Медицинон къабази косæги кадæ фæббæрзонддæр кæнуни туххæй нæ республики арæзт æрцæудзæнæй сæрмагонд конкурс «Цæгат Иристони хуæздæр дохтир».

Уæхæн унаффæ хаст æрцудæй æрæги проектон офиси æмбурди. Сæрдареуæг си кодта нæ республики Сæргълæууæг Битарти Вячеслав, æма е æ радзубандий куд баханхæ кодта, уотемæй аци ахсгиаг гъуддаги гъæуама байархайуонцæ, гæнæн æма амал куд ес,  уотæ фулдæр дохтиртæ. Уой туххæй ба, куд медицинон косæндæнтти медæгæ, уотæ дзилли æхсæн дæр æнæмæнгæ гъæуй райаразун гъæугæ лæдæрунгæнæн æма разæнгардгæнæн куст.

Программæ «Æнæнездзийнадæ гъæуайкæнуйнадæ»-йи разамонæг Туати Ирмæ куд загъта, уотемæй конкурси ес дууæ номинаций – хуæздæр терапевт æма хуæздæр педиатр.

Конкурс райдайдзæнæй 1 октябри æма цæудзæнæй цуппар фæлтæремæй. Фиццаг фæлтæри ист цæудзæнæнцæ курдиæттæ, аци конкурси архайун ка исфæндæ кæна, еци дохтиртæй. Дуккаг фæлтæри мадзал ба арæзт цæудзæнæй Цæгат Иристони паддзахадон медакадемий. Уоми аргъ искæндзæнæнцæ компьютерон фæрæзнитæй. Æртиккаг фæлтæри ба, хуæздæр дохтири ном райсунмæ гъавæг специалисттæн аргъ кæндзæнæй 5-7 адæймагемæй арæзт къамис, æ хæццæ ма æнæмæнгæ æндагон эксперттæ дæр, уотемæй. Цуппæрæймаг фæлтæри бундори ба онлайн-гъæлæс кæнуни фæрци нæ республики цæргутæй алкæмæн дæр æ бон уодзæнæй, хуæздæр дохтири ном радтуни аккаг ке нимайунцæ, уони туххæй исгъæлæс кæнун.

Аци конкурс исаразуни фæдбæл дзоргæй, Битарти Вячеслав сæрмагондæй куд баханхæ кодта, уотемæй гъуддаг хъæбæр ахсгиаг æй  æма имæ хумæтæг цæстæй ракæсæн нæййес. Ка си архайдзæнæй, уони конкурси уагæвæрди домæнтæмæ гæсгæ æнæмæнгæ наукон архайди бæрæггæнæнтæ, хуæрзеугутæ, Кади нисантæ бавдесун ку гъæуа, уæд уой фудæй æ архайгути нимæдзæ зингæ фæмминкъийдæр уодзæнæй – кæмæдæрти еугур еци хабæрттæ, ка ’й зонуй, нæ разиндзæнæнцæ, уотемæй ба æ профессионалон архайд ба æй банимайуни аккаг.

– Гъæути æма сахарти уæхæн дохтиртæ косуй, æма син рæстæг нæййес наукон уацтæ финсунмæ, – загъта республики Сæргълæууæг. – Уони еци кустмæ, æвæдзи, евдæлгæ дæр нæ кæнуй, уомæн æма сæ еудадзуг гъæуй сæйгити хæццæ архайун, берети ба си сæ хæдзæртти бабæрæг кæнун, æхсæвæ уа æви бонæ. Еци гъуддаг гъæуама бæрæггонд æрцæуа конкурси архайуни барæ дæттæг документти.

Еци-еу рæстæг исарази æй, цæмæй каст цæуа уомæ дæр, æма конкурси архайæг дохтир цæйбæрцæбæл æнтæстгинæй архайуй кæстæр специалисттæн хуæрзауодæг æма зундамонæг уни гъуддаги.

Конкурси хатдзæгтæ исбæрæг уодзæнæнцæ анзи кæрони, уæлахездзаутæн лæвæрд æрцæудзæнæнцæ фатертæ, иннæ призон бунæттæмæ рацæуæг дохтиртæн – æхцай премитæ.