Еу силгоймаг пъӕлицӕмӕ багъаст кодта, циуавӕрдӕр лӕг, дан, мин тухмиуӕ бакодта, зӕгъгӕ. Ӕма ‘й слестгӕнӕг фӕрсуй:

– Бакастӕй ци хузӕн адтӕй, тухмиуӕ дин ка бакодта, еци лӕг?

– Ӕдули ци фӕууй, гъе  адтӕй! – тингунӕй ин дзуапп равардта силгоймаг.

– Цӕмӕ гӕсгӕ дӕмӕ уотӕ кӕсуй?

– Мадта ма ӕдулибӕл сиутӕ фӕууй?.. Ӕ хӕлаф раласунгъон дӕр нӕ адтӕй еци сӕнтдзӕф ӕма ин мӕхуӕдӕг агъаз кодтон!

Еци силгоймаги цау ӕркодта махбӕл дӕр. Хъӕбӕр мӕстадӕй еудадзуг гъаст кӕнӕн нӕ хецауеуӕггӕнгутӕй, депутаттӕй, чиновниктӕй: адӕми сагъӕс сӕмӕ ӕгириддӕр нӕййес, сӕхе пайдайӕн закъонтӕ ӕримисунцӕ, гъезӕмӕрттӕй нӕ хопъали уӕнгӕ байдзаг кодтонцӕ. Ӕма уомӕй айдагъ етӕ нӕ ‘нцӕ фудгин. Нӕхуӕдтӕ ба? Мах сӕ нӕ равзарӕн депутаттӕй, нӕ «раздзӕугути» сӕ ирисхъӕгун бунӕтти мах не ‘рбадун кӕнӕн?

Наталья ПОКЛОНСКАЯ, Уӕрӕсей Уӕлрадон ӕма Ӕнхӕстбаргин минӕвар паддзахадӕ Кабо-Вердей: «Нуриккон уавӕрти хъӕбӕр зин ӕй рӕстадӕ фӕууинун. Уогӕ ба ӕй не ‘хсӕнади?..»

Аци, рӕстадӕбӕл дзорӕг цъӕхӕйрӕгъӕд политик, ӕрӕги ин паддзахади харзӕй 53 миллион сомей аргъ фатер ке равардтонцӕ, уой туххӕй ӕнӕфсӕрмӕй загъта: «Уой мин, инсӕй анзи прокуратури ӕма хецаудзийнади ке бакустон, уой туххӕй равардтонцӕ. Дзурдӕн- фӕккуста зӕрдӕхцӕуӕн косӕндӕнтти бадгӕй. Уотемӕй ба, шахтити, ӕндӕр тӕссагӕй-тӕссагдӕр рауӕнти инсӕй нӕ, фал берӕ-берӕ фулдӕр ӕнзти ка фӕхъхъиамӕт кӕнуй, уонӕй еунӕгемӕн дӕр еци «рӕдау» паддзахадӕ ӕгӕрмӕгур уосонгӕ дӕр ку нӕ исаккаг кӕнуй!.. Уӕд ӕхсийнӕ Полонская ӕма уой хузӕнттӕ ба ци цӕсгонӕй дзорунцӕ рӕстади туххӕй?!.

Иван УРГАНТ, телевизион амонӕг: «Инсӕй депутаттемӕн нӕййес еугӕндзон косӕнуӕттӕ. Депутаттӕ-мигранттӕ, кӕцитӕ Паддзахадон Думӕмӕ бацудӕнцӕ хуӕздӕр цард иссеруни зӕрдтӕй, ӕма син косӕнуӕттӕ ба нӕ радех кодтонцӕ…»

Думӕмӕ фӕстаг ӕвзурстити рӕстӕг депутат ка нӕбал иссӕй, етӕ, кӕми бадтӕнцӕ, еци косӕнуӕтти дзаумауӕй цидӕриддӕр адтӕй, уони фӕддунд кодтонцӕ, уой фегъустан. Фал сӕ еци косӕнуӕттӕ дӕр сӕ хӕццӕ рахастонцӕ? Ӕма, кӕми ӕрбадонцӕ, е дӕр кӕмӕн нӕййес, еци нӕуӕг депутаттӕн ци кӕнгӕй ‘й? Рӕстӕг цӕуй, ӕма син ку не ‘сфагӕ уа сӕ бӕлдӕ исӕнхӕст кӕнунӕн – хуӕздӕр цардбӕл фӕххуӕст ун? Се ‘взаргутӕн ци дессаги зӕрдитӕ ӕвардтонцӕ, етӕ ба? Дессаг айтӕ!.. Уонӕмӕ сӕ  евдӕлуй сӕхе гъуддӕгути разӕй?

Анатолий ЧУБАЙС, федар райрӕзти фӕдбӕл Уӕрӕсей Президенти минӕвар: «Бӕстӕбӕл цидӕриддӕр лӕгъуздзийнӕдтӕ цӕуй, етӕ мӕн фудӕй ӕнцӕ. Уомӕ гӕсгӕ нӕ, ӕма ӕз уоййасӕбӕл разагъди лӕг дӕн, фал уой ӕз уотӕ хатун…»

Е дин ӕцӕг дессаг!.. Кӕдӕй-уӕдӕй нӕ бӕсти еугур дзилли ӕма ӕлдареуӕггӕнӕг Чубайси тергади ӕмхузон ӕй… Фал уомӕй хуӕздӕр ба е уидӕ, Чубайс нӕ бӕстӕн дӕр ӕма нӕ адӕмӕн дӕр ӕ фудмиутӕй ци знаггадӕ ӕрхаста, уой туххӕй ӕнӕмӕнгӕ гъӕуама дзуапп ратта, зӕгъгӕ, адӕми гъудий хӕццӕ ку исарази уиуонцӕ барадӕгъӕуайгӕнӕг оргӕнтӕ  дӕр ӕма уой фӕдбӕл сӕ ихӕс ӕдзӕстхезӕй ку исӕнхӕст кӕниуонцӕ.