– Уæрæсей Хецауадæ Цæгат Иристонæн радех кодта 1,9 миллиард соми нæдти хæдзаради райрæзти мадзæлттæ æнхæст кæнунæн. Уонæй 823, 9 миллион соми харзгонд гъæуама æрцæуонцæ автомобилон над «Дзæуæгигъæу-Æрæдон-Чикола-Лескен-2» арæзтадæ фæуунбæл, 865,9 миллион соми ба – федералон над А-164 «Транскам»-и Дæллаг Зæрæмæгмæ хæстæг объектти реконструкцийæн, уæдта уордигæй рекреацион комплексмæ автомобилон над аразунмæ.

Компани «Кавкази сæнæфсерикустгæнæг» Мæздæги райони æнхæст кæндзæнæй агъазиау проект – сæнæфсерæ æма æ идарддæри куст, уæдта сæнæ уадзун (2 миллион авги анзмæ). Нерæнгæ бал гъæу Комаровай рази 259 гектаремæй дæс æма инсæйеми ниссагътонцæ немуцаг сорт «Монарх»-и талатæ. Фиццаг тиллæг си æрæмбурд кæнунмæ гъавунцæ æртæ анзей фæсте. Уæдмæ станицæ Луковскойи исараздзæнæнцæ сæнæуадзæн завод. Куд нисан кæнунцæ, уотемæй исонибонмæ сæнæфсерæдæнтти фæзуат гъæуама исуа 2500 гектари.

Цæгат Иристони астæуккаг ахургæнæндæнтти бундоронæй цалцæг кæнуни программæмæ хаст æрцудæнцæ 63 скъолай. Уой фæдбæл харзгонд æрцæудзæнæй 3,7 млрд соми. Еугур рауæнти дæр куститæ гъæуама æнхæстгонд фæууонцæ 2023 анзи. Ирæфи райони дæр капиталон цалцæггонд цæунцæ скъолатæ Æхсæрисæри, Дæргъæвси, Советони æма Чиколай (æртиккаг скъола). Куд нисан кæнунцæ, уотемæй гъæуама исцæттæ уонцæ ахури нæуæг анзи райдайæнмæ.