Еу бонгин лӕг ӕ иуазгути хӕццӕ финги уӕлгъос куд бадтӕй, уотемӕй имӕ ӕ лӕггадӕгӕнӕг кедӕр финстӕг ӕрбахаста ӕма ин загъта:

– Аци лӕг дзуапмӕ ӕндегӕй ӕнгъӕлмӕ кӕсуй.

Нур бонгин лӕг ба бустӕги ӕнахургонд адтӕй, кӕсун ӕгириддӕр нӕ зудта. Фал, иуазгути рази фӕхходуйнаг унӕй тарстӕй, ӕма финстӕг райста, «кӕсун ӕй байдӕдта». Уӕдта еци гъуддагхузӕй уотӕ фӕккодта:

– Лӕгӕн зӕгъӕ, цӕуӕд ӕма ӕ хецауӕн балӕдӕрун кӕнӕд, ӕ курдиадӕ ин исӕнхӕст кӕндзӕнӕн: куддӕр мин фадуат фӕууа, уотӕ исӕмбӕлдзӕнӕн ӕ хӕдзари.

Лӕггадӕгӕнӕг уой ку фегъуста, уӕд куддӕр фӕкъкъех ӕй, уӕдта ин ӕ гъоси бадзурдта:

– Еци лӕг мин куд балӕдӕрун кодта, уотемӕй бӕх ракорунмӕ ӕрбацудӕй. Гӕрр, мӕ дзӕбӕх ӕлдар, бӕхи бӕсти сӕмӕ дӕхуӕдӕг фӕццӕудзӕнӕ?..

***

Аци таурӕхъ ӕримисгӕй уой зӕгъуйнаг ан, ӕма еци бонгини хузӕн арӕхстгин адӕймӕгутӕй цӕйбӕрцитӕ ӕрбадунцӕ, нӕ цардиуаги ахсгиаг хабӕрттӕ кӕцӕй гъӕуама арӕзт цӕунцӕ, уӕхӕн бӕрнон рауӕнти. Сӕ бӕрнӕхсти гъуддӕгутӕн неци лӕдӕргӕй, уоййасӕбӕл неци уавӕр ацъагъуӕй хайгин уогӕй, «разамунд» дӕттунцӕ. Ӕма еу рауӕн нецӕмӕ исарӕхсгӕй, уайтӕккӕ сӕ ӕндӕр разамунддӕттӕн бунӕтти райвӕрунцӕ. Еузагъдӕй, уаддзалхи хузӕнттӕ. Уогӕ нецӕмӕ арӕхсунцӕ, зӕгъгӕ, е бустӕги раст нӕй – сӕхецӕн ӕма сӕ хуӕрзгӕнгутӕн пайдатӕ кӕнунмӕ ба ӕгӕр дӕр ма фӕййарӕхсунцӕ…

Ольгӕ ГОЛОДЕЦ, нӕ бӕсти раздӕри вице-премьер: «Махмӕ пенсион къабази райрӕзтӕн ци стратеги цӕттӕгонд ӕрцудӕй, уомӕ гӕсгӕ нӕмӕ пенси гъӕуама уа пенсиесӕги фӕццӕруни фаги минимумӕй дууей бӕрцӕ.

– Еци стратеги цӕмӕй ӕнхӕстгонд цӕуа, уомӕн ес дууӕ мадзали: еу – пенсиесгутӕн фулдӕр федун, иннӕ – цӕмӕй минкъийдӕр хуӕронцӕ, уомӕ гӕсгӕ ба син фӕццӕруни фаги минимум бустӕги фӕмминкъийдӕр кӕнун… Ес уӕхӕн анекдот. Хецауадон ӕмбурди еу докладгӕнӕг дзоруй: «Японий ес уӕхӕн ӕгъдау, ӕма сӕ зӕрӕндти хуӕнхти ӕдзӕрӕг рауӕнмӕ фӕххӕссунцӕ, уоми сӕ сӕхе бӕрагӕ ниууадзунцӕ…» Уӕд имӕ иннетӕ дзорунцӕ: «Господин министр, Пенсион фонд ӕма пенсиесгути туххӕй дӕмӕ ӕндӕр неци фӕндон ес?..»

Филип ЧЕСТЕРФИЛД (1694-1773), англисаг финсӕг ӕма паддзахадон архайӕг: «Хе келбетдзийнадӕ лӕдӕрун зундгин адӕймаги никки хуӕдӕфсармӕдӕр кӕнуй, уой хӕццӕ ба ма никки гъӕддухдӕр…»

– Аци загъдмӕ гӕсгӕ нӕ нуриккон политиктӕ ӕма чиновниктӕй ба берети зундгин рахонун, ӕвӕдзи, неци хузи ӕнгъезуй. Уомӕн ӕма сӕхе дессаги келбетгунӕй ӕвдесунбӕл бӕргӕ ӕновудӕй архайунцӕ, фал се ’цӕг миутӕй ба раргом уй хуӕдӕфсармӕй сӕмӕ ӕгириддӕр ке неци ес, мадта гъӕддухдзийнадӕ дӕр ӕвдесунцӕ айдагъдӕр хе хуарздзийнади фӕдбӕл.

Владимир ЛЕГОЙДА, Уӕрӕсей киристон дини аргъауӕни ӕхсӕнади ӕма дзиллон хабархӕссӕг фӕрӕзнити хӕццӕ бастдзийнӕдти хайади разамонӕг: «Адӕймаг фудзӕрдӕ тухти амӕттаг бацӕй зӕгъгӕ, хуӕдбарӕй хатдзӕг хӕссун, уӕлдайдӕр ба си дӕлимонтӕ фӕссорун хевӕндӕй ӕвзарун ӕй тӕссаг ӕма зӕран…»

Ӕма уӕд еугурадӕмон есбонадӕй ӕгӕр ка давуй ӕма хӕлӕттаг кӕнуй, уони сӕризунди ци сайтӕнттӕ бабурдӕнцӕ, уонӕн ба ци кӕнгӕй? Ци тӕссагдӕр ӕма зӕрандӕр ӕй – еци сайтӕнтти, еци адӕймӕгути медӕгӕй фӕссорун ӕви сӕ нихъхъуӕтти уадзӕн ӕма идарддӕр хӕлӕф кӕнӕнтӕ?