Аци хатт ба уин ракӕнуйнаг ан нӕ зундгонд артистти цардӕй еу цауи кой. Цӕветтонгӕ, театри цӕттӕ кодтонцӕ нӕуӕг спектакли. Ӕ медесмӕ гӕсгӕ си байеудагъ ӕй тугъд уорсгвардионтӕ ӕма сурхити ‘хсӕн. Сӕ еуетӕмӕ дӕр нӕмуг нӕбал ес. Тохӕндзаумӕуттӕ рагӕлстонцӕ ӕма бавналдтонцӕ лӕгӕй-лӕгмӕ тохмӕ. Тибилти Чермен адтӕй уорситӕй, Цӕгӕрати Глеб ба – сурхитӕй. Сурхитӕ гъӕуама фӕууӕлахез адтайуонцӕ. Чермен – къабазгин лӕхъуӕн. Глеби ӕ буни ӕркодта. Режиссер имӕ залӕй дзоруй:

– Чермен, Глеб дӕбӕл гъӕуама фӕууӕлахез уа!

Чермен ӕ иуӕнгтӕ фӕйнердӕмӕ райвазта::

– Мӕнбӕл гъӕуама мӕнӕ айӕ фӕууӕлахез уа? Мӕ еу цонги тухӕ имӕ ку нӕййес, уӕд… Ногирмӕ ци цӕсгомӕй ниццӕудзӕнӕн?

Режиссер ма ин цидӕр зӕгъунмӕ гъавта, фал Чермен фӕрразӕй ӕй:

– Маци мин дзорӕ – уомӕн уӕн нӕййес!.. Уой бӕсти мӕлӕт!..

Режиссер балӕдӕрдтӕй Чермени уавӕр ӕма син сӕ рольтӕ баййивта.

Нури догӕ ба уӕхӕн иссӕй, ӕма ни кадӕртӕ, кедӕр, уӕлдайдӕр ба хецауеуӕггӕнгутӕй еске цӕстиварди фӕууни зӕрдтӕй сӕ хенимайундзийнадӕ къӕхти буни фӕккӕнунцӕ. Бӕргӕ, Чермени хузӕн багъӕуаги сӕ сӕрустурдзийнадӕ гъӕддухӕй ӕвдесун ке бон уа, уӕхӕн лӕгтӕ нӕмӕ фулдӕр ку уайдӕ. Уӕд цӕйбӕрцӕбӕл рӕвдзӕдӕр уиуонцӕ нӕ цардарӕзти хабӕрттӕ. Фал…

Вячеслав Костиков, газет «Аргументы и факты»-й фӕлгӕсӕг: «Бӕргӕ фӕндуй зӕрдӕ дарун уобӕл, ӕма нӕуӕг равзурст депутаттӕ сӕ гъос лӕмбунӕгдӕр дардзӕнӕнцӕ, адӕм цӕбӕл сагъӕс кӕнунцӕ ӕма цӕбӕл сӕ зӕрдӕ дарунцӕ, уомӕ…»

Ӕнгъӕлмӕгӕсӕги зӕрдӕ, дан, фунтӕй хъал ӕй… Сауӕнгӕ ӕвзурстити размӕ дӕр ӕвзаргути хӕццӕ фембӕлунмӕ ке нӕ райевдалдӕй, сӕ зӕгъуйнӕгтӕмӕ син байгъосунмӕ ӕ сӕр ка не ‘рхаста, уонӕмӕ, Парламенти гъар ӕма фарнӕхӕссӕг бунӕтти ӕрбадгӕй, хумӕтӕг адӕми сагъӕс ма сӕ уодзӕнӕй? Кунӕг!..

Михаил Тарковский, финсӕг: «Мӕ зонгитӕн сӕ фулдӕр, дӕсгай адӕймӕгутӕ цӕрунцӕ тухамӕлттӕй, улупай еу райстӕй иннемӕ ӕнгъӕлмӕ кӕсгӕй, ӕносон нӕхъӕртондзийнади хӕццӕ, фал уӕддӕр куддӕртӕй цӕрунцӕ…»

Нуртӕкки адӕм ци нӕхъӕртондзийнӕдтӕй тухсунцӕ, уони еугурӕй дӕр кӕнунцӕ коронавируси пандемий фуд. Кӕд ӕцӕгӕйдӕр уотӕ ‘й, уӕд айдагъ хумӕтӕг адӕми царди уавӕртӕ ӕгудзӕгӕй-ӕгудзӕгдӕр цӕмӕн кӕнунцӕ (сӕ ӕфтуйӕгтӕ, зӕгъӕн, 2020 анзи фӕмминкъийдӕр ӕнцӕ 3,5% бӕрцӕ), нӕ бонгинӕй-бонгиндӕртӕ (нӕ бӕсти цӕргутӕн – сӕ 10%) ба никки гъӕздугдӕр кӕнунцӕ? Ӕви ковидмӕ дӕр мӕгуртӕ ӕма гъӕздугутӕбӕл нӕ дехтӕ кӕнуни ацъагъуӕ дӕр ес?

Август Белкин, историк, педагогон наукити доктор: «Ахургӕнӕгбӕл дохтирӕй минкъийдӕр бӕрнондзийнадӕ не ‘нцайуй, уомӕн ӕма е кӕронккаг хатдзӕгмӕ гӕсгӕ дзуапп дӕттуй нӕ бӕсти исонибонбӕл…»

Ахургӕнӕгӕн ӕ кусти нисанеуӕги агъазиаудзийнадӕмӕ гӕсгӕ ин не ‘хсӕнади аккаг аргъгонд цӕмӕй цӕуа, е нӕ хецауеуӕггӕнгутӕй кӕмӕй аразгӕ ‘й, етӕ скъоламӕ ку цудӕнцӕ, уӕд си, ӕвӕдзи, сӕ рӕвдзитӕй нӕ адтӕнцӕ. Ӕма нур ба раст цума си сӕ маст есунцӕ, уоййау ахуради къабазӕн алли фудмиутӕ аразунцӕ. Раст зӕгъгӕй, Уӕрӕсей Президент В.Путин хуӕрзӕрӕги бардзурд равардта, цӕмӕй ахургӕнгутӕн мизд федуни системӕ рӕвдзӕдӕргонд  ӕрцӕуа. Хабар бӕргӕ хуарз ӕй, фал си, цума, ести рауайдзӕнӕй – иннӕ хӕттити хузӕн бабӕй ку нӕ фӕффудевгед уиуонцӕ ахургӕнгутӕ.