Уæрæсей Гæрзефтонг тухти рæнгъитæмæ аци анзи фæззигон фæдздзурди дзамани пайда кæнун райдайдзæнæнцæ Æфсæддон хигъдхасти еумæйаг номхигъдæй, электронон пъавесткити туххæй игъосункæнуйнæгтæ бафтаудзæнæнцæ портал «Госуслуги»-мæ.

Аци анзи æфсæддон фæдздзурди туххæй дзубандигæнгæй, Уæрæсей Гæрзефтонг тухти Генералон штаби сæйраг организацион-мобилизацион управлений хецауи хуæдæййевæг Владимир Цимлянский фегъосун кодта уалдзигон фæдздзурди кампаний бæрæггæнæнти, уæдта фæззигон фæдздзурди пъланти туххæй хабæрттæ. Æ дзубандимæ гæсгæ уалдзигон фæдздзурди дзамани Гæрзефтонг тухтæмæ службæ кæнунмæ рарвистонцæ 160 мин адæймаги, фæдздзурдмæ гæсгæ баслужбæгæнæг адæм сæ цæрæнуæттæмæ рандæ уодзæнæнцæ.

Генштаби минæвар куд загъта, уотемæй 1 октябрæй 31 декабри уæнгæ пъланон уагæй æнхæстгонд ка ’рцæуа, еци фæззигон фæдздзурд Украини цæуæг тугъдон архайди хæццæ баст нæ уодзæнæй. Фæззигон фæдздзурди дзамани æфсæддон служби æмгъуд æййивд не ’рцæудзæнæй, Уæрæсей фæзуати ка службæ кæндзæнæй, еци æфсæддонти не ’рветдзæнæнцæ Украинæмæ тугъдон ихæслæвæрдтæ ’нхæст кæнунмæ.

Фæдздзурди дзамани гæгъæдин пъавесткити æмрæнгъæ кæмæй пайда кæндзæнæнцæ, еци электронон пъавесткити туххæй игъосункæнуйнæгтæ бафтуйдзæнæнцæ портал «Госуслуги»-й «Личный кабинет»-мæ. Электронон пъавестки барвисти фæсте инсæй боней дæргъи æфсæддон комиссарадæмæ æнæ ахсгиаг рæуаги фудæй ка не ’рбацæуа, еци адæймаги нихмæ испайда кæндзæнæнцæ гæрæн-æвæрæн мадзæлттæй. Е уомæ гæсгæ загъд цæуй, æма Гæрзефтонг тухти рæнгъити баслужбæ кæнунæй ихæсгин ка ’й, етæ гъæуама рæстзæрдæй сæхецæн исунаффæ кæнонцæ: «Цæун æфсадмæ, цæун мæ Фидибæстæн балæггадæ кæнунмæ!..»

Фæззигон кампанийæй фæстæмæ фæдздзурди туххæй унаффæ федаргонд уодзæнæй анзи дæргъи.

Нæ уацхæссæг