28 майя 2022

ДÆ ЦЪУХБÆЛ КУ НÆ ХУÆЦАЙ…

02.03.2021 | 16:39

Еу фурæсхъæл бонгин адæймаг æ зæрдидзæбæхæн гъæунгти куд разелæ-базелæ кодта, уотемæй æ еу зонгæбæл ку исæмбалдæй, уæд æй хъалзæрдæй хинцфæрститæ кæнун байдæдта. Еузагъдæй, æ айуан дзæнгæдайæн кæрон нæбал адтæй. Фæстагмæ ба ма уотæ бакодта:

– Хуцауистæн, дæхе хузæнæй дæмæ нецибал байзадæй!.. Хузи цъирт ди нæбал ес, дæ цæститæ сæ къурфити ранихъулдæнцæ. Уæззау сæйгæ ма уай, е ми нæ баруагæс уодзæнæй.

– Раст зæгъис, – мæтъæлæй дзуапп равардта лæг. Уæхæн хабæрттæ мæбæл ахид æрцæуй, уæлдайдæр…

– Гъо æма уой туххæй уотæ æнцад-æнцойнæй куд дзорис? Цийфæнди нез дæр афойнадæбæл рартасун гъæуй!..

Æма евдæлон лæг гæркъæрагæ фестадæй. Æ зонги исдзурд нæ уагъта, уотемæй æй рафарста:

– Æма мæ лимæн, уæхæн æрхæндæг уавæри ахид бахауис?

– Мæнæ дæу хузæн æсхъæл пъæрт-пъæртгæнгути ку рауинун, уæд æгириддæр мæ кеми нæбал  фæуун. Уæ хæццæ фембæлди фæсте мæтъæлæй байзайун, аци рохс дуйне мин цæстисиндзæ фестуй…

Еци мæгур лæги хузæн уавæри нур кæдæй ардæмæ æнцæ хумæтæг уæрæсейаг адæм!.. Нæ цардиуаги хабæрттæ ка гъæуама араза æма сæ еци ихæс æнхæст кæнунæй цъизи-мудзитæ ка кæнуй (кенæ арæхсгæ кæнунцæ, кенæ ба сæ нæ фæндуй!..), еци хецауеуæггæнæг лæгтæ, политиктæ, депутаттæ нæ уодæмбес ку бакодтонцæ се ‘дзæсгон дзубандитæй, сæ расайитæ-басайитæй. Уодагъай си бæргæ кæнæн, фал нæ лæдæрæг ба ку нæййес… Уогæ си ци агорæн еци дзæнгæдацæгъдгутæй? Гъе уæхæнтти туххæй æй нæ фидтæлтиккон загъд: «Берæ хæзнатæбæл ка ниддæвдæг уй, е ескæмæн хуарз ракæнунгъон нæй…» Уотæ ке ‘й, е ба бæрæг æй, æ фурхъалæй тъæппитæ ка хауй, уони уæлбекъон дзубандитæй.

Александр Шерин, Паддзахадон Думи депутат: «Махмæ абони нæййес нæдæр коммунизми, нæдæр социализми менеугутæ, фал уой бæсти ба нæ цæсти рази æй хæлæфизм…»

Æма е ке фуд æй? Хецаудзийнади бæрзонд бунæтти бадгутæ æма, уони фæрци еугурадæмон есбонадæмæ урути хузæн ка байервазтæй, етæ, еци хæлæфизм искодтонцæ еугурпаддзахадон фæткæ. Сæ фудмиуæ уæддæр еуцæйбæрцæдæр адæймагхуз бакасти аууон ку бакодтайуонцæ. Уогæ еци хæлæфизми «хъазауатонти» уæхæн римæхсæнтæ некæми гъæунцæ. Кæмæй гъæуама æфсæрми кæнонцæ? Æгъатирæй ке æстъегъунцæ, еци адæмæй?.. Кунæг!..

 

Ренатæ ЛИТВИНОВА, режиссер, актрисæ: «Паддзахадæ ихæсгин æй кинойæн нин æхца дæттунæй, фал æй неци барæ ес, ци æма куд есæн, уой туххæй нин унаффæ кæнун…»

Нур аци æхебæл æгæр фенвæрсæг силгоймаг, зæгъæн, æ хæдзарæмæ æрбакодта цалцæггæнгути, цæйбæрцæ гъудæй, уойбæрцæ æхца син бафиста, æцæг, куд гъæуама цалцæг кæнонцæ, уой бадомун ба æ барæ нæй. Уобæл, баруагæс уи уæд нæ исарази уодзæнæй. Æма уæд паддзахадæй ба, федгæ нин бакæнæ, циуавæр кино исесдзинан, уомæ ба дæ неци гъуддаг ес, зæгъгæ, домун ба ци цæсгонæй æндеуй?

 

Станислав БАРЕЦКИЙ, шоумен, шоубизнеси «стъалутæн» уæлмæрдти туххæй: «Цийфæнди ходæг ку фæккæса, уæддæр фæндуй ма нæ уоми концертон фæзæгонд исаразун. Арæзт си цæудзæнæнцæ номерæн изæртæ…»

Сæ уæлзæнхон царди тæккæ игъустгонддæр «æстъалути» ба æнгъездзæнæй айдагъ æрдзæфгæнгæй се ‘носон дуйнемæ рафæндараст кæнун нæ, фал ма сæ еума æма еума хатт нæуæгæй байвæрунцæ, гъома, «бис!..», зæгъгæ. Хуцау нин ниххатир кæнæд нæ аци загъд, фал аци шоу-бизнеси бодзотæ сæ сæри зундæй, æвæдзи, бустæги фæккиудтæнцæ.