Нæ Иристони разагъди лæгтæй дууей – Малити Гадой фурт Геуæрги æма Темурхъанти Гаврили фурт Сослани къартæ хумæтæги нæ мухур кæнæн. Кæд еске барæ даруй, цæмæй цитгингонд æрцæуа нæ маддæлон æвзаг æма литератури Бони фæдбæл мадзæлтти рæстæг, уæд уонæн сæ фиццæгтæй æнцæ аци дууæ номдзуд адæймаги дæр. Нæ Иристон рæстзæрдæй кæд еске уарзта æма ин алæмæти агъазиау хуæрзтæ еске фæцæй, уæд аци дууæ хъиамæтгун лæги. Уотемæй ба…

Зæгъæн, аци анз 3 апърели Темурхъанти Сослани райгурдбæл исæнхæст æй фондз æма авдинсæй анзи (1881-1925). Фал аци цау æргъудигæнæг ба нæ фæцæй. Æнæмæнгæ гъудæй æ рохс ном ин æримисун, æ берæ æскъуæлхтдзийнæдтæ ин нимайгæй. Уони фæдбæл цæуй дзубанди, мæнæ ин абони æ номерæнæн нæ газети ци æрмæгутæ мухур кæнæн, уонæми.

Иннæ хабар. Хъæбæр рагæй цудæй дзубанди, цæмæй аци анз нæ маддæлон æвзаг æма литератури Бони  сæрмагондæй арæзт мадзæлттæ куд æрцæуонцæ Малити Геуæргий номерæнæн. Уомæн бæлвурд рæуагæ дæр ес – аци анз æ райгурдбæл æнхæст кæнуй авдинсæй анзи (1886-1942). Фал, аци æнæмæнгæ æнхæст кæнуни аккаг гъуддаги фæдбæл фæндонмæ æригъосæг дæр бабæй нæ фæцæй. Уогæ уæддæр Дигори дзиллæ сæхе хъæппæресæй Малити Геуæргий номерæн мадзал исаразтонцæ Дзæуæгигъæуи æ циртдзæвæни рази.