28 майя 2022

ДӔ ЦЪУХБӔЛ КУ НӔ ХУӔЦАЙ…

21.05.2021 | 15:06

Еу зӕронд лӕг ӕ хуӕрзӕригон биццеуи хӕццӕ цудӕй надбӕл. Адтӕй сӕмӕ айдагъдӕр хуӕрзминкъий хӕрӕг. Кезугай сӕ хаста, мадта ӕндӕр куд адтайдӕ. Фидӕ хӕрӕгбӕл исбадтӕй, фурт ба сӕ фӕсте фестӕгӕй цудӕй. Ка сӕбӕл рамбӕлидӕ, етӕ фӕсхуайӕ дзубандитӕ кодтонцӕ:

– Аци зӕронд хъебургъӕ ӕ мӕрдтӕмӕ надмӕ ранӕхстӕруйнаг ӕй, уӕддӕр ма фуригъоли хузӕн сабиййи уодхарӕй маруй!..

Лӕг еци дзубандитӕ ку фегъуста, уӕд ӕрхизтӕй зӕнхӕмӕ ӕма биццеуи кӕд нӕ фӕндадтӕй, уӕддӕр ӕй хӕрӕгбӕл исбадун кодта. Адӕм бабӕй уой фӕдбӕл дӕр дзӕнгӕда кӕнун байдӕдтонцӕ:

– Кӕсайтӕ еци къӕсибадӕгмӕ: хӕрӕги рагъмӕ исбурдӕй, мӕгур зӕронд лӕг ба фестӕгӕй хелуй!..

– Биццеу фурӕфсӕрмӕй расурх ӕй ӕма ӕ фиди ӕ фӕсарцӕ исбадун кодта. Хайуан дууей дӕр хӕссуй. Адӕм никки хъӕбӕрдӕр исмӕстгун ӕнцӕ:

– Дууӕ устур хайуани еу минкъийбӕл сӕ пурхӕ калунцӕ!..

Ци киндӕуа? Фидӕ ӕма фурт сӕ фурмӕстӕлгъӕй рахизтӕнцӕ ӕма хӕрӕги фӕсте фестӕгӕй фӕрраст ӕнцӕ. Ка сӕбӕл исӕмбӕлидӕ, етӕ билӕскъелӕй айуан кӕнун байдайиуонцӕ:

– Дууӕ хӕрӕги ӕртиккагбӕл ауӕрдунцӕ, ӕдули къоппатӕ!..

Уӕд фидӕ ӕ фуртӕн зӕгъуй:

– Фӕууидтай, мӕ хъӕболӕ? Адӕм еугурӕйдӕр аразийӕй цӕмӕй байзайуонцӕ, уомӕн уӕн нӕййес. Тӕккӕ райдайӕни ци фӕткӕбӕл ниххуӕстан, уомӕ нӕуӕгӕй раздӕхӕн. Атӕ ба цийфӕнди дӕр дзорӕнтӕ – се ‘гъдау уӕхӕн ӕй…

Аци ӕмбесонди кой кӕддӕр ракодта номдзуд итайлаг финсӕг Франческо Петрарка (1304-1374). Ӕма кӕд хабар недзамайнаг ӕй, уӕддӕр абони дӕр цӕмӕдессаг ӕй – куд зунди хуасӕ.

Лев ЛЕЩЕНКО, Уӕрӕсей Федераций адӕмон артист: «Ци ‘й, уруссаг адӕймаги бон нӕй гъӕунгтӕ сӕрфун кенӕ хӕдзӕртти сӕртӕ бамбӕрзун?.. Абони еугурейдӕр фӕндуй, уоййасӕбӕл неци байархайгӕй син цӕмӕй алцидӕр уа. Фал уотӕ нӕ фӕууй…»

Ӕгӕрдӕр ма фӕууй, уӕлдайдӕр ба нуриккон Уӕрӕсей!.. Мадта нур бонгинти зӕнӕг хъазарӕй-хъазардӕр ци хуӕдтолгити ратӕхӕ-батӕхӕ кӕнунцӕ, ци парахат галауӕнти цӕрунцӕ, ци берӕ мулкитӕ сӕмӕ ес, уони етӕ дӕр гъӕунгтӕ сӕрфгӕй, кенӕ хӕдзӕртти сӕртӕ цалцӕггӕнгӕй бакустонцӕ?.. Кунӕг!..

Владимир ЖИРИНОВСКИЙ, Уӕрӕсей либералон-демократон партий разамонӕг: «Мах ӕнӕгъӕнӕ дуйне дӕр гъӕуама исбадун кӕнӕн нӕ уруссаг хуӕлцадон судзийнӕбӕл…»

– Ӕма цума кӕд байдайдзинан ласун нӕ уӕрӕсейаг хуӕдтолгитӕ Грецимӕ, нӕ уӕрӕсейаг банантӕ Африкӕмӕ, нӕ уӕрӕсейаг апельсинтӕ Мароккомӕ?.. Уӕд  ци загъдӕуа нӕ къӕбӕда «политиктӕн» – сӕнттӕ цӕгъдуни бӕсти ести ӕцӕгӕй пайдахӕссӕг гъуддӕгутӕ аразунмӕ бӕргӕ ку бавналиуонцӕ.

 

Анатолий СЕРДЮКОВ, Уӕрӕсей Федераций гъӕуайкӕнуйнади раздӕри министр: «Ӕфсӕддон пъӕлицӕ ӕхемӕ райсдзӕнӕй берӕ ихӕстӕ – гарнизонти фӕткӕ ӕма уагӕмӕ цӕстдарун, уӕзӕгтӕ ӕма объекттӕ гъӕуай кӕнун, хабӕрттӕ бӕрӕг кӕнун ӕма уотӕ идарддӕр…»

– Дессагӕн, ӕфсӕддонти медастӕу ӕнӕуставон рахастдзийнӕдти нихмӕ ба ӕфсӕддон пъӕлици ка тох кӕндзӕнӕй? Кенӕ ӕфсади давунти нихмӕ ка тох кӕндзӕнӕй? Уогӕ сӕ уомӕ, ӕвӕдзи, нӕ евдӕлдзӕнӕй, бӕрзондибадӕг ӕфсӕддон разамонгутӕ ӕфсади ӕхцатӕй ке фӕддавтонцӕ, уони фӕрци ци галауантӕ исаразтонцӕ сӕхецӕн, уони гъӕуай кӕнунӕй?