28 майя 2022

ДӔ ЦЪУХБӔЛ КУ НӔ ХУӔЦАЙ!..

29.03.2022 | 14:45

Еу лӕхъуӕн, ӕ ном Елеур, сӕумӕй катай кодта ӕзини фурниуӕзти фӕсте ӕхе кутемӕй радзӕбӕх кӕна. Уӕдмӕ дин ӕ размӕ фӕцӕй ӕ зонгӕ лӕг Сидӕ. Ӕма ин уотӕ ку загъта, цӕуӕн фӕйнӕ баниуазӕн, уӕд хъӕбӕр бацийнӕ кодта.

Сидӕ ‘й сӕхемӕ бахудта ӕма ин зӕгъуй:

– Ӕцӕг бал нартихуар тугурмӕ исесӕн.

Исистонцӕ ‘й, мадта.

– Картоф дӕр пъадвалмӕ ниййесӕн, – дзоруй бабӕй Сидӕ.

Картоф дӕр исӕмбӕлун кодтонцӕ ӕ бунатбӕл.

– Гъӕйдӕ, уартӕ донуадзӕн хӕтӕл дӕр…

Елеур ӕнхӕст дзорун дӕр Сиди нӕбал бауагъта, уотемӕй фӕтътъӕлланг кодта:

– Сидӕ, ӕз нӕбал ниуазун!..

Ӕма тургъӕй уайтӕккӕ фендӕдуар ӕй…

Еци тухст лӕхъуӕни цау, цума Уӕрӕсей хумӕтӕг адӕмбӕл дӕр фӕстаг рӕстӕгути ӕркодта, уотӕ уӕмӕ нӕ кӕсуй? Адӕймаг цӕргӕ-цӕрӕнбонти фӕхъхъиамӕт кӕнуй паддзахади хуарзӕн, е дӕр мин ести хуӕрзтӕ фӕууодзӕнӕй, зӕгъгӕ, уой зӕрдтӕй. Фал… Ӕ фӕллойнӕн ин фӕффедуй марамӕлай бӕрцӕ мизд, гъе уотемӕй фӕккосуй пенсий уӕнгӕ. Ӕма пенси дӕр цанӕбӕрӕг иснисан кӕнунцӕ – бӕрцӕй нецӕй фагӕ… Е нӕ, фал ма пенсий рацӕуни карӕ дӕр бӕрзонддӕр конд ӕрцудӕй. Ӕма раздӕри фӕткӕмӕ гӕсгӕ пенсий рацӕуйнаг ка адтӕй ӕма мӕ мизд мин пенсий хӕццӕ уӕддӕр естӕй фагӕ уодзӕнӕй, зӕгъгӕ, ка бӕлдтӕй, етӕ фӕффудевгед ӕнцӕ – цалдӕргай ӕнзтӕ райдарддӕр ӕй сӕ бӕлдӕ… Фал нӕ адӕм бухсагӕ ‘нцӕ, ӕма нӕ зӕрдӕ уӕддӕр дарӕн, нури нӕхъӕртондзийнӕдтӕ рӕстӕгмӕ ке ‘нцӕ, уа нӕ уа, уӕддӕр уавӕртӕ фӕррӕвдзӕдӕр уодзӕнӕнцӕ.

Николай ТИЩЕНКО, Украини Сӕйраг Ради депутат: «Ӕз генетикон уавӕрӕй украинаг дӕн. Еугурей дӕр бӕрӕг кӕнун ахсгиаг хуӕлцадон фӕткӕй: кӕд сало нӕ хуӕрис, уӕд украинаг нӕ дӕ…»    

Украинаг «патриоттӕ» сӕ нацистон фудзундӕй цитӕ ба не ‘ргъуди кӕнунцӕ! Сӕ бӕсти адӕмӕн хумӕтӕг царди хумӕтӕг мадзӕлттӕ аразуни бӕсти син сӕ хъури сӕ сало цӕвунцӕ. Уомӕй ба нӕ тӕрсунцӕ, ӕма хецмӕрез миути фудӕй син тагъд ба сало дӕр нӕбал уодзӕнӕй, ӕма уӕдта ма ци исхуӕрдзӕнӕнцӕ?..

 

Геннадий ЗЮГАНОВ, Уӕрӕсей Компартий раздзӕуӕг: «Нуртӕккӕ Уӕрӕсей хуарз цӕрунцӕ айдагъдӕр ӕхца ӕфстау дӕтгутӕ ӕма табӕттӕ арӕзгутӕ…»

 

Уой дӕр еци дууӕ гъуддаги еци-еу адӕймӕгути къохи фӕуунцӕ, ӕма, адӕм федуни равгитӕй бундор кадавар ке кӕнунцӕ, уомӕ гӕсгӕ етӕ, ӕвӕдзи, ӕргъуди кӕндзӕнӕнцӕ нӕуӕг акци – цӕмӕй табӕттӕ лӕвӕрд цӕуонцӕ бӕтгӕй…

 

Кристинӕ ЛАМБРЕХТ, Германий паддзахадон архайӕг: «Агресси исаразгутӕ гъӕуама сӕхебӕл бавзаронцӕ ӕ фӕстеугутӕ, зӕгъӕн, Елисейаг фӕзуӕттӕмӕ хе ерхӕфсунмӕ цӕунмӕ син равгитӕ куд нӕбал уа…»

Ӕнӕ Парижӕй, ӕнӕ уой Елисейаг фӕзуӕтти хеерхӕфсӕнтӕй нӕбӕл, ӕвӕдзи, неци ‘рцӕудзӕнӕй. Фал Европи кӕцидӕр паддзахӕдтӕ нуриуӕнгӕ Уӕрӕсейӕй сӕ цардиуаги ӕнӕмӕнгӕ гъӕугӕдзийнӕдтӕй ци истонцӕ, етӕ син ку нӕбал уонцӕ, уӕд ӕй балӕдӕрдзӕнӕнцӕ, цӕйбӕрцӕбӕл раст ӕй загъд: «Фудмиуӕ аразӕг, уомӕй, фиццагидӕр ӕхуӕдӕг еуруй фидбилиз!..»