæ минæвæртти исæрветонцæ Уæрæсей Федераций Президенти æвзурстити фæткæмæ цæстдарунмæ.

Уой туххæй æвзарæн къамиси сæрдар Эллæ Памфилова уотæ загъта:

– Зундгонд куд æй, уотемæй æвзарæн къамисæн барæ  ес, цæмæй Президенти радон æвзурститæмæ цæстдарунмæ æрбахона фæсарæйнаг бæстити минæвæртти. Еци фадуатæй испайда кæнгæй, къамиси номæй нуриуæнгæ уæхæн хунди гæгъæдитæ рарвистан 95 бæсти минæвæрттæмæ.