27 майя 2022

ДӔ ЦЪУХБӔЛ КУ НӔ ХУӔЦАЙ!..

30.06.2021 | 12:34

Ӕррабий дин ӕнӕдон будури аразун байдӕдта куройнӕ. Зондабий ибӕл уоми исӕмбалдӕй ӕма ‘й фӕрсуй:

– Ци аразис, Ӕррабий?

– Гӕрр, ӕма кӕд дӕ сӕри зунд ес, уӕд ӕй куд нӕ балӕдӕрдтӕ, куройнӕ ке аразун, уой?!.

Зондабий фӕйнердӕмӕ ракӕсӕ-бакӕсӕ ракодта ӕма, цӕугӕдон ку некӕми ӕрӕстӕфтӕй, уӕд Ӕррабийбӕл айуан ракӕнуйнаг адтӕй, фал, ӕфхуӕрди хузӕн мӕ ку балӕдӕра, зӕгъгӕ, рагъуди кодта ӕма ӕнӕсдзоргӕй рараст ӕй ӕ надбӕл. Ӕррабийӕн е зин куд нӕ адтайдӕ ӕма исбостӕ кодта, уотемӕй дзоруй Зондабийи фӕсте:

– Дӕ хуарзӕнхӕй, Зондабий, рӕстмӕ дин фӕууӕд дӕ куройнӕ ӕма си ирайгӕ уо, зӕгъгӕ, мин цӕмӕннӕ райарфӕ кодтай?

– Райарфӕ дин кодтон, – загъта Зондабий, фал дӕ куройнӕ ци донӕй зелдзӕнӕй, е ӕгӕр хъӕбӕр гъӕр кӕнуй, ӕма мӕ нӕ фегъустай…


Ӕма нӕмӕ уӕхӕн Ӕррабийтӕ абони ба минкъий ӕнцӕ?!. Хецаудзийнади бӕрзонд бунӕтти бадгӕй ӕма баргин уогӕй, хаттӕй-хатт уӕхӕн гъуддӕгутӕ аразунбӕл истумугъ унцӕ, ӕма магъа… Уогӕ ‘й, ӕвӕдзи, сӕхуӕдтӕ лӕдӕргӕ дӕр нӕ фӕккӕнунцӕ, сӕ фӕндитӕй зӕранӕй уӕлдай пайда ба ӕгириддӕр ке неци ес, уой. Адӕм ба ‘й бӕргӕ уинунцӕ уӕхӕн «куройнити» ӕнӕбунати «куройнитӕ», мадта уой дӕр лӕдӕрунцӕ, ӕма сӕ аразунтӕ ке фӕндӕй низгули унцӕ, еци ӕнарӕхсгитӕ се ‘нӕпайда гъуддӕгутӕй сӕхе агъазиау пайдатӕй фӕххайгин унмӕ ба ӕгӕрдӕр ма исарӕхсунцӕ…

Гарик Харламов, комик: «Цӕй ӕма футбол, хъутургъани амӕттаг фӕууа, бустӕгидӕр нихгӕнӕн. Комкоммӕ райсӕн ести устур дӕгъӕл ӕма ‘й нихгӕнӕн еци спорт…»

Нӕ футболӕйгъазгутӕ уоййасӕбӕл ӕнарӕхсгӕ ке ‘нцӕ, уомӕ гӕсгӕ сӕ уингӕ дӕр  куд нӕбал кӕнӕн, уотӕ сӕ ескӕми еуварс уӕхӕн рауӕни нихгӕнӕн, зӕгъгӕ, еци фӕндон, ка ‘й зонуй, раст уодзӕнӕй цӕмӕйдӕрти. Ӕцӕг еу фарста: нур нӕ цардиуаги хабӕрттӕ кӕмӕй аразгӕ ‘нцӕ, еци бӕрзондибадӕг хецауеуӕггӕнгутӕн дӕр сӕ фулдӕр фур ӕнарӕхсгӕ ку ‘нцӕ, ӕма уӕд уонӕн ба ци киндӕуа? Етӕ дӕр нӕ куд нӕбал хъор кӕнонцӕ, уотӕ ескӕми еуварсгонд ӕрцӕуонцӕ? Ӕма еци гъуддаг исаразунгъон ка ‘й, уӕхӕн ба кӕми разинна? Ка ‘й гъӕуама исараза, етӕ сӕхуӕдтӕ дӕр уонӕй ку ‘нцӕ…

Михаил Черников, Уӕрӕсей медгъуддӕгути министради нӕдтӕбӕл ӕзмӕлди ӕдасдзийнадӕ ефтонгкӕнуйнади фӕдбӕл Управлений разамонӕг: «Фӕндаггон-цӕстдарӕг служби косӕги сӕйраг ихӕс – нӕдтӕбӕл ӕзмӕлди ӕдасдзийнадӕбӕл архайун…»

Бӕргӕ уотӕ гъӕуама уа, фал… Хецау уоййасӕбӕл бӕрзонди бадуй, ӕма имӕ нӕ зиннуй, далӕ дӕлиаути ба ӕ хумӕтӕг косгутӕ сӕ сӕйраг ихӕс ӕндӕр хузи ке лӕдӕрунцӕ ӕма сӕ куст сӕхе фӕткитӕмӕ гӕсгӕ ке ‘нхӕст кӕнунцӕ. Фӕткӕ ба уӕхӕн: нӕдтӕбӕл цӕуни домӕнтӕ ихалгутӕ куд фулдӕр уонцӕ, уотӕ ӕдасдзийнадӕмӕ цӕстдаргутӕн хуӕздӕр ӕй, уомӕн ӕма сӕмӕ уотӕ фулдӕр ӕрбахаудзӕнӕй «ӕфтуйӕггӕгтӕ».

 

Гермӕн Греф, банк Сбери сӕргълӕууӕг: «Еунӕг мах бӕстӕ уӕхӕн уавӕри ӕй, кӕцими феддонти базари уоййасӕбӕл агъазиау хай ӕй еунӕг устур гъазӕгмӕ. Ӕз уотӕ гъуди кӕнун, ӕма е ӕмбӕлгӕ уавӕр ӕй…»

Уавӕр ӕмбӕлгӕ уӕд уодзӕнӕй, ӕма еци гъазгутӕ, кӕмӕ си ци хай хауй, уой нӕ нимайгӕй, цӕсгонгин ку уонцӕ ӕма сӕ «гъӕзтитӕ» арӕхстгайдӕр ку аразонцӕ. Сӕйрагдӕрӕй ба уой ку лӕдӕронцӕ, ӕма сӕ «гъӕзтитӕ» ке аразунцӕ сӕ байвӕргути ӕхцатӕй ӕма еци адӕмӕй уӕддӕр еуцӕйбӕрцӕдӕр ку ӕфсӕрми кӕниуонцӕ…