28 майя 2022

ДӔ КАДӔГӔНӔГӔН ГЪӔУАМА КАДӔ КӔНАЙ!..

28.01.2022 | 17:21

Зундгонд куд ӕй, уотемӕй аци анз Уӕрӕсей нимад цӕуй адӕмон исфӕлдистади ӕма монон культури Анзбӕл. Уомӕ гӕсгӕ ба аци къабӕзти, ӕвӕдзи, ӕрцӕудзӕнӕй зингӕ зӕрдӕмӕдзӕугӕ ӕййивддзийнӕдтӕ. Уогӕ фӕстаг рӕстӕгути нӕ республики культури еугур къабӕзти берӕ нӕуӕгдзийнӕдтӕ арӕзт ӕрцудӕй. Ӕма еци куст идарддӕр ӕнхӕстгонд ке цӕудзӕнӕй, уомӕн ба еу ӕвдесӕн ӕй, нуртӕккӕ кафти номдзуд паддзахадон ансамбль «Алан» ӕма бӕхти театр «Нарт»-и уавӕртӕ фӕххуӕздӕр кӕнунмӕ бӕлвруд ӕргом ӕздӕхт ке цӕуй, е. Нӕ республики бафӕдзӕхст ӕнхӕст кӕнгӕй, аци коллективтӕ ӕрӕги бабӕрӕг кодта ӕма син сӕ уавӕрти хӕццӕ бӕлвурдӕй базонгӕ ‘й нӕ республики Хецауади Сӕрдар Дзанайти Барис ӕ хуӕдӕййевӕг Туйгъанти Ларисӕ ӕма ӕндӕр бӕрнон кӕсгути хӕццӕ.

Дзанай-фурт ӕрзилдӕй ансамбль «Алан»-и репетицигӕнӕн залтӕбӕл, дзаумӕуттӕ ӕййевӕн уӕттӕбӕл. Исфӕлдистадон коллективи аййевадон разамонӕг Козати Зелимхан радзурдта, сӕ куст цӕмӕй ӕнтӕстгиндӕрӕй арӕзт цӕуа, уой туххӕй концертон номертӕ кӕми фӕццӕттӕ кӕнунцӕ, уоми вентиляци ке нӕййес, уой. Бӕстихайӕн дӕр ӕ бакаст зӕууатмӕ ‘рцудӕй, материалон-техникон уавӕр – хуӕздӕргъӕуагӕ ‘й. Концертон дзаумӕуттӕ базӕронд ӕнцӕ, сӕ еуети син бахудтонцӕ инсӕй анзей размӕ.

Хецауади Сӕрдар куд загъта, уотемӕй сӕ зӕрди ес паддзахадон ансамблӕн еугурвӕрсуг агъаз кӕнун. Еци гъуддагӕн республикон бюджетӕй фӕрӕзнитӕ радех кӕндзӕнӕнцӕ. «Алан» ӕй нӕ республики культурӕ, аййевадӕвдесӕг. Проекти гъӕуама алцидӕр нимад ӕрцӕуа, коллективӕн гъӕуама ӕцӕгӕйдӕр уӕхӕн уавӕртӕ арӕзт ӕрцӕуа, цӕмӕй ӕ куст уа ахедгӕдӕр ӕма ӕнтӕстгиндӕрӕй нӕ республики кадӕбӕл ӕфтуйа. Уе ‘ргом уин ӕздахун: аци нисантӕ ӕвӕруй нӕ республики Сӕргълӕууӕг ӕма сӕ гъӕуама афойнадӕбӕл ӕнхӕст кӕнӕн» – фӕббӕрӕг кодта Дзанайти Барис.

Арӕзтадӕ ӕма архитектури министр Милдзихти Аслан куд радзурдта, уотемӕй нуртӕккӕ цӕттӕ кӕнунцӕ проектон-хӕрзти гӕгъӕдитӕ, уой фӕсте сӕ рахӕсдзӕнӕнцӕ конкурсон процедурӕмӕ. Цалинмӕ цалцӕг кӕнонцӕ, уӕдмӕ «Алан» ӕ куст кӕндзӕнӕй ансамбль «Хӕхты сывӕллӕттӕ»-йи бӕстихаййи.

Паддзахадон ансамбли бӕстихай бундоронӕй исцалцӕг кӕндзӕнӕнцӕ, ӕ материалон-техникон бундортӕ ин фӕгъгъӕздугдӕр кӕндзӕнӕнцӕ, ансамбли архайгути цӕттӕдзийнадӕ фӕббӕрзонддӕр кӕнунӕн мадзӕлттӕ исараздзӕнӕнцӕ. Еугур еци нисантӕ бахастонцӕ нӕ республики 2014-2024 анзмӕ культури ирӕзти программӕмӕ.

Мадта бӕхти театр «Нарт»-и ирӕзти гъуддӕгутӕ дӕр ӕнцӕ сӕрмагонд республикон программӕмӕ хаст, исфедар ӕй кодта нӕ республики Хецауадӕ. Дзанайти Барис театр бабӕрӕг кӕнгӕй фӕууидта сӕ кусти уавӕртӕ. Театри аййевадон разамонӕг Сихъоти Тимур куд байамудта, уотемӕй ами гъӕуама исаразонцӕ театри бӕстихай, техникон ӕма административон бунӕттӕ, бӕхтӕ дарунӕн уӕлӕнхасӕн фӕзуӕттӕ.

Еци еугур гъуддӕгутӕ нисангонд ӕнцӕ театри райарӕзти проекти. Уотӕ зӕгъӕн ес, ӕма си фӕззиндзӕнӕй нуриккон бӕхти комплекс. Комкоммӕ куститӕмӕ бавналдзӕнӕнцӕ 2023 анзи. Уой фӕдбӕл дзоргӕй Дзанайти Барис загъта:

– Гъуддагмӕ барӕдарӕг адӕм еумӕйагӕй ку февналонцӕ, уӕд гъӕуама куститӕ раздӕр дӕр райдайӕн. Алцидӕр гъӕуама конд цӕуа барстӕй, бӕрнонӕй.

Бӕхти театр «Нарт» цӕмӕй сӕ гъомусӕй пайда кӕнонцӕ, уой туххӕй син исараздзӕнӕнцӕ ӕнхӕст, фадуатгин комплекс еугур ӕвналӕнти хӕццӕ. Фӕззиндзӕнӕй сӕмӕ зӕлти ӕма рохси ефтонггӕрзтӕ, бӕхтӕ ласӕн сӕрмагонд транспорт, сценӕн гъӕугӕ ефтонггӕрзтӕ.